Amos 6
6
Ppkuuka ka Israel
1“Seediq gaga tbleyaq meeniq Sion,
mbleyaq ba meeniq Samareia,
kiya ka tunux dqlhangan, niqan ba ngayan,
kiya ka ssaun ba tnsapah Israel we, teyal su bale!
2Osa qmita alang Kalneh,
peeyah hiya osa alang Xamat,
dungal we osa Gat seediq Peliset.
Mgkala namu knmalu dqlhangan nii ka yamu ho?
Uxe uri we pgkala knuglahang dxeral namu ka knuglahang dxeral daha ho?
3Ida smtheya nana ka ali mqraqil, mesa namu,
kiya we pdhekun namu ka mpkuuka qmlahang.
4Gaga mtaqi qlapo snmalu waqic dapa bukung ma gaga tbbleyaq mksaro qlapo ma,
gaga mekan heyi wawa dapa ma heyi wawa miric!
5Dheya we tmubu tbleyaq ba muuyas,
smmalu uyas daha nanak, mntena so Dawid.
6Dmoi namu paru pngerah mimah sino ma rmicuh namu tgmalu ba sknexan heyi,
kiya ka kiya ini namu sqnaqah kuxul ka mnqraqil Yosehu.
7Kiya de yamu ka pllayun ba qmerac,
tnbleyaq ba mnqqaras we mpkuuka kiya.”
8Utux Tmninun Bukung psdehu heya nanak ma rmengo:
“Klhbenun mu ba ka pnsparu Yakobu ma, riqu mu ka sapah qbsuran paru na.
Bege mu pais ka alang ma kana qyqeya ckceka hiya.”
Rnengo Utux Tmninun, Utux Baro Mdoi Kana Supi ka nii.
9Ciida, nasi ani 10 heyi msngari ka 1 sapah we, ida mphuqil kana. 10Mtswai tama mnhuqil ka mpheal bqerus nganguc ma mpsqama, kiya de mpsiling heya ka sapah tgtruma: “Duma na isu we ima ka gaga hiya na ho?” Cmiyuk ka heya we “Uka da.” Dungal we rmengo: “Iya squwaq, iya bale rengo ngayan Utux Tmninun.”
11Qtai! Posa kari ka Utux Tmninun,
wada na hrahun bcbiciq ka sapah paru,
bcbiciq na ptakur ka sapah biciq.
12Mtduwa tmalang kdere ka dapa dmay ho?
Mtduwa tmabul rcilung ka dapa ho?
Kiya de yamu we pryuxan namu iyu pgcahu ini psaanak,
pryuxun namu iyu mngihur ka msderux noda.
13Yamu smkuxul Lo Debar we psparu namu rmengo:
“Uxe ta smtama beyax ta nanak ka mangal Qarnayim peni?”
14Rmengo ka Utux Tmninun, Utux Baro Mdoi Kana Supi:
“Sapah Israel! Qtai! Mptutui ku 1 qnlhangan meeyah mccebu yamu.
Meeyah tmsiiyax yamu,
mpeeyah Xamat tmayan betaq yayung Araba.”
Currently Selected:
Amos 6: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
