Mege Gaya 30
30
Msnberih Dungal ma Ssbleyaq
1“Kana sbleqan ma sniyus pnosa mu berah su gisu meyah isu kana ciida de, mplmngelung su noda nii ka lhebun su, meniq su dqnqlhangan lniwaq su Utux Tmninun, Utux Baro su. 2Nasi isu ma lqlaqi laqi su pooda kana lhebun ma lnglungan mquri Utux Tmninun, Utux Baro su. Muyu kana rnengo mu sunan saya ma, mbahang kari na de, 3mpgaalu isu ka Utux Tmninun, Utux Baro su ma, mpbrinah ka dseediq qnerac dnisu nii. 4Ani su wada lwaqun betaq puting karac ma rcilung we, maha su na ppsliun peeyah hiya ka Utux Tmninun, Utux Baro su. Peeyah hiya mpdudul isu meyah. 5Utux Tmninun, Utux Baro su we, mpdudul isu mpremux dxeral nangal pusu rudan su. Isu we maangal su dxeral nii. Mpbleyaq isu ka heya ma, mpkrana sunan hmrinas pusu rudan su. 6Utux Tmninun, Utux Baro su we, mptgaya psalak lhebun su ma lhebun lqlaqi mnslutuc su. Tai so mpeeyah kana lhebun ma kana lnglungan su gmaalu Utux Tmninun, Utux Baro su. Kiya ka mpkuudus su. 7Utux Tmninun, Utux Baro su we, psaun na heyi dpais su, dseediq tmraqil ma qmnriqu sunan ka kana sniyus nii. 8Msnberih su ma, mpqbahang su kari Utux Tmninun. Mpuyu su kana gaya pndakar na. Kiya ka rnengo mu isu saya. 9Utux Tmninun, Utux Baro su we, mprana ma mpsbleyaq kana qneepah baga su, tnlaqi peeyah heyi su, pntuting peeyah tnbugan su ma, pnyahan dxeral su. Utux Tmninun we mpgaalu ma mpbleyaq isu. Mntena so gnaalu na pusu rdrudan su. 10Asi su ka mbahang kari Utux Tmninun, Utux Baro su. Muyu gaya pndakar na ma kari pndakar pnatis na patis gaya nii ma, mpeeyah kana lhebun ma kana lnglungan su mquri Utux Tmninun, Utux Baro su.”
Elu Knuudus
11“Gaya pndakar rnengo mu isu saya we, uxe ka rriqu ma, uxe ka theya riyung duri. 12Uxe gaga spqeya karac baro uri. Kiya de betaq su rmengo: ‘Ima ka mmaha mangal karac baro ma, mbahang ta de mpuyu ta di peni?’ 13Uxe gaga sipo rcilung rmengo sunan: ‘Ima ka mmaha mntaril rcilung mangal ma, mbahang ta de mpuyu ta da peni?’ 14Kari nii we msdaling isu. Gisu ckceka quwaq su, ga meniq lhebun su leexan su pyugun.
15Qtai, saya we, gisu mu psaun berah su ka kkuudus ma hhuqil, ssbleyaq ma qqraqil. 16Kari rnengo mu isu saya we, kiya ka asi su ka gmaalu Utux Tmninun, Utux Baro su, muyu elu na ma, tleus moda gaya pndakar, kari pndakar ma, gaya bneku na. Kiya ka maha su muudus ma, mpkrana su. Kiya ma Utux Tmninun, Utux Baro su we, mpbleyaq isu mosa su mremux dxeral bbege na sunan hiya. 17Nasi wada mridil ka lhebun su. Ini su qbahang ma, wada su psrdilun mpthmuku ma meepah duutux icil de, 18mptuura ku rmengo yamu saya, mphuqil namu. Uxe mpqbsiyaq ka nniqun namu dxeral nangal namu mntaril yayung Yarden hiya. 19Mlawa ku karac, mlawa ku dxeral pgkela isu: Gisu mu psaun berah su ka kkuudus ma hhuqil, sbleyaq ma cmiyus. So kiya de gao kkuudus, tai so mpkuudus ka isu ma lqlaqi mnslutuc su. 20Asi su ka gmaalu Utux Tmninun, Utux Baro su ma snegul bale heya. Ado knuudus su ka heya. Heya ka mpqbsiyaq knuudus su. Kiya ka maha su meniq dxeral sndhegan na mege Abraham, Yijxaq ma, Yakobu pusu rdrudan su hiya ka isu.”
Currently Selected:
Mege Gaya 30: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
