Mege Gaya 25
25
1“Nasi niqan prngagan mpprengo meyah migin sseengan. Nasi msderux ka seediq mnsderux ma, niqan qnquwan noda ka seediq naqah. 2Asi ka sbetun berah mpsgao ka heya ma, puyu so qnquwan noda na smebuc. 3Betaq mn40 ka smebuc ma iya hrinas. Hmrinas su nii de, gisu su tmsiiyax mtswai su ka nii da.
4Qmtemaq miriq mugi ka dapa ciida we, iya gmuki ka quwaq na.”
Pllutuc Ngayan Qbsuran Wada Mhuqil
5“Msuupu meniq ka 2 mtswai rseno ma ini hiti laqi wada mhuqil ka kingal ma, ini hiti laqi na. Mqedil na we asi ka ini osa sgeru seediq uxe na nklaan. Mtswai rseno na we, asi ka dmayo qbsuran na. Ngalun na mqedil ka heya ma, spuun na mtaqi. 6Tgqbsuran laqi daha we, maha mtswai wada mhuqil ka ngayan na. Kiya de so uxe sresun peeyah ckceka Israel ka ngayan na. 7Nasi ini sruwa mangal mqedil mtswai na ka heya we, asi ka mosa rdrudan rhengun alang hiya ka mqedil mtswai na nii. Mprengo: ‘Mtswai rseno mu we, ini sruwa peeniq ckceka Israel hiya ka ngayan mtswai na. Ini sruwa dmayo mtswai na.’ 8Kiya de mplawa seediq kiya ka drudan alang. Mprengo heya. Nasi mkere rmengo: ‘Ini ku mkmangal mqedil kiya.’ 9Mqedil mtswai na we, mmaha berah seediq kiya ma, meniq berah doriq drudan mphgeluq ramil papak na ma, mturuq dqeras na, mpciyuk rmengo: ‘Kana ini sruwa pheyu tnsapah mtswai na we, mpkeso nii kana.’ 10Kiya de ‘Sapah nngalan ramil’ kesun ckceka Israel ka heya.”
Duma Gaya
11“Mtgdiyal ka 2 mtswai rseno, taxa mqedil daha mosa smdaling, eyux so pqduriq baga mpbeebu rseno na ka heya ma, betaq qmerac qyqeya rseno taxa de, 12asi su ka slapun ka baga na. Iya bale krwahi meniq doriq su.
13Iya psai tgparu ma tgbiciq mtumun sseengan ka toma lubuy su. 14Iya pniqi tgparu ma tgbiciq igipa ka sapah su. 15Asi ka dmoi su bale ba sseengan mtumun ma igipa. Kiya de mpqbsiyaq kndesan su meniq dxeral bnege Utux Tmninun, Utux Baro su. 16Ado trqilun Utux Tmninun, Utux Baro su ka kana seediq mnoda ini ksderux noda nii.”
Phuqil Seediq Amaleq
17“Klai bale, mlatac su peeyah Micrayim ciida, wada hmuwa mesa qnita na sunan ka seediq Amaleq. 18Mnccebu yamu meniq luelu. Muuwic ma mtqeran su ciida, mneyah smipaq dseediq mnuuwic ciida. Kiya uri we ini bale kiicu Utux Baro. 19Kiya de, Utux Tmninun, Utux Baro su we, ini su prrwai pais ssiyo su ma, tbleyaq su meniq dxeral bnege Utux Tmninun, Utux Baro su han we, asi su ka sresun peeyah bobo dxeral ka ngayan Amaleq. Iya bale chngii ka ooda nii.”
Currently Selected:
Mege Gaya 25: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
