Mege Gaya 19
19
Pheyu Alang Qdriqan
(Spe 35:9-28. Yeh 20:1-9)
1“Pkuuka dqnlhangan ka Utux Tmninun, Utux Baro su ma, wada mhedu mege isu ka dxeral daha ka Utux Tmninun, Utux Baro su. Kiya ma wada su lwaqun ka dheya ma, meniq namu lualang ma sapah daha. 2Ciida, asi namu ka pheyu 3 alang quri yamu meniq dxeral bnege Utux Tmninun, Utux Baro su hiya. 3Mpsramal su elu. Psnakun su 3 nniqan ka dxeral nangal namu pneeyah Utux Tmninun, Utux Baro su. So maha qduriq hiya ka dseediq qnuuqu phuqil seediq.
4Pkdusun ka dseediq qnuuqu phuqil seediq we so nii: Kana dseediq uxe na nseengan peeyah qnquwan na phuqil ka seediq ssiyo. 5Mntena so dseediq mnsuupu siyo na mosa smeqic qhuni nrao ciida, qmseqic qhuni nrao ka heya ma, tkaangal peeyah riduy ka tunux puru ma dehuk heyi dseediq ssiyo na betaq wada mhuqil. Seediq so nii we ani nak qduriq mosa lualang kiya, kiya de mpkuudus ka heya. 6Nhuwa msqama seang na ka mciyuk pnhqilan de, maha smdurak seediq smnipaq. Nasi theya ka elu ma, sdrapan na ka heya de, maha daha phqilun da. Bale ba we, naka ini phqili ka heya. Ado uka qnrqilan na daha seediq wada phqilun ka heya. 7So kiya de mprengo ku isu, asi su ka pheyu 3 alang. 8Nasi muyu sntangan na pusu rudan su prana dxeral qlhangan su ka Utux Tmninun, Utux Baro su ma, mege dxeral sndhegan na pusu rudan su ka heya ma, 9nasi su tleus bale muyu kana gaya pndakar rnengo mu ali saya ma, gmaalu su Utux Tmninun, Utux Baro su ma, muyu su elu na klaali de, asi su ka prana 3 alang bobo 3 alang nii. 10Kiya de so uxe meeniq ckceka dxeral bnege Utux Tmninun, Utux Baro su ka dara dseediq pnhuqil uka qnnaqah. Maha heyi su ka dara nii da.
11Nasi qmnriqu seediq ssiyo na, sqburang na tmara ma, betaq smipaq heya ma phuqil heya, kiya de qduriq quri 1 alang nii ciida. 12So kiya de, ddrudan alang hiya we asi ka smkagul seediq, madis heya peeyah hiya ma, sbege na baga mpkciyuk phuqil ma phqilun na ka heya. 13Iya glaani ka doriq su ka heya. Asi ka pkngalun namu peeyah ckceka seediq Israel ka qnquwan noda psdara uka qnquwan. Kiya ka mpbleyaq namu.
Ayus Dxeral
14Dxeral dnoi ma nangal su bnege Utux Tmninun, Utux Baro su hiya we, iya bale kmhemuc hmeruy ayus dxeral ssiyo su. Ado nii ge pnaayus rudan cuuxal.”
Gaya Seediq Mpgkela
15“Ani maanu qnquwan noda ma, qnnaqah noda namu we, iya bale pooda pnugkela 1 ba seediq. Asi ka mooda 2 ma 3 seediq pnugkela quwaq ka tduwa ta phyegun. 16Nasi niqan qnnaqah lhebun seediq, mtutuy pgkela ma, mege kari wada qnuuqu ka dseediq de, 17asi ka mosa mheyu berah Utux Tmninun, msapuh ma, qbsuran mpsgao ka daha seediq mpprengo nii. 18Asi ka tleus bale smiling ka qbsuran mpsgao. Qtai! Uxe bale ba ka pngkeela na, gisu smeeliq mtswai ka mberiq pngkeela na. 19Pntnai so qnita na mtswai kesa moda heya ka yamu uri. So kiya de, maha pkngalun peeyah ckceka su ka qnquwan noda. 20Mpkiicu ka seediq mnbahang ma, uxe mpnpusal moda so qnnaqah noda nii ka dheya. 21Iya glaani ckceka doriq su. Asi ka knuudus ka mpririh knuudus. Asi ka doriq ka mpririh doriq. Asi ka rupun ka mpririh rupun. Asi ka baga ka mpririh baga ma, asi ka papak ka mpririh papak.”
Currently Selected:
Mege Gaya 19: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
