Daniyel 5
5
Hnpure Qnaras Belsacar Qbsuran Paru
1Belsacar qbsuran paru we psramal hnpure qnaras 10'00 heyi dqbsuran mdudul ma msuupu mekan ma mimah dheya. 2Pkelu ba mqaras mimah ciida, posa kari ka Belsacar ppeeyah na pngerah mahan snmalu king ma ging gneeluk maadis Nebukadnecar tama na peeyah sapah thmkuwan Yerusalem. Kiya de dooyun na mimah sino daha qbsuran paru ma qbsuran mdudul, mqedil na ma kana dmqedil na. 3Kiya de desun daha ka pngerah mahan king ma ging gneeluk pneeyah sapah thmkuwan Utux Baro Yerusalem. Qbsuran paru, dqbsuran mdudul, mqedil na ma dmqedil na we dmoi qyqeya nii mimah sino. 4Mimah sino ka dheya ma, mqaras duutux snmalu king, ging, limuk, xiluy, qhuni ma, btunux ka dheya.
5Ciida, asi lux criyu ka 1 tluding baga seediq ma, matis kari qnabil nrcuhan berah ba sapah qbsuran paru hnruwan camo hiya. Qmita baga ga matis ka qbsuran paru. 6Asi so pala ka dqeras na ma pkrkerang ba ka lhebun na. So ni sqrahuq ka hwinuk ma, gisu mccikul ka papak uri. 7Pmbaro mlawa dmphhuni, dseediq Krdiya ma dmptkarac ka heya. Rmengo dseediq niqan knkela Babirun ka qbsuran paru: “Ima ka tduwa smepu ma pgkela kari nii we, plkusun mu lukus qbsuran mtgdiyuc ma, psrugun mu king ma ptlungun mu tg3 paru tlungan ka heya.” 8Kiya de mosa heya kana ka seediq niqan knkela, kiya we ini tduwa smepu kari kiya ka dheya ma, ini kela pgkela kari kiya uri. 9Belsacar qbsuran paru ge, asi pkrkerang ma so pala ka dqeras na ma, kana qbsuran mdudul we uka daha ba klaan kana.
10Ririh kari qbsuran paru ma dqbsuran mdudul, meeyah mremux qqrasan uqun hiya ka bubu qbsuran paru, rmengo: “Tai so mpkuudus ani betaq knuwan ka qbsuran paru! Knbeyax! Iya kiicu ma so pala ka dqeras su. 11Niqan 1 seediq qlhangan su hini. Ga thiqan Bgihur Utux Baro ka heya. Mqbsuran ka tama su ciida, seediq nii we niqan knledax ka lhebun na, niqan knkela, mntena knkela utux ka knkela na. Tama su Nebukadnecar, kiya ka tama qbsuran paru we, ngalan na mdudul kana dmpstuutux, dmpsbunur, dseediq Krdiya ma, dmptkarac ka heya. 12Ado niqan knmalu ba bgihur, niqan knkela tduwa pgkela sepi, rmengo lneing kari ma, pkuuka tiiyax. Ngayan seediq nii we Daniyel, Beltesacar knesa ptngayan ka Nebukadnecar qbsuran paru. Sai mlawa ka heya, ida mpgkeela manu ka elu kari nii.”
Pgkela Pnatis Qnabil ka Daniyel
13Kiya de desun berah qbsuran paru ka Daniyel. Smiling Daniyel ka qbsuran paru: “Isu ka Daniyel seediq Yehudah qnerac tama mu ho? 14Mbahang ku we, niqan bgihur utux ma knledax ka lhebun su ma, niqan ba gnkela ma knkela su uri. 15Mnlawa ku dseediq niqan knkela ma dmpstuutux gisu berah mu saya, so namu mpsepu kari nii ma mpgkeela elu kari nii. Kiya we ini kela kana ka dheya. 16Mnbahang ku tduwa su rmengo ma, rmaguh ttiiyax ka isu. Saya, nasi su tduwa spegun ka kari nii ma, pgkela su kenan ka elu kari nii we, plkusun su lukus rila mtgdiyuc, psrugun su king ma ptlungun mu tg3 paru tlungan qlhangan mu.”
17Cmiyuk qbsuran paru ka Daniyel: Peeniq isu nanak ka snadu su, tduwa su sbege seediq uri. Ririh qbsuran paru ida ku mpsepu kari nii ma, pgkela elu kari nii. 18Isu, Qbsuran paru! Utux Baro Tgpusu Ba Baro we bnege qnlhangan, paru beyax, knledax ma knpruwan Nebukadnecar tama su. 19Ado betaq miicu ma mkrkerang berah na ka qqlhangan, kklegan seediq ma seediq rmengo klegan kari. Ado kmphqilun na we phqilun na, pkdusun na we pkdusun na, psaun na baro we ida na psaun baro, pslebu na we ida na pslbeun. 20Kiya de heya we psparu ka lhebun na, mkeruh ka bgihur na, kiya ka ma so smtali noda na ciida de, wada asi laxi ka beyax na qmlahang ma, wada glekun ka knledax na. 21Lwaqun peeyah rahul seediq, ma camac ka lhebun na. Msuupu dapa mekan speriq, heyi na we psdrmelun dremus pneeyah karac betaq mkela gaga dmoi pusu mpqlahang beyax qlhangan ka Utux Baro Tgpusu Ba Baro, heya we spooda na lnglungan na pheyu seediq mpqlahang qlhangan. 22“Belsacar! Isu we laqi su Nebukadnecar, ani su klaun kana ka nii we ini su tgsesu. 23Krinah su psparu ma kmpais su Utux Baro Tnpusu Karac Baro. Smkagul ku seediq maadis qyqeya sapah thmkuwan na betaq berah su ma, dmoi namu qyqeya nii miimah sino ka isu ma, dqbsuran mdudul, mqedil su ma, dmqedil su. Tmdahu su dtiikung ini qita, ini qbahang, uka knkela, kiya ka snmalu king, ging, limuk, xiluy, btunux ma, qhuni. Ini su biqi Utux Baro kiya ka qmlahang hengak su ma, kana noda su ka knledax. 24Kiya ka ptuura tluding baga na matis kari nii ka heya.”
25“Patis na nii we ‘Mini, Mini, Tkere, Uparusin.’ 26So nii ka elu na: Mini ge, kiya ka ali snepu knkawas qnlhangan su we betaq hini. 27Tkere ge, kiya ka gisu su psaun bobo ssepung knchdilan ka isu, kiya we niqan ka ini su baka seengan. 28Uparusin ge, kiya ka tgdahaun ka qnlhangan su ma pssugun seediq Maday ma seediq Paras.” 29Kiya de posa kari ka Belsacar qbsuran paru we, plkusun daha lukus rila mgtdiyuc ka Daniyel, psrugan sniru tluungan ma pgkela ckceka qlhangan biqan tg3 tluungan ka heya. 30Keeman ciida, wada phqilun Belsacar ka Krdiya qbsuran paru. 3162 knkawas na ciida ka Daryawes seediq Maday ka wada mangal qnlhangan Krdiya.
Currently Selected:
Daniyel 5: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
