Yexejqel 11
11
Pniqan Qnquwan Noda ka Yerusalem
1Ptutui kenan ka Bgihur. Desun ku na rhengun quri nklaan hido sapah thmkuwan nuUtux Tmninun. Qtai! Niqan 25 seediq gaga rhengun hiya. Qtaan mu ckceka daha hiya ka Yaajaneyah laqi Ajur ma Pelatyahu laqi Benayahu. 2Rmengo kenan ka Utux Tmninun: “Laqi seediq! Gisu lmngelung ooda qnquwan noda ka dheya. Kiya ka dseediq smmalu qnquwan noda ckceka alang nii. 3Rmengo ka dheya: ‘Ini dehuk ka smlean sapah nana. Ribo ka alang nii ma, heyi ta ka ita.’ 4Laqi seediq! So kiya de, asi su ka rmengo kari pgeela ma, mpcebu su dheya rmengo kari plaale.”
5Meyah heyi mu ka Bgihur Utux Tmninun ma, rmengo kenan: “Rengo so nii, So nii kari na ka Utux Baro, Dtnsapah Israel! Rnengo namu we, kiya ka gaga namu lnglungun lhebun namu. Ida mu klaun kana. 6Malan namu phuqil ka seediq alang nii ma, stenge luelu ka seediq mnhuqil. 7Maanu so kiya de, so nii kari na ka Utux Tmninun Bukung, seediq pnhuqil namu ckceka alang we, kiya ka heyi ma, ribo ka alang nii. Desun namu na nganguc peeyah hiya ka dyamu. 8Miicu namu hlmadac ka yamu ma, mpeeyah ku hlmadac ckceka namu ka yaku. So nii ka rnengo Utux Tmninun Bukung. 9Pltadun maku peeyah alang hini ka yamu. Bege maku baga seediq icil qlhangan ma, mpsgao ckceka namu. 10Phqilun namu hlmadac ka yamu. Psgeegun maku ayus qlhangan Israel ciida de, maha namu mkela, yaku ka Utux Tmninun. 11Uxe mpsupih namu ka alang nii. Uxe namu mpheyi ckceka ribo ka yamu uri. Psgeegun maku ayus qlhangan Israel hiya. 12Kiya de mpkeela namu, yaku ka Utux Tmninun. Ado ini namu puyu kari pndakar mu ma, ini namu snegul gaya bneku mu. Krinah namu muyu pnugaya seediq icil qlhangan gaga mtqiri yamu.”
13So nii rmengo ku kari pgeela ciida, mhuqil ka Pelatyahu laqi Benayah. Kiya de tgtemaq ku dxeral ma pmbaro ku mlawa: “Ah! Utux Tmninun Bukung! Qhdeun su pqhedu pkuuka ka nngari seediq Israel ho?”
Sntangan seediq Qnerac ka Utux Baro
14Meyah kenan ka kari Utux Tmninun, rmengo, 15“Laqi seediq! Dseediq Yerusalem ge, rmnengo quri mtswai su, tnsapah su, ltlutuc su ma, kana seediq sapah Israel: ‘Stheyaq ba peeyah Utux Tmninun ka yamu! Ado nii sbege menan ka dxeral nii.’ 16Maanu so kiya de rengo ka isu: ‘So nii kari na ka Utux Tmninun Bukung, ani yaa wada mu hrigun ckceka seediq theya ba icil qlhangan ma wada mkrehak qqlhangan ka kana sapah Israel we, maha ku mosa meniq dqqlhangan gaga daha niqan. Kiya ka ngalun daha sapah thmkuwan mu hayan.’ 17Rengo so nii ka isu: ‘So nii kari na ka Utux Tmninun Bukung, pssliun maku peeyah ckceka kana seediq, pssliun maku peeyah kana qqnlhangan pnruhepan yamu ma, biqun maku dxeral Israel ka yamu.’ 18Dehuk hiya ka dheya de, maha daha lixun ka kana qyqeya pqnqihun ma ani maanu trqilun. 19Bege mu dheya ka lhebun pskingal ma, bege mu ckceka daha ka bgurah Bgihur. Qada mu peeyah heyi daha ka lhebun btunux ma, biqun mu lhebun heyi. 20So maha muyu kari pndakar mu ma, mbahang gaya bneku mu. Mpseediq mu ka dheya ma, mpuUtux Baro ku daha ka yaku. 21Quri so dseediq smnegul qyqeya pqnqihun ma qnrquun we, mpuyu ku qneepah daha cmiyuk pkdira dheya. So nii ka rnengo Utux Tmninun Bukung.”
Mlatac Yerusalem ka Knledax Utux Baro
22So kiya de, kmugah palic daha ka kirubing ma, meniq ssiyo daha ka ribo uri. Meniq baro daha hiya ka ledax Utux Baro nuIsrael. 23Mnkala peeyah ckceka alang ka ledax Utux Tmninun ma, mosa msange bobo dgiyaq quri nklaan hido. 24Ptutuy kenan ka Bgihur, meniq ckceka tuutux, desun ku na dxeral Krdiya, kiya ka dseediq qnerac hiya ka Bgihur Utux Baro. Kiya de wada mnkala quri baro kana ka qnita mu tuutux. 25Kiya de srengo mu seediq qnerac ka kana pnqtaan kenan Utux Tmninun.
Currently Selected:
Yexejqel 11: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
