Mege Gaya 18
18
Ngngalun Msapuh ma Seediq Lewiy
1“Meniq ckceka Israel we, uka pnaasu daha dxeral ka msapuh tnsapah Lewiy ma, kana pnswayan pusu rudan Lewiy. Dheya we tduwa mekan snapuh puniq Utux Tmninun ka dheya. Kiya ka dnoi daha. 2Uka pusu dxeral ckceka mtswai na. Utux Tmninun ka pusu dnoi daha. Mntena so sntangan na heya ka Utux Tmninun. 3Ngngalun msapuh peeyah ckceka seediq we so nii, kana snapuh daha dapa ma miric we: Asi ka sbege msapuh ka 2 heyi baga, bkeluy ma rkebul. 4Biqi heya uri ka pnlaale mghei uqun, bgurah sino, bgurah abura ma, ubal miric bgurah ntapan. 5Ado gnao Utux Tmninun, Utux Baro su ka pneeyah ckceka pnswayan pusu rudan namu ka heya. Heya ma lqlaqi laqi na we, mpooda ngayan Utux Tmninun pheyu ma mqeepah.
6Nasi mlatac peeyah lualang ani inu Israel gaga na niqan ka seediq Lewiy we, mkmosa nniqan gnao Utux Tmninun hiya de, 7asi ka spooda na ngayan Utux Tmninun, Utux Baro na qmeepah meniq hiya. Mntena so mtswai na seediq Lewiy mheyu berah Utux Tmninun. 8Nheya ka nangal na bnaruy dnoi pusu rudan na. Dheya we pntnai ngngalun snpuhan ka dheya.”
Pdakar Gaya Snhiyan Pneeyah Icil
9“Dehuk su dxeral bnege Utux Tmninun, Utux Baro su de, iya bale sluhe ooda psaneq dqnlhangan hiya. 10Iya pniqi yamu ka smapuh psqama laqi, mpsbunul, mqita pngerah, mhuni, msiyus, 11bunul cmiyus, mlawa utux mnhuqil, smapuh mnhuni ma, smiling seediq mnhuqil. 12Kana ooda nii we qnbsaniq Utux Tmninun ka nii. Ado ooda psaneq ka nii. Mpliwaq dheya peeyah berah namu ka Utux Tmninun, Utux Baro su. 13Asi su ka mseediq mttuuku bale mquri Utux Tmninun, Utux Baro su ka isu. 14Dqnhlangan llwaqun su kiya we mbahang qnita daha pngerah, mpsbunul ka dheya. Kiya de ini sruwa moda nii ka Utux Tmninun, Utux Baro su.”
Ptutuy Mpgeela Kari Mntena Moseh
15“Mptutuy 1 mpgeela kari peeyah mtswai su mntena yaku ka Utux Tmninun, Utux Baro su. Asi namu ka mbahang heya. 16Mntena so mnsseli su dgiyaq Xoreb ali ciida, kana dnurun namu Utux Tmninun, Utux Baro su: ‘Braho su bale iya nami pqbhangi hrenang Utux Tmninun, Utux Baro mu. Iya nami pqtai puniq paru kiya, mphuqil namu da.’ 17Rmengo kenan ka Utux Tmninun: ‘Bale ba ka rnengo na. 18Mptutuy ku 1 mpgeela kari mntena isu peeyah ckceka mtswai daha. Psaun mu quwaq na ka kari rrengo mu. Heya we maha rmengo kana rnengo mu. 19Ima ka ini qbahang kari pnoda ngayan mu we, maha heya ka ggimun mu. 20Nasi niqan ka mhemuc pooda ngayan mu rmengo kari uxe rnengo mu, uxe uri we spooda na ngayan utux icil rmengo kari de, asi ka phqilun ka mpgeela kari kiya.’ 21Nasi smiling ka lhebun su: ‘Huwa ta kesun mkela rnengo Utux Tmninun ka kari kiya di ha?’ 22Pooda ngayan mu rmengo ka mpgeela kari we, nasi ini dehuk ma uxe pbale ba kari na de, kari na we uxe rnengo Utux Tmninun kiya. Knhmetan rmengo mpgeela kari ka kiya. Iya kcugi ka heya.”
Currently Selected:
Mege Gaya 18: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
