Mege Gaya 23
23
Seediq Ini Tduwa Mremux Mrtaso Pnsliyan Seediq Uxe Prmuxi Pnsliyan Mrtaso
1“Ini psai tuumal pnsliyan Utux Tmninun ka dseediq wada mperuq balung, uxe duri we rseno wada gbgaxan.
2Ini psai tuumal pnssliyan Utux Tmninun ka laqi pnugguyan. Ani betaq 10 knxalan lqlaqi daha we ini psai tuumal pnssliyan Utux Tmninun.
3Ini tduwa tuumal pnsliyan Utux Tmninun ka seediq Amon ma Moab. Ani betaq 10 knxalan ini tduwa tuumal pnsliyan Utux Tmninun. 4Ado mnlatac namu peeyah Micrayim ciida, ini adis uqun ma qsiya meyah smterung elu ka dheya. Kiya uri we mnlawa seediq Petor peeyah Misputamiya ma, Bilam laqi Beor meeyah cmiyus isu. 5Kiya de ini qbahang Bilam ka Utux Tmninun, Utux Baro su. Utux Tmninun, Utux Baro su we, wada na spriyux smbleyaq ka sniyus. Ado gmaalu sunan ka Utux Tmninun, Utux Baro su. 6Kana kndusan su betaq ani knuwan we, iya bale pgsai ka ptbale ma qqbleyaq daha.
7Iya qnqihi ka seediq Edom. Ado mtswai su ka heya. Iya qnqihi ka seediq Micrayim. Ado tnooda meniq dxeral daha ka isu. 8Anak tuumal pnssliyan Utux Tmninun ka msn3 knxalan lqlaqi laqi daha.”
Psbgurah Heyi Meniq Supi
9“Mosa su mccebu pais ciida, asi su ka smtheya kana naqah noda.
10Nasi niqan rutiq cnriyu utaq mnsepi keeman ka seediq ckceka su we, asi su ka mosa bukuy kobu, iya remux kobu. 11Gbiyan de asi ka mangal qsiya trima heyi ka heya. Betaq priyax ka hido de, ani nak mremux kobu ka heya.
12Slmei kingal nniqan, ssaun su nganguc meniq su hiya. 13Qyqeya xiluy hiya we pniqi kingal labah. Bobo mnhedu su mosa nganguc de, kiya ka dooyun su kmari beling ma, htiun su mubung ka qntiyan su. 14Ado Utux Tmninun, Utux Baro su we gaga mkkesa ckceka kobu su ka heya. Mpdoi baga su ka heya ma, mbege pais su ka heya. So kiya de, asi ka bgurah ka kobu su, so uxe na qtaan ka snrtiqan su hiya de mlatac peeyah hiya ka heya.”
Duma Kari Pndakar
15“Qnduriq peeyah ssiyo tnpusu sapah betaq sunan hiya ka tnqliyan we, iya pbrnahi tnpusu sapah na dungal. 16Psrwai ptheyaq meniq isu hiya ka heya. Pgeegi nanak alang namu kuxul na saan meniq. Iya trqili ka heya.
17Iya osa mqedil kbrexun sapah thmkuwan utux ka weewa Israel. Rseno Israel we iya osa rseno kbrexun sapah thmkuwan utux uri. 18Iya ngali ka pila sntkean mqedil ma rseno kbrexan nii. Iya bale desi mege sndhegan daha sapah thmkuwan Utux Tmninun, Utux Baro su ka kiya. Ado bsaniq meniq Utux Tmninun, Utux Baro su ka daha nii.
19Pnkbrexan su pila ka mtswai su, ani pila ma ani uqun, ani maanu mnrana pnkbrexan we, iya bale prnai mesa. 20Knbrexan su seediq icil we, ani su nak prnaun mesa. Kiya de we, pnkbrexan su mtswai su we, iya bale prnai mesa. So maha smbleyaq sunan ka Utux Tmninun, Utux Baro su meniq su dxeral ngngalun su ma, kana qnpahan baga su.
21Smdehu su quri Utux Tmninun, Utux Baro su we, iya bale ali mlgila moda ka sndhegan su. Ado mpesa sunan ka Utux Tmninun, Utux Baro su. Kiya de maha su niqan qnquwan noda di. 22Nasi su ini sdehu we, uka qnquwan noda kiya. 23Rnengo quwaq su, pnooda ba quwaq su rmengo we, asi su ka tleus bale muyu peeyah lhebun su mquri Utux Tmninun, Utux Baro su.
24Mremux su qnpahan lipas ssiyo su we, ani su nak mmhemuc mekan ma betaq mtengi. Kiya de iya labu bruru. 25Mremux su qnpahan mugi ssiyo su we, ani su nak kmetuy mugi. Kiya de iya angal qburung qmburung.”
Currently Selected:
Mege Gaya 23: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
