Daniyel 10
10
Qntaan so Utux Ssiyo Yayung Xideqel
1Tg3 knkawas mqbsuran paru Paras ka Kores ciida, meyah ka kari rmengo Daniyel kesun Beltesacar. Bale ba ka kari nii, gisu rmengo quri paru mccebu. Mkela kari nii ka Daniyel ma, klaun na ka so tuutux nii uri.
2Ciida, yaku Daniyel we mn3 ka 7 ali naqah ba kuxul. 3Ini ku ba ekan malu uqun, ani sino ma heyi we ini ba remux quwaq mu. Ini ku ricuh abura heyi uri, betaq mttuku ka ali mn3 ka 7.
4Pkelu 24 ali 1 idas, mheyu ku ssiyo yayung Paru, kiya ka yayung Xideqel. 5Qmita ku karac baro, qtai! Niqan ka 1 seediq mlukus tninun nuqah malu ma, hmabik habik snmalu king Upaj. 6Heyi na we mntena so btunux mkere brigan lmedax ma, so wilaq lmedax ka dqeras na. Mntena so puniq srana ka doriq na ma, so limuk lnpaxan tqwilaq ka baga ma papak na. So pnlawa hbaro seediq ka hrenang kari na. 7Yaku, Daniyel nanak ka qmnita so tuutux nii, ini qita ka dseediq mnsuupu kenan. Kiya de niqan ka paru ba kniicu meeyah heyi daha, kiya de asi qduriq Lmeing ka dheya. 8Wano ba yaku nanak ka msrangi hiya. Betaq ku ini kbeyax heyi mu qmnita so paru tuutux nii. So pala ka dqeras ma uka ba beyax mu. 9Mbahang ku hrenang kari na de, asi ku kchungi mtaqi ma tgtemaq dxeral ka dqeras mu.
10Qtai! Niqan 1 baga ka gaga tmelung kenan ma, betaq pkrkerang ka pungu ma qapal baga mu. 11Rmengo kenan ka heya: “Daniyel mnangal gnaalu! Lnglungi ba ka kari rnengo mu sunan. Tutui nhari, ado nii ku skgulan sunan hini saya.” Rmnengo kari so nii ka heya, kiya de pkrkerang ku mheyu ka yaku. 12Rmengo ka heya: “Daniyel! Iya kiicu! Ado asi su ka klaun peeyah su tgkingal ali ciida, mbqerus su isu nanak berah Utux Baro ma, wada srwaun ka dnurun su. Nii ka seeyah mu cmiyuk pgkela dnurun su. 13Kiya de qbsuran mdudul qlhangan Paras ge, meeyah hmetur 21 ali kenan. Qtai! Meeyah dmayo yaku ka Mikael qbsuran snkgulan baro. 14Yahan mu we pgklaun misu ka ooda mmeyah seediq su. Ado quri ali ooda mmeyah ka tuutux nii.” 15Rmengo kenan so nii ciida we, tgtemaq ku mquri dxeral ma mgmelux ku. 16Qtai! Niqan ka mntena so seediq, gisu tmelung pdahung mu, kiya ka rmaguh rmengo ka quwaq mu, rmengo gaga mheyu berah mu: “Bukung mu! Pknarux ba kenan ma, betaq ku uka beyax ka so tuutux nii. 17Tnqliyan tnpusu sapah mu we, ma tduwa mpprengo Bukung mu ho? Betaq ku so uka beyax ma, uka ka eyah hengak mu uri.”
18Niqan ka so mntena seediq, gisu tmelung yaku dungal, kiya ka niqan ka beyax mu da. 19Rmengo ka heya: “Seediq gisu maangal gnaalu! Iya kiicu. Tai so mbleyaq su! Knbeyax ka isu! Knbeyax!” Mnhedu rmengo ka heya de krinah ku mbeyax da. Rngagan mu: “Bukung mu, rengo kenan, ado isu ka pkbeyax kenan.” 20Rmengo ka heya: “Klaun su maanu ka seeyah mu hini ho? Mosa ku brinah mccebu dqbsuran mdudul Paras. Bobo mosa ku mccebu de, qtai! Ida meeyah ka dqbsuran mdudul Hellenis. 21Kiya de we, asi mu ka srengo sunan ka kari pnatis patis bale ba hiya. Wano ba Mikael snkgulan baro namu ka mtduwa dmayo yamu hmetur dheya.”
Currently Selected:
Daniyel 10: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
