Epesos 2
2
Mlatac Hnqilan Mremux Kdesan
1Cuuxal, ado qnquwan noda namu nanak wada namu mhuqil da. 2Ciida, mnuudus namu ckceka qnquwan, muyu namu lnglungan bobo dxeral nii ma muyu mdoi pusu beyax ga karac han. Kiya ka utux naqah ga qmeepah quri seediq tbrinah saya. 3Mnuudus ta ckceka dheya muyu kkraguh heyi kana han. Kiya de muyu ta ida so pnesa heyi ma lnglungan. Mntena ta kana seediq ida pbale ba asi ka pkdraun pneyah mntuting. 4Kiya de Utux Baro ge, niqan paru bale gnaalu na. Ririh paru gnaalu na ita, 5ririh ga ta mhuqil qnnaqah ta ciida, wada na pspuun pkuudus Kiristo ka ita, so nii we pneyah huwe pnkuudus kiya. 6Kiya de Utux Baro we wada tana pspuun Kiristo pkuudus peeyah hnqilan ma wada tana pspuun ptleung Yesu Kiristo baro. 7Eyux na pgkela bobo knxalan na ka qnblayaq gnhuwe na, kiya ka gnhuwe na quri ita meniq Yesu Kiristo. 8Ado wada muudus ka yamu we mnoda snhiyan ma pneeyah huwe. Uxe pneeyah yamu nanak ka so nii, bnege Utux Baro ka kiya. 9Uxe mnoda malu qneepah ka nii. Kiya de uxe ttndahu ani ima. 10Ado ita we qneepah na wada na smlean mnoda Yesu Kiristo qqeepah ta malu qpahun. Malu qpahun nii we pnuglaan pnsramal Utux Baro ddaun ta.
Mskingal Ckceka Knuudus Kiristo
11Maanu so kiya de iya chungi: Berah na nii ka yamu ge, nasi pdaun quri heyi we seediq namu icil ini namu oda ptgaya psalak. Ngayan nii we kiya ka pnoda baga seediq tmngayan meniq heyi seediq mnoda ptgaya psalak. 12Ciida ka yamu we nuuka namu Kiristo, nuuka namu ckceka patis ngayan qnlhangan Israel, uxe namu gnkela ka sndehu ga thiqan pnstangan kari ma bobo dxeral hini we uka namu snluwan ma uka namu Utux Baro. 13Cuxal we dseediq namu sntheya Utux Baro, kiya ka kiya nii namu meniq Kiristo Yesu saya ma, smtama namu dara na wada namu na psdligun Utux Baro da.
14Heya we mpsbale lnglungan ta. Wada na pskngalun mkigal ka ita, hmurah qnabil ckceka ta ma spoda na heyi na pkuuka knpais ta. 15Kiya de wada na sqada ka nkari rnengo ga spatis gaya pndakar, spooda na heya na nanak smalu 1 bgurah seediq ka ddaha nii. Wada na ptkuun psbale. 16Meniq bobo jyujika wada na qhdeun pkuuka ka knpais. Kiya uri spooda na jyujika nii wada na pskngalun pskingal heyi ka mnddaha nii ma pkmalu daha ka Utux Baro. 17Kiya de yahan na gmarang malu kari quri psbale ka yamu seediq ga meniq theya ma seediq ga smdaling uri. 18Ado ita seediq Yudaya ma seediq icil qnlhangan we mooda ta Kiristo ma Bgihur Utux meyah ta berah Tama.
19Maanu so kiya, yamu seediq icil qnlhangan we uxe namu dseediq nganguc ma seediq mtnooda da, msuupu namu mrtaso tnugsaan 1 qnlhangan ma ida namu seediq sapah nuUtux Baro. 20Ga smlean bobo pusu ka sapah nii. Pusu nii we kika dsnkgulan ma dmpgeela kari. Kiristo Yesu ka pusu btunux muxi sapah. 21Ga pltudan heya ka kana knkingal snmalu ma dmudur msapah thmkuwan Bukung. 22Ga namu meniq heya ka yamu uri ma ga namu na pspuun smalu hiya ma nniqun Utux Baro moda Bgihur Utux.
Currently Selected:
Epesos 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
