Daniyel 7
7
Smneru Qntaan so Utux ka Daniyel (7:1-12:13)
Qmnita 4 Camac Paru
1Tgkingal knkawas qbsranun na paru Babirun ka Belsacar ciida, msepi sepi mneeniq qlapo ka Daniyel. Qntaan na ka so tuutux ma, spatis na ka sepi nii ma, srengo na ka qntaan na. 2Rmengo ka Daniyel:
Qmnita ku ckceka so tuutux keeman ciida, qtai! Niqan 4 ka bgihur ma, asi psbgihur cmebu rcilung. 3Niqan ka 4 camac paru mnkala peeyah rcilung, ini pntena ka heyi daha: 4Tgkingal camac paru we mntena rkelic rudu ma niqan palic kjiro. Tlleus ku ba mita ciida we, wada gbilun ka palic na. Kiya de ttuyun ma mheyu dxeral ka papak na mntena so seediq ma wada biqan lhebun so seediq uri. 5Qtai! Tg2 camac paru we mntena sume, mssiyo mheyu ma, niqan 3 waqic rupun ka quwaq na. Niqan ka seediq posa kari camac nii: “Tutui! Ekan ka egu heyi nii.” 6Bobo na de, qmita ku, qtai! Niqan kingal camac mntena so rkelic, 4 palic ka bbaang na so palic qbheni. 4 tunux na ma gaga biqan beyax qmlahang ka heya. 7Bobo na, tgleus ku qmita so tuutux keeman ciida, qtai! Tg4 camac paru we, so smiicu ma mbeyax ba taan, niqan waqic xiluy paru qmiyuc ptnemu ma, stmaqan na papak ka mnsngari na. Ini pntena so 3 camac paru pnlaale ka heya ma 10 ka urung na. 8Gisu ku lmngelung urung nii ciida, qtai! Gisu hmeru dungal 1 urung biciq ka cenga urung na. Kiya de urung biciq nii we gbilun na ka 3 urung pnlaale. Qtai! Niqan doriq ka urung nii, mntena doriq seediq, niqan quwaq na rmengo kari ttndahu.
Utux Meeniq Ani Knuwan
9Qmita ku ba ciida,
gaga psaun ka ttlungan qbsuran,
gaga tleung bobo hiya ka muudus ani knuwan.
Mntena huda knbhege ka lukus na,
mntena so ubal miric bhege ka snuunux na.
Rana sqama ka tlengun na,
gukuc papak na we rana puniq.
10Niqan rana puniq mntena so rcilung qluli,
qluli pneeyah berah na.
Mpqeepah gaga berah na we hbaro bale,
ini qlingi smepu ka gaga qmeepah berah na.
Gisu tleung moda psgao ka heya,
gisu sraguh kana ka pnatis sslingan da.
11Kiya de 1 qmita ku, ado rmengo kari psparu ka urung nii. Gisu ku qmita ciida, wada asi phqili ka camac kiya, wada hgliqun ka heyi ma, wada sqada ckceka rana puniq. 12Mnsngari na camac paru we wada heya ngalan ka beyax qqlahang daha. Kiya ka tduwa srwaan heya mlawa tikuh pkuudus betaq ali ma sntangan ka dheya.
13Qmnita ku tuutux keeman ciida,
qtai! Niqan 1 ka mntena so seediq,
gisu paapa plabu meyah ka heya,
wada desun berah Muudus Ani Knuwan ka heya.
14Wada maangal beyax qnlahang, knledax ma beyax qnlahang qbsuran paru ka heya,
mpqeepah heya ka qqlhangan, kklegan seediq ma seediq rmengo kklegan kari.
Beyax qlhangan na we ida meeniq ani knuwan, uxe ba llixun,
qnlhangan na we uxe mpnaqah.
Pgkela so Teutux Pnqita
15Quri so yaku, Daniyel we, naqah ba kuxul na ka bgihur mu. Smiicu kenan ka tuutux qnita mu. 16Mosa ku smdaling 1 mpqlahang, smiling ku heya ka kana noda nii. Kiya de rmengo kenan ka heya, pgkela oda nii: 174 camac paru nii we tmiyu mptutuy peeyah bobo dxeral ka 4 qlhangan qbsuran. 18Kiya de dseediq Tgpusu Baro ge, maangal qnlhangan nii ka dheya, mdoi qnlhangan nii betaq ani knuwan, betaq ani knuwan ka dheya. 19Kiya de mkmkela ku ba tg4 camac paru nii ka yaku. Ado ini ba pntena kana camac paru ka heya ma, so kcugun niqan waqic xiluy rupun ma kukuh limuk stnemu na qmteqic ka camac ma, sqtemaq na papak na ka msngari. 20Tunux na we niqan 10 urung ma, 1 urung hmneru dungal ma, wada mtuting berah urung nii ka 3 urung pnlaale nii. Urung nii we niqan doriq, niqan quwaq na rmengo kari psparu, mgkala kana mntena heya. 21Qmita ku ciida, urung nii we gisu mccebu dseediq mrtaso, heya ka wada mbeyax. 22Betaq meyah ka Muudus Ani Knuwan, heya ka meeyah dmayo rmengo dseediq mrtaso, kiya ka ali maangal qlhangan ka dseediq mrtaso da.
23Rmengo so nii ka mpqlahang:
Tg4 camac paru we tmiyu tg4 qlhangan ka meeyah bobo dxeral,
ini pntena icil qlhangan ka nii,
rmequn kana qnlangan bobo dxeral ka heya,
mooda qmleqah ma mpknemu kana ka heya.
24Quri so 10 urung we, tmiyu 10 qbsuran paru mpsnegul qmlahang qlhangan.
Bobo na de mptutuy ka 1 qbsuran paru,
ini pntena qbsuran paru pnlaale,
heya we mptakur 3 qbsuran paru.
25Heya we hmetur Tgpusu Baro ka kari na,
heya we tmraqil dseediq mrtaso Tnpusu Baro,
ppriyux smseman ma gaya ka heya.
Meeniq baga na 1, 2 ma, dmeka knkawas ka dseediq mrtaso.
26Kiya de, mptleung psgao ka heya.
Glekun ka beyax na mpqlahang,
sgliqun, mpkuuka ani knuwan ka heya.
27Qnlhangan, beyax mpqlahang ma, kana beyax mpqlahang dqqlhangan bobo dxeral we,
bege na dseediq mrtaso nTgpusu Baro.
Qnlhangan na we qnlhangan betaq ani knuwan,
mqeepah ma mpuyu heya kana ka gaga dmoi beyax qmlahang.
28Betaq hini ka kari nii. Yaku, Daniyel we paru ba kniicu mu ma, betaq so pala ka dqeras mu lmngelung nii. Kiya de psaun mu lhebun mu ka noda nii.
Currently Selected:
Daniyel 7: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
