Daniyel 6
6
Meeniq Beling Rkelic Rudu ka Daniyel
1Poda lnglungan na Daryawes qbsuran paru we pheyu 1'20 heyi qbsuran mpqlahang nyusan dxeral ma qmlahang kana qlhangan. 2Dungal we baro daha we, pheyu 3 qbsuran pusu mdudul, kiya we gaga ckceka hiya ka Daniyel uri. Meeyah rmengo berah 3 daha ka dqbsuran mpqlahang, kiya ka so uxe mosa smuuwic qbsuran paru. 3Kiya de Daniyel we, ado malu ba ka bgihur na, kiya ka mgkala 2 heyi qbsuran mklawa ma qbsuran mpqlahang, kiya de kmpheyu heya mosa mpqlahang kana qnlhangan ka qbsuran paru.
4Ciida, meeyah migin qnnaqah ooda qnlhangan Daniyel ka qbsuran mklawa ma dqbsuran mpqlahang. Kiya we ida daha uka slayan ka qnnaqah ma qnquwan noda na, ado mdrumuc ba meepah ka heya ma, uka ka ndaan na qmnuqu. 5Kiya de mpprengo ka dheya. “Migin ta qnnaqah noda Daniyel ge, nasi ta ini pdai gaya Utux Baro de, uxe ta slayan ka qnnaqah na.”
6Kiya de meeyah msseli berah qbsuran paru ka qbsuran mklawa ma dqbsuran mpqlahang, rmengo: “Daryawes qbsuran paru, tai su so muudus ani knuwan! 7Yami nii qlhangan su ka peeyah pusu mklawa, dqbsuran nyusan dxeral ma mdayo na, dungal we kana dmpqlahang ge, mnoda miyan mpprengo, braho su posa ka kari su ma, pheyu ka 1 kari pndakar: 30 ali peeyah saya, cenga na nii we, ani ima iya pesa quri tuxan ma ani ima seediq, wano mesa qbsuran paru. Kiya de kiya ima ka smeeliq gaya pndakar we kika asi qdaani beling rkelic rudu. 8Qbsuran paru! Braho misu bale pdai ka kari pndakar nii, btasi ngayan su ka patis nii, kiya ka uka llegun. Spuyu ta gaga seediq Maday ma Paras we, asi ka ini llegi kiya.” 9Kiya de Daryawes qbsuran paru we ptasan na ngayan na ka patis kari pndakar. 10Mbahang wada psaun ka patis pndakar de asi osa sapah ka Daniyel. Bobo dnamux sapah na hiya we mqquri Yerusalem ka beling na. Kiya de Daniyel we klaali tmbqelic papak na dmurun mqaras Utux Baro na 1 ali mn3 ka heya.
11Kiya de msseli ka dseediq kiya ma, qtaan daha ka Daniyel gisu dmurun berah Utux Baro ka heya. 12Kiya de mosa berah qbsuran paru ka dheya ma, mosa rmengo quri kari pndkaran na, rmengo: “30 ali peeyah saya, cenga na nii we, ani ima iya pesa quri tuxan ma ani ima seediq, wano mesa qbsuran paru. Uxe su mnatis ngayan su kari pndakar nii ka isu peni?” Rmengo ka Qbsuran paru: “Bale ba niqan ka nii. Spuyu ta gaya seediq Maday ma Paras uka lglegun ka nii.” 13Rmengo qbsuran paru ka dheya: “Qbsuran paru! Ini qbahang kari su ka Daniyel seediq Yehudah qnerac, ini puyu kari pndakar pnatis su ngayan uri ma, betaq mk3 kingal ali dmurun Utux Baro ka heya.” 14Mbahang kari nii ka qbsuran paru de naqah ba kuxul na. Kmdayo Daniyel ka heya ma, betaq gbiyan ida gaga lmngelung mpkuudus heya na. 15Kiya de meeyah msseli berah qbsuran paru ka dseediq kiya, rmengo qbsuran paru ka dheya: “Qbsuran paru! Klaun su ba ka gaya seediq Maday ma Paras, kana pnheyu ka kari pndakar ma gaya de, ini tduwa brahan.”
16Kiya de posa kari ka qbsuran paru, aadis daha ka Daniyel ma qada daha beling rkelic rudu. Rmengo Daniyel ka qbsuran paru: “Tnhmuku su Utux Baro klaali, mpdoi baga sunan ka heya.” 17Niqan ka 1 seediq hmaqul 1 btunux gmukan daha beling. Qbsuran paru we dmoi ngayan qbsuran paru ma ngayan dqbsuran mpdudul mukan daha ka beling. Ida uka brahan ka pkdira Daniyel. 18Mpbrinah mosa sapah ka qbsuran paru ma mscaman ini ekan ma ini taqi ka heya. Ini na srwai madis iyuk ka seediq uri.
19Lmedax karac so kusun de, mtutuy ka qbsuran paru, asi mtgaaguh nhari tmalang mosa beling rkelic rudu hiya. 20Dehuk ssiyo beling rkelic rudu hiya ka qbsuran paru de asi nbasi mlawa Daniyel. Rmengo Daniyel ka qbsuran paru: “Daniyel tnqliyan Utux Baro muudus ani knuwan! Utux Baro gaga su kdrmetun ba qmeepah we gaga pkuudus sunan peeyah rkelic rudu ho?” 21Cmiyuk qbsuran paru ka Daniyel: “Tai so mpkuudus ani betaq knuwan ka qbsuran paru! 22Utux Baro mu we snkagul snkgulan na meeyah gmeemuk quwaq rkelic rudu ma ini pqluqah kenan ka rkelic rudu. Ado uka qnnaqah mu berah Utux Baro. Qbsuran paru! Ini ku oda ani manu naqah berah su uri.” 23Kiya de mqaras bale ka qbsuran paru ma, posa kari blebil Daniyel peeyah beling. Kiya de pltadun peeyah beling ka Daniyel, qtaan daha uka ani biciq pnlqihan ka heyi na, ado snhii ba Utux Baro ka heya. 24Posa kari ka qbsuran paru, desun daha berah na ka dseediq migin kari Daniyel ma dmqedil ma lqlaqi daha, wada sqada beling rkelic rudu ka dheya. Ani ini dehuk dxeral mtuting na we asi strngaani qmabu mekan rkelic rudu ma ptnmei mekan kana ka buuc daha.
25Kiya de posa kari kana knkingal qlhangan, dqlhangan ma, dseediq rmengo klegan kari ka Daryawes qbsuran paru: “Tai so mptbleyaq ka kana seediq qlhangan! 26Saya, mposa ku kari kana seediq nii mu qnlhangan, ida namu asi ka miicu ba berah Utux Baro nDaniyel.
Ado Utux Baro muudus ka heya,
ida meeniq ani knuwan,
qnlhangan na we uxe mpqnaqah ani knuwan,
ida mplutuc ani knuwan ka beyax qnlahang na!
27Qmlahang ma, dmoi baga ka heya,
mooda oda sklwiun ba karac ma dxeral ka heya,
pkuudus Daniyel,
peeyah quwaq rkelic rudu ka heya.”
28Kiya de, Daniyel nii we msleelu ba ka ooda Daniyel pkelu qlhangan Daryawes ma Kores qbsuran paru Paras ciida.
Currently Selected:
Daniyel 6: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
