Mege Gaya 22
22
1“Nasi namu qmita dapa uxe we miric mtswai namu mgedang elu we, iya qduriq. Asi namu ka tlusun mege mtswai namu. 2Nasi smtheyaq isu ka ga niqan mtswai su, uxe uri we seediq ini su klai ka heya we, asi su ka tlusun sapah su ma, pniqun su hiya. Meyah migin ka mtswai su de bqani heya dhenu. 3Wada pgedang ani dapa roba, lukus ma, kana qyqeya ka mtswai su we, nasi su slayan, asi su ka so nii moda. Iya bale qduriq. 4Nasi su qtaan gisu mtakur ckceka elu ka dapa ma dapa roba mtswai su de, iya bale qduriq. Asi su ka dyagun pstutuy ka dapa ma dapa roba.
5Quri mqedil we, iya plukus lukus plkusan rseno. Rseno uri we iya plukus lukus mqedil. Ado psaneq meniq Utux Tmninun, Utux Baro su ka nii.
6Nasi su mkleelu ciida qmita su rudu qbheni de, ani gaga bobo qhuni ma meniq dxeral. Rudu na hiya ge, nasi niqan wawa qbheni uxe duri we balung na ma, gaga kmlawa bobo wawa qbheni ma balung hiya ka bubu qbheni de, iya asi desi kana ka bubu ma wawa qbheni. 7Asi su ka plaxun ka bubu na ma, wano wawa qbheni ka angal. So kiya de maangal su qnbleqan ka isu. Ali kndesan su we maha bsiyaq uri.
8Nasi su pheyu sapah bgurah. Mksmalu su qnalang bobo dnamux. Kiya ka uxe mpeeyah dnamux mtuting ka seediq. Maha sapah su ka dara na da.
9Iya rhepi uxe rehak lipas ka qnpahan lipas namu. So uxe maha mprtaso ka heyi rnehak namu ma qnpahan lipas. 10Iya ptdhai ptabul ka dapa ma dapa roba. 11Iya plukus ka tninun ware ubal miric ma ware malu nuqah.
12Psai pndeping ka 4 muxi palic lukus plkusun tgbaro.”
Kari Pndakar Knweewa
13“Bobo mnangal mqedil ma, mnsuupu heya mntaqi di ma trqilun na ka heya, 14kiya de mmhemuc su smmalu qnsiqa noda heya ma, psaun su heyi na ka ngayan qnnaqah, rmengo su: ‘Mnangal ku mqedil nii, thiqan mu mtaqi ma, mqedil nii we tena uxe nweewa bale ka heya.’ 15Kiya de tama bubu mqedil nii we, asi ka madis pnskraya knugweewa mqedil nii, mosa rdrudan gaga rhengun alang hiya. 16Mprengo rdrudan ka tama bubu mqedil nii: ‘Wada mu pstrengun seediq nii ka weewa mu, kiya de tmraqil heya ka heya. 17Qtai! Bnrahan na ka noda qnsiqa nii. Rmengo ka heya: Uka ka knugweewa na weewa su. Kiya de we, nii ka pgkela knugweewa weewa mu.’ Kiya de, tama bubu na we asi na sptuura berah rdrudan rhengun alang hiya ka lukus. 18Rdrudan alang hiya we, mkqmerac ma mkpkdira heya ka dheya. 19Ppkdraun daha mesa 1'00 ging mege tama bubu mqedil kiya. Ado wada mege naqah ngayan bobo weewa seediq Israel ka heya. Nasi mqedil na ka mqedil nii we, seediq kiya we, ani betaq knuwan uxe na lixun ka mqedil nii. 20Kiya de, nasi bale ba ka nii ma, uka ka pnskraya knugweewa na ka mqedil nii de, 21asi ka desun daha rhengun sapah tama bubu na ka mqedil nii. Dseediq alang hiya we, asi ka phqilun daha btunux. Ado wada mmhemuc msuupu seediq meniq sapah tama bubu na ka heya ma, wada moda noda qnsiqa ckceka Israel ka heya di. So kiya de, pkngalun su peeyah ckceka su ka qnnaqah nii.
22Nasi slayan nii mmhemuc msuupu rseno niqan mqedil ka mqedil we, asi su pspuun phuqil ka rseno ma mqedil mnhemuc. So kiya de pkngalun su ka qnnaqah peeyah ckceka Israel.
23Nasi weewa uxe mnsterung ma, wada smdehu bege rseno ka heya. Niqan ka rseno qmita heya ma, wada na spuun mtaqi ka heya de, 24asi ka desun namu rhengun alang hiya ka 2 heyi nii. Mdoi namu btunux phuqil dheya. Weewa nii we, ririh ini plawa meniq ckceka alang ka heya. Quri so rseno we, ririh wada smrutiq mqedil ssiyo na ka heya. So kiya de, wada su pkngalun ka qnnaqah ckceka namu.
25Nasi smterung weewa tena wada smdehu bbege seediq meniq bsuring ka rseno. Qrapun na ka heya ma, thiqan na mtaqi. So kiya de wano rseno mntheyaq mtaqi mqedil nii ka phuqil. 26Iya bale phqili ka weewa nii. Uka qnquwan na pphqilun ka heya. Noda nii we, mntena so meyah kmremux sapah ssiyo ka seediq ma wada phuqil seediq ka nii. 27Ado qnita bsuring ka mqedil mnoda psdehu nii. Ani asi plawa ka mqedil nii we, uka ka seediq mdoi baga heya.
28Nasi smterung weewa ini psterung na, qrapun na ma, thiqan na mtaqi. Klaun seediq de, 29asi ka mege 50 ging tama weewa nii ka rseno nii. Kiya uri we asi ka ngalun na mqedil ma, uxe na lixun betaq ani knuwan. Ado tnsyaxan na ka weewa nii.
30Iya ngali mqedil ka ririh bubu su. Iya mmhemuc rmaguh lukus toma tama su.”
Currently Selected:
Mege Gaya 22: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
