Daniyel 11
11
1Quri so yaku, prading knkawas Daryawes qbsuran paru Maday ciida, dmnayo pklekoh pkbeyax kenan ka Mikael. 2Saya, mprengo ku bale ba ka kari rrengo mu.
Dqbsuran Paru Tgbaro ma Tgtruma
Qtai! Niqan 3 qbsuran paru niya na ka mptutuy peeyah Paras. Tg4 na we maha mpgkala qnbleqan ma beyax na kana dqbsuran paru. Kiya de pprudu dqlhangan mpccebu qlhangan Hellenis. 3Mpniqan 1 qbsuran paru mptutuy, mdoi paru ba beyax mpqlahang ma niqan beyax na kmpooda beyax na nanak moda. 4Pkelu mrana paru ka beyax na ciida, mtakur ka qlhangan na ma mtg4 msaasu. Uxe ltudun mangal lqlaqi mslutuc na ma, beyax na we ini pgkala beyax na cbeyo. Qnlhangan na we mptakur ma bbege dseediq icil uxe lqlaqi laqi na.
5Qbsuran paru tgtruma we mrana mbeyax. Niqan 1 ka Qbsuran supi na mgkala heya dmoi beyax qnlahang mpqlahang paru ba qlhangan. 6Bobo piya knkawas bukuy na de qbsuran paru peeyah tuma ge, msuupu msdangi qbsuran paru peeyah baro ma, pmqedil na heya ka weewa na. Kiya ka mosa niqan beyax ka sndhegan daha. Kiya de weewa nii we uxe meeniq qbsiyaq ka beyax na ma, ini eniq qbsiyaq ka beyax qbsuran paru uri. Weewa nii, mnadis heya, pntuting heya ma, dmnayo heya we maha phqilun kana. 7Mpeeyah sapah weewa nii ka meeyah lmutuc qbsuran paru. Heya ka mdudul supi mremux qlhangan tgbaro ma mccebu dheya. Kiya we mpkbeyax ka heya. 8Glekun na maadis Micrayim kana ka hnyegan utux ma tikung snmalu daha ma, qyqeya snmalu king ma ging. Lmawa tikuh yaa piya knkawas, uxe mosa mccebu dqbsuran paru tgbaro ka heya. 9Dqbsuran paru tgbaro we, meeyah mccebu dqbsuran paru tgruma ka dheya, kiya ka kiya ida mpbrinah dxeral daha ka dheya.
10Dlaqi qbsuran paru tgbaro we psseli hbaro ba supi psramal mccebu. Mmaha mccebu ka heya ma, mntena so rnecux tmbenu. Meeyah mccebu dungal ma, asi kremux lualang dqbsuran paru tgtruma. 11Mpkseang ba dqbsuran paru tgtruma, meeyah madis supi daha mccebu dqbsuran paru tgdaya ka dheya. Uxe baka baga dqbsuran paru tgtruma ka dqbsuran paru pneeyah tgbaro. 12Wada ini baka ka paru supi nii de, psparu lhebun daha ka dqbsuran paru tgruma. Ani wada ptakur hbaro ba seediq ka heya we, ini qbsiyaq ka so nii knbyaxan na.
13Meeyah maadis hbaro supi mgkala tgberah dungal ka dqbsuran paru tgbaro. Yaa piya knkawas, maadis hbaro ba supi ma egu ba qyqeya mccebu ka heya. 14Ciida, mosa hbaro ba seediq mtutuy mccebu qbsuran paru tgtruma. Dungal we mptutuy ka dseediq naqah peeyah seediq su uri. Kiya ka mpbale so tuutux nii ma, mpkuuka ka dheya. 15Dqbsuran paru tgbaro we meeyah smmalu dxeral qbrangan maangal lualang mkere. Uka klaan hmetur supi tgtruma ka dheya. Ani so mbeyax bale ka supi we, uka beyax daha hmetur. 16Qbsuran paru mneeyah mccebu dqbsuran paru tgtruma we, mpooda nanak lnglungan na mooda. Uka ani ima ka mptduwa mheyu berah na. Mpheyu dxeral knmalu ka heya ma, mooda oda smeeliq ka baga na.
17Maadis kana beyax qnlhangan na ka heya ma, mpsdehu qbsuran paru tgtruma ma, so maha smeeliq qnlhangan na we, bege na mqedil qbsuran paru tgruma ka weewa na nanak. Ini dehuk ka lnglungan so nii ma, uka nngalan na pneeyah nii. 18Bobo na nii, mosa mbrinah mccebu qbsuran paru tgbaro ma, meeyah gmeluk mangal kana knkingal qlhangan sysiyo rcilung. Kiya de mptutuy ka 1 qbsuran supi mooda mangal qnsiqa seediq pneeyah qbsuran paru tgbaro, kiya ma mmaha nanak heya ka qnsiqa nii. 19Mpbrinah qlhangan na nanak ka heya ma mosa qbrangan na, kiya we mptakur ma mpkuuka ka heya.
20“Ciida, niqan 1 seediq meeyah rmirih qbsuran paru na, heya we psqrinuc ma pkeyux maangal seediq ma prana qnbleyaq qlhangan na. Kiya de ini qbsiyaq de mhuqil ka heya, uxe pneeyah seang, uxe pneeyah mccebu uri.”
