Mege Gaya 14
14
Ptgaya Ooda Mbasi
1“Lqlaqi namu Utux Tmninun, Utux Baro namu ka yamu. Mnbasi namu mnhuqil seediq we, iya hbaluc heyi namu ma iya kugus ubal kduruk namu. 2Ado Nseediq su Utux Baro ka isu. Gnao su Utux Tmninun peeyah kana seediq bobo dxeral ka isu ma, ngalan namu na seediq knmalu na.”
Uuqun Uka Rutiq ma Mrutiq
(Lew 11:1-21)
3“Kana psaniq uqun we iya ba uqi. 4Camac mtduwa namu uqun we dapa, miric rudu, miric, 5rqenux, rqenux rabang, wawa rqenux, miric lmiqu, pada biciq, pada paru, miric rudu lmiqu. 6Kana gaga mswaye ka kukuh ma knberih msekan nekan ka camac we, tduwa namu uqun. 7Kiya de ckceka camac msccilaq kukuh papak ma knberih mekan hiya we nii ka ini uqi: Dapa bukung, qolic weewe, rqebux. Ani knberih msekan nekan ma ini pswaye ka kukuh daha. Rutiq quri yamu ka nii. 8Babuy we, ani gaga mswaye ka kukuh na ma ini knberih mekan nekan na ka kiya. Heyi daha we iya bale uqi. Heyi hnhqilan daha we iya bale tlengi.
9Maha malu uqun ga meniq ckceka qsiya na we, kiya ka kana niqan palic ma kukuh heyi daha. 10Kana uka palic ma uka kukuh heyi qcurux we, rutiq quri yamu kiya.
11Kana qbheni uka rutiq we tduwa namu nak uqun. 12Iya uqi ka qdiro bhege, qdiro bbuyu, rulu, 13mamung, rehaq qbulic, lmlamu rhrehaq yoyo, 14rhrehaq biciq, 15rehak trange, rehak meekan bgihur, tktekung, ttyakung, 16rodux wili, tuqaq, kwirax, 17pupuk, tekung, tonun, 18tdoruy ma tdoruy paru, ttpaqa, ma pplawe. 19Kana niqan palic ma mkkarang msseli na we, rutiq quri yamu kiya. Kiya de iya bale uqi. 20Kana uka rutiq qbheni we, ani namu nak uqun kana.
21Kana camac mnhuqil we iya uqi. Ani namu nak biqun dseediq tnooda lualang namu, uxe uri we brigi seediq icil. Ado dseediq nuUtux Tmninun, Utux Baro su ka isu.
Iya hngedi beyuq nunuh bubu miric ka heyi wawa miric.”
Gaya Bbiqun 1 Tnugmxalan
22“Knkingal knkawas, ngali 1 tnugmxalan kana tnkuyan su ma, kana pneeyah dxeral su. 23Osa gneegan Utux Tmninun, Utux Baro su berah na mekan snapuh 1 tnugmxalan uqun, sino bgurah, abura bgurah, ddapa ma mmiric pnlaale pntwawa. Kiya ka slhayun namu miicu Utux Tmninun, Utux Baro su klaali ka nii. 24Smbleyaq yamu ciida ka Utux Tmninun, Utux Baro, kiya de theya riyung ma theya kksaan ka gnao nniqan Utux Tmninun, Utux Baro su ma, betaq uka namu kklaun madis hiya ka kana uqun de, 25tduwa namu nak pryuxun pila. Lbui ka pila peeniq baga su mquri nniqan Utux Tmninun, Utux Baro su hiya. 26Meniq su hiya de, pooda lnglungan su nanak maruy dapa ma miric, uxe uri we maruy su sino ma sino mbeyax ma, kana kmbrigun su. Isu ma kana tnsapah su we, qqaras meniq berah Utux Tmninun, Utux Baro su.
27Dseediq Lewiy gaga meniq lualang su we, iya bale lixi. Ado uka nangal daha dxeral meniq ckceka namu ka dheya. 28Qnhdean tnugtruwan knkawas we angal peeyah knkawas kiya ka 1 tnugmxalan namu ma, psseli meniq lualang namu. 29Kiya de ani nak meyah berah namu ka seediq Lewiy ini pntena yamu mnangal dxeral ma, seediq tnooda lualang namu, lqlaqi uka tama ma bubu ma, mqedil mqrinuc we, ani nak mekan ma mtntengi. Kiya ka maha smbleyaq kana qneepah baga su ka Utux Tmninun, Utux Baro su.”
Currently Selected:
Mege Gaya 14: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
