Mege Gaya 31
31
Rmirih Moseh ka Yehosua
1Kari nii we saan na rmengo seediq Israel ka Moseh. 2Rmengo dheya: “Tena ku nii 1'20 knkawas ka yaku di. Saya de ini ku kmdehuk qmeepah qpahun. Rmnengo yaku ka Utux Tmninun: ‘Uxe su mptaril yayung Yarden ka isu.’ 3Meeniq berah su mpgeela yamu mosa mtaril yayung ka Utux Tmninun, Utux Baro su. Mpeeyah berah su mhuqil qnqlhangan nii de, maangal su dxeral daha ka isu. Yehosua we mptaril peeyah berah su ka heya. Nii we pnuyu rnengo Utux Tmninun. 4Wada huwa kesun pkuuka Utux Tmninun ka dqnlhangan Sixon ma Og qbsuran paru seediq Amori we, mpkeso kiya mpkuuka ka dheya uri. 5Utux Tmninun we, bege na berah namu ka dheya. Kiya de asi namu ka muyu kana rnengo mu kesi heya moda ka dheya. 6Kbeyax ma pniqi pahung ka yamu. Iya kiicu ma iya kngungu dheya. Ado mptheyaq isu ka Utux Tmninun, Utux Baro su. Uxe su na laxun, uxe su na qada.”
7Mlawa Yehosua ka Moseh ma rngagan na berah kana seediq Israel: “Knbeyax ma pniqi pahung ka yamu! Ado mptheyaq su seediq nii mremux dxeral sndhegan bnege Utux Tmninun rdrudan namu. Asi su ka pngalun dxeral nii ka dheya. 8Mpgeela sunan mosa ka Utux Tmninun. Mptheyaq sunan ka heya ma, uxe mpaalix sunan ma, uxe mpqada sunan. Iya kiicu ma, iya kngungu.”
Msn7 Knkawas Mntexal Smepu Gaya
9Mnatis gaya nii ka Moseh ma, sbege na dseediq msapuh Lewiy mpheal kulu pnsdhegan Utux Tmninun ma kana drudan Israel. 10Rmengo dheya ka Moseh: “Qnhdean knkawas msn7 knkawas, kiya ka smseman knkawas ssrwaun meniq pkobu ciida. 11Tqita ta meyah nniqan gnao Utux Tmninun, Utux Baro su ciida ka seediq Israel we, asi su ka meniq berah seediq Israel smepu gaya nii pqbahang dheya. 12Psseli kana ka seediq, rseno, mqedil, lqlaqi, seediq tnooda lualang. Pqbhangi kana dheya. Kiya de so maha miicu Utux Tmninun, Utux Baro namu ka dheya ma, tleus muyu kana kari gaya nii. 13Lqlaqi daha, kiya ka ini kela na we, asi ka mbahang uri. Mpsluhe miicu Utux Tmninun, Utux Baro namu. Asi namu ka so nii moda meniq kana kndesan namu ma, nniqan namu dxeral nangal namu mntaril yayung Yarden hiya.”
Pgkela Kari Qnhdean ba Moseh
14Rmengo Moseh ka Utux Tmninun: “Tai! Daling ka ali hhqilan su da. Plaani ka Yehosua ma, psuupu mheyu truma kobu mrtaso. Kklaun mu rmengo ka heya.” Kiya de mosa mheyu kobu mrtaso ka Moseh ma Yehosua. 15Utux Tmninun we, meniq kobu mrtaso, tqita ckceka eruc plabu. Eruc plabu we, msange bobo rhengun kobu mrtaso.
16Rmengo Moseh ka Utux Tmninun: “Qtai! Mptheyaq su mtaqi pusu rudan su ka isu. Mptutuy ka seediq nii, mmaha smnegul mnhemuc msuupu mtaqi duutux icil ma mqada kenan, kiya ma mpbrinah sndhegan mu dheya meniq dxeral ssaun daha mangal ma, ckceka seediq hiya. 17Ciida, mpquri dheya ka sqama seang mu. Lixun mu ka dheya ma, mbege ku qilu dheya. Kiya de phqilun ma, meeyah dheya ka egu riyung mqraqil. Ali ciida, mprengo ka seediq: ‘Meyah kenan ka mqraqil nii we, uxe uka meniq ckceka mu ka Utux Baro peni?’ 18Ali ciida, ado wada mquri kana naqah noda duutux icil ka seediq. Maha ku mege qilu dheya. 19Saya ka yamu we ptsani ka uyas nii. Ttgsaani seediq Israel ma, peeniq quwaq daha. Tai so mkela mptiyu ku seediq Israel ka uyas nii. 20Ado dmnudul mu mremux dxeral quri sntangan mu pusu rdrudan daha, dxeral psbyeqan nunuh ma walu ka dheya. Mttengi meniq hiya ka dheya ma, mtbeno bale. Kiya de pquri duutux icil, meepah dheya, psbiciq qmita kenan ma, tbrinah sndhegan mu. 21Smterung egu mqraqil ciida ka dheya de, mpgkela berah daha ka uyas nii. Ado lqlaqi mnslutuc daha we mpuuyas nii uxe daha chngiun. Tberah ini mu desi dxeral sntangan mu ciida ka dheya we, klaun mu ka lnglungan daha.” 22Ali ciida, matis uyas nii ka Moseh ma stgesa na seediq Israel.
23Rmengo Yehosua laqi Nun ka Utux Tmninun: “Knbeyax ma pniqi pahung ka yamu. Ado mpdudul su seediq Israel mremux sntangan mu dheya ma, mptheyaq ku isu ka yaku.” 24Qhdeun matis Moseh ckceka patis ka kana kari gaya nii de, 25Moseh we rmengo seediq Lewiy mpheal kulu pnsdhegan nuUtux Tmninun: 26“Angal ka patis gaya nii, peeniq ssiyo kulu pnsdhegan Utux Tmninun, Utux Baro namu. Kiya ka tduwa pgkela mptiyu yamu meniq hiya. 27Ado klaun mu mptbrinah namu ma mkere nduyung namu. Qtai! Muudus ku mtheyaq yamu saya han we, gaga namu tbrinah Utux Tmninun. Wada ku mhuqil de mphuwa namu di ho? 28Psseli yaku hini ka kana rudan knkingal pnswayan rudan ma, rngagun mu ma pqbhangun mu dheya. 29Klaun mu. Bobo wada ku mhuqil de, maha namu mpqnaqah kana ka yamu. Mpbrinah namu elu rnengo mu yamu. So kiya de meeyah yamu ka mqraqil, ado namu wada moda oda qnnaqah ckceka doriq Utux Tmninun. Noda baga namu we mptutuy seang na.”
Uyas Moseh
30Moseh we spquri na kana seediq Israel, saangal na ka kari uyas nii ma, speeyah na berah betaq bukuy smepu kana.
Currently Selected:
Mege Gaya 31: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
