Daniyel 4
4
Tg2 Sepi Nebukadnecar
1Posa kari quri kana qqlhangan qnlangan, seediq kklegan ma, seediq mskari kari kklegan ka Nebukadnecar Qbsuran paru: “Tai namu so maha mbeyax bale! 2Rengo mu ka sklwiun pnskraya qneepah Utux Baro Tgpusu Ba Baro.
3Teyal ba knparu ka pnskraya qneepah pnqita Utux Baro!
Teyal ba beyax na ka sklwiun noda na!
Mpbetaq ani knuwan ka beyax qnlahang na!
Ida mplutuc ani betaq knuwan ka kglahang na!
4Yaku, Nebukadnecar we msbleyaq ku ba nniqan mu sapah qbsuran paru ma tgbleyaq ku qnbleqan mu. 5Kiya de snepi ku 1 sepi pkiicu kenan. Sddema ku meeniq qlapo ma qmita ku kcugun ba so tuutux. 6Kiya de mlawa ku kana dseediq niqan knkela Babirun ma eeyah daha berah mu pgkela sepi mu. 7Kiya de meyah kenan kana ka dmpstuutux, dmpsbunur, dmhuni ma dmptkarac. Srengo mu ka sepi mu ma ini kela pgkela ka dheya Krdiya. 8Hiti de meyah ka Daniyel, kiya ka Beltesacar nangal mu ngayan utux mu ka meeyah berah mu. Thiqan Bgihur Utux ka heya. Srengo mu heya ka sepi mu. 9Beltesacar qbsuran mpstuutux! Klaun misu gaga theyaq sunan ka Bgihur Utux Baro ma, ani maanu lneing we uxe mpqnriqu sunan kana. Saya tgsai ku heya ka tuutux qnita mu sepi ma tgsai ku heya ka sepi mu.”
10Teutux snepi mu bobo qlapo we so nii: Qmita ku, qtai! Ckceka ceka bobo dxeral we niqan 1 paru ba qhuni, paru bale. 11Asi Kdakil ma, tklihu lmekuh karac baro ka hnyegan na ma qtaan kana seediq bobo dxeral. 12Mubung malu ba ka waso na ma egu ba heyi na, mtuku ba uqun kana camac. Yahan msange camac ka saso qhuni, meeyah tmrudu bobo cida ka qbheni ma, kana niqan heyi ma dara we mangal uqun daha peeyah qhuni nii uri.
13Qmita ku, so nii ka tuutux gaga tunux mu mneeniq ku qlapo ciida. Qtai! Niqan ka mpqlahang na, kiya ka mrtaso bale mntuting pneeyah karac baro. 14Pmbaro ba rmengo ka heya: “Tkuri ka qhuni nii! Seqic ka cida na! Ptuting ka waso! Hrehur ka heyi! Pqduriq peeyah hiya ka camac ma liwaq peeyah cida ka qbheni. 15Rngii hiya ka pusu na ma ptqrii qnawal limuk ma xiluy, asi pkbyui hiya. Peeniq hiya psdrmuli dremus pneeyah karac ma, pspui camac mekan speriq bobo dxeral. 16So maha kmpriyux ka lhebun na, so uxe lhebun seediq. Biqi lhebun camac, mooda 7 knkawas. 17Pnosa kari nii we sneung snkgulan baro mpqlahang, kiya de pgkela kana seediq bobo dxeral quri Utux Tgpusu Baro ka qmlahang qlhangan seediq. Bege na ima ka qlhangan we bege na heya, dungal we mpheyu seediq tgbiciq ka mpqlahang qnlhangan.”
18“Snepi mu yaku, Nebukadnecar ka nii. Beltesacar! Pgklai ku heya ka sepi nii. Uka ani 1 ka mtduwa pgkela kenan seediq niqan knkela tnqliyan mu. Wano ba isu ka tduwa, ado gaga theyaq sunan ka Bgihur Utux Baro.”
Pgkela Sepi ka Daniyel
19Kiya de, tnngayan Beltesacar ka Daniyel we mnkluwi ba ma miicu ka lhebun na. Rmengo ka qbsuran paru: “Beltesacar! Iya nkluwi ka sepi nii ma quri ppgkeela sepi nii.” Cmiyuk ka Beltesacar: “Pusu tnsapah mu! Tai so mpquri dseediq tmnraqil sunan ka sepi nii, mpquri pais su ka pnugkela na. 20Mdakil ma paru bale tklihu lmekuh karac knbragan na we qtaan kana seediq bobo dxeral. 21Mubung malu ba ka waso na ma egu ba heyi na, mtuku ba uqun kana camac. Yahan msange camac ka saso qhuni, meeyah tmrudu bobo cida ka qbheni.
