Mege Gaya 24
24
Gaya Malix ma Mangal Mqedil Dungal
1“Nasi mnangal mqedil ma, rseno su na mqedil ma, slayan su ka noda ini pnlengu betaq su ini skxeli ka heya. Matis su patis aalix sbege su heya ma, platac heya peeyah sapah rseno. 2Mnlatac peeyah sapah rseno ka mqedil ma, wada sgeeru taxa. 3Nasi tmraqil heya ka tg2 rseno uri, matis patis aalix baga na ma, platac heya peeyah sapah rseno, uxe uri we wada mhuqil ka tg2 rseno mnangal heya. 4Kiya de rseno pnlaale pnlatac heya we asi ka ini angal bobo snrtiqan mqedil na dungal. Ado psaneq Utux Tmninun ka nii. Iya srtiqi ka dxeral bnege Utux Tmninun, Utux Baro su.”
Duma Gaya
5“Nasi mnangal mqedil we, asi ka ini osa mccebu. Iya skguli mosa meepah ani maanu uri. Heya we asi ka msange sapah, pqqaras mqedil nangal na.
6Iya sai pririh mege ka btunux glangan seediq ma, btunux glangan gaga baro na. Ado gisu su spririh mangal ka knuudus seediq.
7Nasi qtaan ka moda mekuy 1 mtswai ckceka Israel ka seediq ma, ngalan na tnqliyan mita, uxe uri we wada na sbaruy. Seediq bnekuy nii we asi ka phqilun. So kiya de pkngalun peeyah ckceka namu ka qnnaqah nii.
8Quri so mnarux msburo heyi we, asi namu ka qtaan bale. Puyu bale kana tnugesa msapuh tnsapah Lewiy. Wada ku huwa mesa tmnugesa de, so kiya muyu ka yamu uri. 9Klai bale, noda Utux Tmninun, Utux Baro su quri Miryam mneniq klgelu mnlatac Micrayim ciida.
10Ani maanu skbarux su ssiyo su we, iya bale osa mremux mangal pnririh qyqeya sapah na. 11Asi su ka mheyu nganguc. Tmara su madis qyqeya pririh ka seediq pnkbrexan su. 12Nasi mqraqil ka seediq kiya de, iya doi qyqeya pnririh na hmilo mtaqi. 13Gbiyan de sai mege heya ka pnririh na. So maha niqan lukus na mgbaro mtaqi ka heya. Kiya de mpsbleyaq sunan ka heya. Kiya ka kesun msderux noda meniq berah Utux Tmninun, Utux Baro su ka nii da.
14Nasi mqraqil ma qrinuc ka seediq snduwan namu, ani mtswai su ma, meniq lualang su, uxe uri we tnooda alang su we, iya bale tsyaxi. 15Biqi heya berah priyax hido ali ciida ka pila sntkean daha. Ado qrinuc ka heya ma, pila nii ka gaga na skuudus. Kiya de so namu na uxe sdurun Utux Tmninun ka isu de, niqan qnquwan noda su da.
16Ini phuqil tama ririh ndaan laqi. Ini phuqil laqi ririh tama. Qnquwan noda daha nanak ka sqhuqil.
17Iya bale qmnuuqu psgao msderux ka seediq tnooda ma lqlaqi uka tama ma bubu. Iya bale ngali ka lukus pnririh mqedil mqrinuc. 18Klai bale, tnqliyan su mneniq Micrayim ka isu. Dnoi baga sunan ka Utux Tmninun, Utux Baro su. Kiya ka dmurun ku sunan pyugi ka ooda nii.
19Qmburung su qnpahan ciida, nasi su chngiyan qnpahan hiya ka 1 bnkegan we iya sai mangal. Rngii seediq tnooda, lqlaqi uka tama ma bubu ma, mqedil mqrinuc. Kiya de mpbleyaq kana noda baga su ka Utux Tmninun, Utux Baro su. 20Ptuting namu heyi curung ciida, knrngiyan su bobo qhuni we, iya sbeti da. Rngii seediq tnooda, lqlaqi uka tama bubu ma, mqedil mqrinuc. 21Lmamu namu lipas ciida, mntuting na we iya lmui. Rngii seediq tnooda, lqlaqi uka tama bubu ma, mqedil mqrinuc. 22Klai bale, tnqliyan su mneniq dxeral Micrayim ka isu. Kiya ka dmurun ku sunan pyugi ka ooda nii.”
Currently Selected:
Mege Gaya 24: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