Naqah ba Qbsuran Paru Tgbaro
21Bobo na, mptutui ka 1 naqah ba seediq mplutuc qbsuran paru na. Ini bale sbliqi mege knledax seediq ka heya. Ani so kiya, asi eyah mberiq gmeeluk beyax qlhangan ini psramal ka dheya ciida. 22Mntena wada daun rnecux mubung ka supi mneeniq berah na. Mnoda smdehu we, ida so nii uri. 23Bobo mnoda smdehu seediq ka heya we, ida mberiq nina. Ani ini khbaro ka smnegul heya we, krinah mrana knpruwan na. 24Ini psramal ciida ka seediq na we, asi eyah gmeluk dxeral malu ba qnlhangan, ani rdrudan ma pusu rdrudan na we, ini ba ooda so nii. Pssugun daha ka qyqeya gneeluk, gmeluk qyqeya ma pusu dnoi, dungal we lmngelung mosa mccebu lualang uri. Kiya de uxe mpqbsiyaq ka so nii.
25Maha niqan pahung na mquri berah, maadis hbaro ba supi mosa kmremux qbsuran paru tgtruma. Maadis mbeyax ba supi meeyah smterung mccebu heya ka qbsuran paru tgtruma, kiya we mpkuuka ka beyax daha hmetur. Ado niqan ka tbrinah phuqil heya. 26Mptheyaq ba qbsuran paru nii ka pkuuka heya, pqhdeun phuqil kana ka supi na ma, hbaro ba ka mtakur mhuqil. 27Quri so 2 qbsuran paru nii we, naqah ba ka lhebun daha. Ani nii msuupu mekan hnpure we, ida mpqqberiq. Kiya de ini dehuk ka snluwan daha, ado ini dehuk nana ka ali snpegan. 28Maadis stenge gnabul qyqeya mccebu ka qbsuran paru tgbaro, kiya we mpbrinah sndhegan ka lhebun na. Kmmhemuc ka noda na ma, brinah mosa dxeral na nanak.
29Dehuk ka ali sneengan de, mpbrinah ma meeyah mccebu tgtruma ka heya. Ini pntena so pnlaale ka kiya da. 30Ado meeyah mccebu heya ka supi asu Kityim, kiya de asi kiicu ma qduriq. Malix sndhegan ka heya, mmhemuc bale ka noda na ma, meeyah smbleyaq dseediq tnbrinah sndhegan ka heya. 31Mptutui supi ka heya, supi nii we mooda smrutiq sapah thmkuwan, kiya ka qnbrangan. Mooda pkuuka snapuh klaali ma, mpheyu qyqeya qnrquun ba mooda pkuuka. 32Sdoi na knkela mberiq ddulun na ka dnaqah seediq tnbrinah sndhegan. Wano ba dseediq mkela Utux Baro ka msdehu moda hiya. 33Dseediq niqan knkela lualang ka mooda tmgesa hbaro seediq. Kiya de cenga na tikuh ciida we, ida moda mhuqil mtakur hlmadac, sqmaun phuqil, rngatun gmeeluk ma, qmerac ka dheya. 34Mtakur ciida ka dheya we, ini khbaro ka mdayo dheya. Kiya we hbaro ka mnberiq tuumal dheya. 35Duma niqan knkela we mptakur, mooda psbgurah ndaan daha mqraqil ka dheya, mpsbgurah betaq qnhdean. Ado niqan tikuh ali na, kiya ka meeyah ka ali sneengan nii.
36Mooda mmhemuc oda na ka qbsuran paru, psparu ba hmrinas kana duutux. Dungal we mdoi kari naqah smhangal Utux Mgkala Kana Utux. Ida na daun kana ka ddaun na, asi ka betaq mhedu ka seang Bukung. Ado oda snengan we ida mosa niqan kiya. 37Ini sparu duutux rudan na, ini thmuku utux kuxul dmqedil ma, ani maanu utux we ini na sprui kana. Ado mgkala ani maanu ka pnsparu na ka heya. 38Spririh na hiya ka utux thmkuwan qbrangan, sdoi na king, ging, btunux qrari, qyqeya mkere brigan thmuku utux uxe na nklaan. 39Sntama dnayo utux icil qnlhangan moda smeeliq dqbrangan mkeere ka heya. Kana thei heya we, sduwan na egu knledax, so maha qmlahang hbaro seediq ma, sciyuk na maasu malu dxeral uri.
40“Dehuk ka ali qnhdean, meeyah mccebu qbsuran paru tgbaro ka qbsuran paru tgtruma. Mdoi rulu mccebu, supi paapa dapa dmay ma, egu ba asu mccebu ka qbsuran tgbaro meeyah mccebu heya. Dungal we mpremux dqlhangan, mntena so rnecux tmbenu dxeral. 41Mpremux dxeral malu ba ma, mptakur ka hbaro qnlhangan. Kiya we mpqduriq peeyah baga na ka seediq Edom, Moab ma dmeka Amon. 42Mphkero baga na mccebu dqlhangan ka heya, ani dxeral Micrayim we, uxe srhuqun uri. 43Mpqlahang king, ging, dnoi mkere ba brigan ma duma na hiya qyqeya sneku Micrayim ka heya. Dungal we mpsnegul dapil papak na ka seediq Lubi ma Kusu. 44Kiya de, ida meeyah ka kari pneeyah nklaan hido ma pneyah daya, meeyah prudu heya. Kiya de maha mseang bale mosa ma, qhdeun na phuqil ka hbaro ba seediq. 45Heya we mpkobu kobu qbsuran paru cenga rcilung ma mrtaso dgiyaq hiya. Kiya de dehuk ka ali qnhdean na de, uka ka seediq mdayo heya.”
Currently Selected:
Daniyel 11: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
