Daniyel 8
8
Utux Baus Miric Rudu ma Baus Miric
1Tg3 knkawas mqbsuran paru ka Belsacar ciida, meyah mtqita kenan, Daniyel ka tuutux. Tgbukuy qnita mu tuutux tgberah. 2Ntaan mu so tuutux we, asi mu tai nii meeniq alang Susan kesun qlhangan Eylam. Qtaan mu ga ku mhiyu ssiyo yayung Ulay uri meeniq tuutux. 3Qmita ku, qtai! Niqan 1 baus miric gisu mheyu ssiyo yayung. Niqan 2 urung na, bbaro ba ma, mgkala 1 ka urung. Mgkala tgberah ka tgbukuy na. 4Qtaan mu ka baus miric rudu nii ge, murung quri nklaan hido, pryaxan hido, tgdaya, tgtruma ma uka camac ka mtduwa mheyu berah na ma, uka ka mtduwa qduriq peeyah baga na uri. Mmhemuc pooda lnglungan na ma, psparu bale.
5Lmngelung ku ciida, qtai! Niqan ka 1 baus miric mgkala pneeyah pryaxan hido, mkkesa kana ddxeral ma ini qleqah dxeral ka papak na. Cenga 2 doriq miric nii we, niqan 1 urung leexan ba qtaan. 6Kiya de baus miric nii we tsseang ba mosa murung quri baus miric rudu qntaan mu gaga mheyu ssiyo yayung. 7Qtaan mu we asi na rungi ka miric rudu, mseang ma murung heya ma betaq wada gremun ka 2 urung na. Uka beyax na mheyu berah baus miric ka baus miric rudu. Stgtemaq na murung dxeral ka baus miric rudu ma qahan na papak na. Uka ka dmayo miric rudu platac peeyah baus miric nii. 8Baus miric nii we paru bale, gisu mkkere ba ciida, asi kgerung ka paru urung na. Peeyah toma urung nii we hmeru 4 urung truura ba mqquri ini pntena dnngusan. 9Hmeru peeyah cenga 4 urung ka 1 urung biciq. Mqquri tgtruma, mqquri nklaan hido, mqquri malu dxeral prana beyax na ka urung biciq nii. 10Mrana ka beyax na ma dehuk kmremux karac baro ma, ptingi na bobo dxeral duma ka supi karac ma pngerah, qqahun na papak na. 11Pparu bale ka heya, lmngelung gisu ta mgkala qbsuran paru karac baro ka heya ma, smeeliq snapuh bbege qbsuran paru klaali ma, hmurah sapah thmkuwan qbsuran paru gaga karac baro. 12Ririh qnquwan noda, wada sbege heya ka dsupi ma snapuh bnege daha. Wada na sqada dxeral ka bale ba kari, mnhemuc ooda na ma, msleelu bale kana.
13Mbahang ku gisu rmengo ka 1 mrtaso, dungal we niqan ka 1 mrtaso gisu rmengo 1 gaga rmengo mrtaso kiya: “Teutux gisu qqahun ka snapuh klaali, qnquwan madis nlaxan, sapah thmkuwan ma, dsupi we, mplutuc betaq knuwan ho?” 14Rmengo yaku ka heya: “Asi ka betaq 23'00 ali, kiya ka mosa bhege ka sapah thmkuwan.”
Pgkela so Teutux ka Gabriel Snkgulan Utux Baro
15Yaku, Daniyel qmnita so tuutux nii, mkmkela ku ba elu ckceka hiya. Qtai! Niqan ka mntena so seediq gisu mheyu berah mu. 16Kiya de mbahang ku pmbaro mlawa peeyah yayung Ulay: “Gabriel! Pgklai seediq nii ka so tuutux nii.” 17Kiya de meyah ssiyo gisu mu nniqan ka heya. Meeyah heya de, mkluwi ku ma, asi ku tgtemaq dxeral thmuku. Kiya de rmengo kenan ka heya: “Laqi seediq! Klai ba. Ado so tuutux quri qnhdean bobo dxeral ka nii.”
18Rmengo kenan ka heya de tgtemaq ku dxeral ma ini ku kela da. Kiya de tmelung kenan ka heya ma pstutuy kenan. 19Rngagan ka heya: “Qtai! Mphuwa mesa ka qnhdean seang we rengo mu sunan. Ado ali qqnhdean ka nii. 20Qntaan su ka 2 urung baus miric rudu we qbsuran paru Maday ma Paras. 21Baus miric we qbsuran paru qlhangan Hellenis. Gaga hmeru cenga 2 doriq hiya ka paru urung we kiya ka qbsuran paru plaale. 22Mnugerung ka urung nii ma rmirih dungal hmeru 4 ka urung we, mptutuy mpswaye 4 qlhangan qbsuran paru ka qlhangan nii. Kiya de uxe mpgkala heya ka beyax daha. 23Stenge qnnaqah daha ka 4 dqlhangan nii ciida, meeyah ka 1 qbsuran paru naqah ba ma mberaq ba. 24Krinah mrana paru ka beyax na, kiya ka kiya uxe smtama beyax na. Kcugun ba ka sseeliq na ma ida na dhekan ka ooda na. Mpooda lnglungan na mooda ma, mooda phuqil dseediq niqan beyax ma dseediq mrtaso. 25Ado kmqnaqah ba ka heya ma dehuk ba ka sneengan na quri naqah. Rinah psparu ka lhebun na ma, ini pgkela asi rinah kmremux phuqil hbaro ba seediq ka heya. Betaq meeyah mccebu Qbsuran paru kana dqbsuran paru. Kiya ka hiti ba de wada phqilun uxe baga seediq ka heya. 26Ali 23'00 rnengo so tuutux nii we ida bale ba ka kiya. Kiya de, asi su ka gmukun ka so tuutux nii, ado gisu rmengo quri ali qnhdean ka kiya.”
27Kiya de, yaku, Daniyel we asi ku ktakur ma mnarux ku duma hari ali. Mtutuy ku de mosa ku qmeepah oda qbsuran paru. Kiya de ida ku mkluwi bale so tuutux nii, kiya we ida mu ini klai na.
Currently Selected:
Daniyel 8: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
