Daniyel 9
9
Dmurun Ddseediq na Nanak ka Daniyel
1Daryawes laqi Axasreros seediq Maday ka mqbsuran paru Babirun ma Krdiya. 2Kiya ka tgkingal knkawas qlhangan na ciida, yaku, Daniyel we mkela ku pneeyah patis, meeyah Yirmeyah mpgeela kari ka kari Utux Tmninun, rmnengo quri mttuku knkawas nlaxan Yerusalem we 70 knkawas.
3Kiya de mquri ku Utux Baro, mnseung ku ini ekan, mbeyax ku dmurun Utux Baro. 4Dmurun ku ma, ptuura ku qnquwan noda mu Utux Tmninun, Utux Baro mu, rmengo ku: “Bukung mu! Isu ge, Utux Baro paru ba kcugun. Isu we mnduwa su mooda sndhegan su ma ini su kmpryuxi betaq ani knuwan ka gnaalu su quri seediq gmaalu sunan ma mnduwa muyu gaya pndakar su uri. 5Mnoda miyan mnaqah ma niqan qnquwan noda miyan, tbrinah qneepah miyan naqah, mlatac miyan peeyah gaya pndakar ma gaya bneku su. 6Ini nami qbahang kari dmpgeela kari tnqliyan su, pnooda na ngayan su rnengo na quri qbsuran paru, dqbsuran mdudul, rdrudan miyan ma, kana seediq gaga dxeral nii. 7Utux Baro! Msderux noda su ka isu, kiya ka kiya yami seediq Yehudah ma Yerusalem ma, dseediq Israel wada su lwaqun dqlhangan icil we, ririh tnbrinah miyan, gisu miyan ini psetuq pqsiqa ka dqeras miyan mntena so ali saya. 8Utux Tmninun! Wada miyan qnquwan noda miyan, dqbsuran paru, dqbsuran mdudul ma, rdrudan miyan. Kiya ka betaq niqan qnsiqa ka dqeras miyan. 9Bukung, Utux Baro miyan, niqan huwe gmaalu seediq ka heya, kiya we tbrinah miyan isu ka yami. 10Ini nami qbahang kari Utux Tmninun, Utux Baro miyan ma, ini miyan puru gaya pnooda su tnqliyan su dmpgeela kari su bnege su kenan. 11Bale ba kana seediq Israel we wada tbrinah ma qmada gaya su ma ini thei kari su. Kiya de cmiyus ma sndhegan gaga spatis gaya Moseh tnqliyan su we nii dehuk menan. Ado wada miyan pqnnaqah Utux Baro. 12Utux Baro we pdaan na yami ka mqraqil, kiya ka pbale ba kari pndakar na ma pnsgao na menan. Sntrengan pnkdira Yerusalem we, uxe bale mnoda so nii ka bobo dxeral. 13Nii su pdhekun menan ka kana ppkdira we, pnuyu su gaga spatis gaya Moseh. Kiya de ini nami durun huwe Utux Tmninun, Utux Baro nami, ini latac peeyah qnquwan noda miyan ma, mkela bale ba kari su. 14Kiya de Utux Tmninun, Utux Baro nami, kana noda su we ida msderux. Ini nami qbahang kari su ka yami. 15Bukung, Utux Baro miyan! Mnoda paru beyax baga su dnudul su seediq su peeyah Micrayim ma, so nii mntena saya niqan ka ngayan su. Saya, wada miyan niqan qnquwan noda, qneepah miyan naqah noda. 16Bukung! Braho su pdai mttuku ba knsderux su, platac peeyah alang Yerusalem, kiya ka dgiyaq mrtaso su ka seang ma knseang su. Ado qnquwan noda miyan ma qnquwan noda rdrudan miyan, gisu phlisun seediq ssiyo ka Yerusalem ma dseediq su. 17Utux Baro nami! Braho su saya, bhangi ka dnurun tnqliyan su. Ririh so isu nanak pldaxi pquri sapah thmkuwan nlaxan ka dqeras su. 18Utux Baro nami! Braho su peeyah birac su mbahang, qtai ba doriq su, qlhangi ba ka dxeral nami wada laxan ma, lualang miyan pnooda ngayan su. Gisu miyan dmurun ba berah su we, uxe mpeeyah knsderux miyan, ida mpeeyah knttuku gnaalu su. 19Bukung! Braho su bhangi miyan! Bukung! Braho su srwai miyan heya! Bukung! Peeyah ka birac su, braho su ba dai ka nii! Ririh isu nanak iya bale tggila. Utux Baro miyan! Ado pnoda ngayan su ka alang nii ma dseediq nii.”
Pgkela Kari Pgeela ka Gabriel
20Gisu ku rmengo, dmurun, pgkela qnquwan noda mu ma, qnquwan noda Israel dseediq mu ma, dgiyaq Utux Baro miyan, dmurun ku bale berah Utux Tmninun, Utux Baro mu. 21Gisu ku dmurun ciida, Gabriel, kiya ka qntaan mu so tuutux plaale ciida, asi nhari meyah kenan, ciida we spuhan mege gbiyan. 22Kiya de psleexan ba rmengo kenan ka heya: “Daniyel! Meyah ku mege knkela ma gnkela sunan. 23Prading su dmurun ciida, tena cmiyuk sunan ka heya. Saya, mprengo ku sunan, ado gisu su mangal gnaalu ka isu. Kiya de lnglungi bale ka noda nii, klai bale ka so tuutux nii.
24Ririh seediq su ma alang su nii, tena su bneku ka mn7 ka 70 knkawas, mooda hmetur qnquwan noda, smino qnquwan noda, sbrahun maruy kana ka qnquwan noda. Meeyah ka msderux ani knuwan, mooda mubung so tuutux ma kari plaale ma, mooda rmicuh abura sapah thmkuwan. 25Klai bale, peeyah pnosa kari, sbrahun su pheyu ka Yerusalem, betaq meeyah ka qbsuran paru hnrigan abura we, asi ka mn7 ka 7 ma, mn62 ka 7 knkawas. Yerusalem we sbrahun pheyu dungal meeniq mqraqil hiya ka lualang Yerusalem. 26Bobo hmrinas ka mn62 ka 7 knkawas de, phqilun ka hnrigan abura, mpkuuka ani manu. Meeyah ka 1 qbsuran paru dseediq, mooda smeeliq alang nii ma sapah thmkuwan nii. Mntena so ndaan smino rnecux ka qnhdean na. Ida maha niqan ka mccebu betaq nexal, noda so nlaxan we, ida mpniqan uri. 277 knkawas ciida, mooda mssdehu hbaro seediq ka heya. Dmeka 7 knkawas de, mooda hmetur snapuh ma snapuh bbege ka heya. Qyqeya qnrquun ba mnoda smeeliq we, ida mpheyu ckceka sapah thmkuwan hiya, asi ka betaq mooda heyi smeeliq ka bneku qnhdean.”
Currently Selected:
Daniyel 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
