Mege Gaya 26
26
Mege Pnlaale Mnheyi
1“Mremux su mangal dxeral bnege Utux Tmninun, Utux Baro su, meniq su hiya ciida, 2asi su ka mangal duma pnlaale mnheyi peeyah dxeral bnege na sunan ka Utux Tmninun, Utux Baro su. Psai bruru ma, desi nniqan gnao Utux Tmninun, Utux Baro su hiya. 3Osa msapuh gaga hiya, rngagi: ‘Ali saya we mptuura ku rmengo Utux Tmninun, Utux Baro su, gisu ku dehuk dxeral sndhegan Utux Tmninun miyan quri pusu rdrudan nami.’ 4Msapuh we ngalun na peeyah baga su ka bruru ma pniqun na berah spuhan Utux Tmninun, Utux Baro su. 5Mptuura su rmengo berah Utux Tmninun, Utux Baro su: ‘Pusu rudan mu we seediq Aram mtnooda qnduriq. Mnadis ini khbaro seediq mtnooda mneniq Micrayim. Bobo mneniq hiya de, mrana mbeyax ma paru qnlhangan seediq da. 6Tmraqil dyami ka seediq Micrayim, phuqil yami ma psgcuqi bale pqeepah menan. 7Kiya de dmnurun miyan Utux Tmninun, Utux Baro npusu rudan miyan. Mbahang hrenang miyan ka Utux Tmninun de, qtaan na so nii pnqraqil, bqerus ma, tnraqil daha menan. 8Kiya de Utux Tmninun we sdoi na paru bale beyax baga na, hmkero hiqur baga na, mnoda qmeepah kcugun bale beyax ma pnskraya, sklwiun noda ma, dmnudul yami platac peeyah Micrayim. 9Dmudul psteme menan betaq hini ma, biqan miyan na malu dxeral psbyeqan walu ma nunuh. 10Utux Tmninun! Qtai! Bege mu sunan saya ka pnlaale pnugheyi dxeral bnege su menan.’ Kiya de psaun su berah Utux Tmninun, Utux Baro su ka bruru ma mpthmuku berah na. 11Isu ma seediq Lewiy ma, seediq tnooda ckceka su we, mpqaras namu bnege na sunan ma kana snbleqan sapah su ka Utux Tmninun, Utux Baro su.
12Mgnetun knkawas tg3 we, kiya ka knkawas bbege namu 1 tnugmxalan. Asi su ka mangal 1 tnugmxalan peeyah kana gnhiyan dxeral. Saun su maasu seediq Lewiy, seediq tnooda, lqlaqi uka tama bubu ma, mqedil mqrinuc. So maha mttuuku kntengi daha meniq lualang namu ka dheya. 13Mprengo su berah Utux Tmninun, Utux Baro su: ‘Gisu mu desun nganguc peeyah sapah ka uqun mrtaso. Pnuyu mu kari rnengo su, wada mu sbege seediq Lewiy, seediq tnooda, lqlaqi uka tama bubu ma, mqedil mqrinuc. Rnengo su we, wada mu ba daun ma, ini mu chngii. 14Mbasi ku ciida, ini ku ekan uqun mrtaso nii. Mrutiq ku ciida we ini mu desi nganguc ma, ini mu biqi seediq mnhuqil uri. Mbahang ku kari Utux Tmninun, Utux Baro mu. Muyu moda kana rnengo na. 15Braho su bale, qtai peeyah karac baro ma, mrtaso nniqan su, sbleqi ka seediq su Israel ma dxeral sndhegan su pusu rdrudan miyan bnege su yami nii. Kiya ka dxeral psbyeqan nunuh ma walu.’”
Ma Seediq Mrtaso
16“Ali saya nii rmengo sunan, puyu kari pndakar ma gaya bneku Utux Tmninun, Utux Baro su nii. Kiya de asi ka speeyah kana lhebun ma kana lnglungan su moda ka nii. 17Wada namu smdehu ali saya Utux Tmninun we Utux Baro su. Mpsruwa su muyu elu na ma, mptduwa su moda kari pndakar, gaya pndakar ma gaya bneku na ma, mbahang kari na. 18Utux Tmninun we, mpuyu sntangan su isu ma seediq na ma, tleus muyu kana gaya pndakar na. 19Mpgkala su mangal tndhuwan, ngayan malu, pkledax hmrinas dqnhlangan. Kiya uri we so mpuyu sntangan na, mpgseediq mrtaso Utux Tmninun, Utux Baro su ka isu.”
Currently Selected:
Mege Gaya 26: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
