Mege Gaya 20
20
Gaya Mccebu
1“Mmaha su mccebu pais su ciida, nasi su qmita hbaro ba ka dmay, rulu mccebu ma, dsupi we, iya kcugi ka dheya. Ado mptheyaq isu ka Utux Tmninun, Utux Baro su dmnudul isu mnlatac peeyah dxeral Micrayim. 2Mmaha namu mccebu ciida, meeyah ka msapuh, mprengo quri dsupi. 3Mprengo dheya: ‘Seediq Israel! Qbahang! Mpccebu namu dpais ka ali saya. Iya kiicu ma, iya pkrkerang ka lhebun. Iya kngungu ma iya pkrkerang berah daha. 4Ado mptheyaq yamu ka Utux Tmninun, Utux Baro namu. Heya ka mpririh yamu mccebu ma, mdoi baga yamu.’ 5Mpquri dsupi mprengo dheya ka dqbsuran: ‘Ima namu ka pnheyu sapah bgurah ma ini oda mege qnaras we, ani nak mbrinah sapah ka heya. Nasi mhuqil ka heya de, seediq icil ka mbege qnaras. 6Ima ka mnhuma lipas ma ini angal gnhei na we, ani nak mbrinah sapah ka heya. Nasi mhuqil ka heya de, seediq icil ka maha mangal dhenu. 7Ima ka hmiti smdehu mpsterung ini psterung na we, ani nak mbrinah sapah ka heya. Nasi mhuqil ka heya de, seediq icil ka maha mangal dhenu.’ 8Mprengo quri dsupi dungal ka dqbsuran: ‘Ima ka gaga miicu, ima ka gaga pkrkerang we, ani nak mbrinah sapah. Maha mntena lhebun na muuwic ka lhebun mtswai na.’ 9Mnhedu rmengo dsupi ka dqbsuran de, mpdudul supi mmaha mccebu da.
10Betaq namu 1 alang, berah mppccebu su ciida we, asi su ka smepu kari mptbale. 11Nasi smruwa cmiyuk ptbale ka alang kiya ma, rmaguh rhengun. Kiya de kana dseediq ckceka alang hiya we asi ka mbqerus qmeepah ma, dmayo yamu. 12Nasi ini sruwa ptbale ka alang kiya ma, kmpccebu yamu ka dheya we, tlbui ka alang kiya. 13Utux Tmninun, Utux Baro su we, sbege na baga su ka ckceka alang hiya. 14Quri so mqedil, lqlaqi, tnbugan ma, kana qyqeya we, ani namu nak glekun maangal kana. Gnlekan namu pneeyah supi we, kiya ka bnege Utux Tmninun, Utux Baro su kiya. Kiya de ani namu nak ngalun. 15Lualang mstheya yamu we, kiya ka lualang uxe quri qlhangan nii we, asi namu ka pntena so nii moda. 16Kiya de, lualang dseediq nii we, kiya ka bnege na yamu ka Utux Tmninun, Utux Baro su. Kana niqan knuudus ckceka hiya we, iya bale pkdusi. 17Pyugi rnengo Utux Tmninun, Utux Baro su, qhdei phuqil kana ka seediq Xet, Amori, Kenaan, Perijiy, Xiwiy ma Yebus. 18So uxe mptgesa yamu moda ooda psaneq. Kiya ka thmuku utux daha de, maha niqan qnquwan noda namu Utux Tmninun, Utux Baro namu.
19Nasi asi ka bsiyaq ngngalun namu ka 1 alang de, iya bale sgliqi puru ka qhuni. Ani namu nak puqun heyi qhuni ma, iya bale ceexi ka qhuni. Uxe seediq ka qhuni gaga qnpahan, ma su saun kmremux da ho? 20Wano qhuni ini uqi heyi na ka brxani smeqic. Qhuni sneqic su ani su ngalun qyqeya mccebu quri alang mspais yamu, betaq namu ngalun ka alang kiya.”
Currently Selected:
Mege Gaya 20: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