22Qbsuran paru! Isu ka mtbeno paru qhuni nii. Dehuk karac ka beyax qnlahang su. Qlhangan su we mkgarang betaq kana muxi dxeral. 23Wada su qtaan peeyah doriq su ka mrtaso ba mpqlahang pneeyah karac baro ba rmengo: ‘Ptakur ma pspaux ka qhuni nii, rngii dxeral hiya ka pusu na qnada. Ptqrii qnawal limuk ma xiluy ckceka speriq dxeral. Peeniq hiya psdrmuli dremus pneeyah karac ma, pspui camac mekan speriq bobo dxeral betaq 7 knkawas.’
24Qbsuran paru! So nii ka pnkeela sepi nii: Ooda meeyah sunan we pneeyah pnosa kari Utux Tgpusu Baro. 25Isu we lwaqun su peeyah seediq ma mpsuupu su camac bbuyu. Mntena su dapa mekan su speriq, psdrmelun dremus pneeyah karac mpbetaq 7 knkawas. Asi ka betaq su mkela gisu dmoi beyax mpqlahang qnlhangan seediq ka Utux Tgpusu Baro ma, bege na ima ka qlhangan we bege na heya. 26Pnosa kari quri rnangi pusu qhuni we, so su klaun gaga karac baro ka pusu dmoi beyax, mpnisu ka qnlhangan su. 27Qbsuran paru! Braho su qbhangi ka kari mu, qeepah msderux noda ma lixi ka qnnaqah oda, glaani ka seediq qrinuc ma, pkngati ka qnquwan noda. Nasi su so nii de maha mrana ka mbleyaq su.”
28Kana nii we wada mooda Nebukadnecar qbsuran paru kana. 29Bobo 12 idas de mkkesa tbsagan sapah qbsuran Babirun paru ka Nebukadnecar. 30Rmengo ka qbsuran paru: “Teyal ba knparu ka alang Babirun! Nii we uxe mnoda beyax mu smalu ma ngalan pusu alang ma, nii pgkela knpruwan ledax mu ma tluungan mu peni?” 31Gisu meeniq quwaq qbsuran paru nina ka kari nii ciida, niqan ka hrenang pneeyah baro, rmengo: “Nebukadnecar qbsuran paru! Niqan kari rrengo mu sunan. Mplatac sunan ka qlhangan su. 32Isu ge, lwaqun su peeyah seediq ma mpsuupu su camac meeniq bbuyu. Mntena su dapa mekan speriq ma, mpbetaq su 7 knkawas. Asi ka betaq su mkela gisu dmoi beyax mpqlahang qnlhangan seediq ka Utux Tgpusu Baro ma, bege na ima ka qlhangan we bege na heya.” 33Kari nii we asi kchaya heyi Nebukadnecar. Wada lwaqun peeyah seediq, mntena dapa mekan speriq ma heyi na we sdrmeelan dremus pneeyah karac, snuunux na we bbaro mntena ubal qdiro ma, kukuh na we mntena kukuh qbheni.
Tndahu Utux Baro ka Nebukadnecar
34“Dehuk ka ali da, yaku, Nebukadnecar we qmita ku quri karac baro ma, mnberih dungal ka knkela mu. Kiya ka tmdahu ku knpruwan Utux Tgpusu Baro, mqaras ku ma psparu ku Utux Baro muudus ani betaq knuwan.
Beyax na qmlahang we meeniq ani knuwan,
qnlhangan na we mllutuc ani kknxalan.
35Ngalan uka kana ka seediq bobo dxeral.
Kana supi karac baro ma dseediq bobo dxeral,
ida muyu lnglungan na nanak moda ka heya.
Uka seediq tduwa hmetur baga na,
uxe uri we smiling heya, gisu su meepah manu ho?
36Ciida, mnberih dungal ka knkela mu, mnberih ka knpruwan ma knledax mu uri. Betaq niqan knledax ka qnlahang mu ma, meyah qmita kenan ka dseediq ngalun kari ma dqbsuran mdayo. Sbgrnahun mu smmalu dungal ka qlhangan mu ma, mgkala meeyah heyi mu ka paru ba beyax mpqlahang. 37Saya yaku, Nebukadnecar we tmdahu, smparu ma mege knledax Qbsuran Paru gaga baro. Ado bale ba kana ka msderux noda na, ndaan na we bale ba ini psaanak. Psparu noda na we, psbciqun na kiya.”
Currently Selected:
Daniyel 4: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
