Amos 5

Mlawa Seediq Israel Ppriyux Lnglungan

1Israel! Qbahang uyas mbasi snmalu mu dyamu:

2Mptakur ka seediq Israel, ini tduwa mnpusal mheyu da.

Tnugsebuc dxeral ka heya we uka ka seediq dehuk pstutuy heya.

3So nii ka rnengo Utux Tmninun Bukung:

Alang Israel we smnkagul 10'00 heyi we, mpsngari 1'00 heyi.

Smnkagul 1'00 heyi we, mpsngari 10 heyi.

4So nii rnengo na sapah Israel ka Utux Tmninun:

Ging kenan, kiya ka mpkuudus namu.

5Iya osa migin Beytel,

Iya remux Gilgal,

iya osa Beerseba uri.

Ado qrapun madis ka Gilgal,

mpkuuka ka Beytel.

6Gimi Utux Tmninun, kiya ka mpkuudus namu,

so uxe pntena puniq mosa sapah Yosehu,

mpsqama Beytel, uka ka mosa mahung.

7Pnriyux speriq pgcahu ka ini psaanak ma,

qdanun namu dxeral ka msderux noda ka yamu nii!

8Snmalu ppngerah ma dmpngerah,

kmpryuxun na ledax mgrebu ka mkuung hhuqil,

kmpryuxun na keeman ka diyan we,

gisu mlawa rcilung,

sheruy na bobo dxeral we,

Utux Tmninun ka ngayan na.

9Ini beyo phuqil dseediq mbbeyax ka heya,

asi eyah qbrangan ka mpkuuka.

10Yamu we qnrquun namu ka seediq mnduwa dmoi gaya ckceka prngagan ma msderux rhengun alang,

tmraqil namu dseediq rmengo kari msderux.

11Kiya de qmleqah namu seediq qrinuc,

gmeeluk namu uqun ma pila daha.

Ani namu smnalu sapah btunux,

kiya we uxe namu meeniq hiya.

Ani namu pnhuma malu ba qnpahan lipas,

kiya we uxe namu miimah sino pneeyah hiya.

12Klaun mu qnquwan noda namu we teyal kneegu,

teyal pnparu ka qnquwan noda namu.

Phuqil namu seediq msderux noda, mangal namu lnabu,

prngagan rhengun alang we, mberiq namu psgao seediq qrinuc.

13Kiya de, uxe mprengo meeniq hiya ka dseediq niqan knkela,

ado so smiicu ka ciida.

14Igin malu oda ka yamu,

iya igin qnnaqah, kiya ka mpkuudus namu.

So kiya de, Utux Tmninun, Utux Baro Mdoi Kana Supi we,

ida so kari namu, mpsuupu yamu ka heya.

15Qnrqui ka naqah ma glaani ka malu,

oda msderux noda meeniq namu rhengun alang.

Nhuwa Utux Tmninun, Utux Baro Mdoi Kana Supi we,

mpghuwe dseediq Yosehu mnsngari.

16Maanu so kiya, rmnengo so nii ka Utux Tmninun Bukung, Utux Baro Mdoi Kana Supi:

“Mptngedux lmingis tsdamac kana luelu alang ka seediq.

Mpniqan ka seediq mprengo ckceka luelu alang:

‘Teyal ta bale! Teyal ta bale!’

Mlawa mqeepah meyah lmingis,

mlawa dmpkeela muyas mbasi meyah lmingis.

17Ckceka qnpahan lipas we niqan lingis tsdamac kana,

ado mooda ku ckceka daha ka yaku.”

Rnengo Utux Tmninun ka nii.

18“Dseediq kmpstama ali Utux Tmninun we so smtali!

Ma namu gisu gimun ka ali Utux Tmninun ho?

Ali mnkuung ma uka ledax ka kiya.

19Mntena so gisu qduriq rkelic rudu ma, gisu smterung sume dungal.

Mremux sapah sdahar qnabil ka baga na we, gisu qgutun quyu dungal.

20Ali Utux Tmninun we uxe mpkuung ma uka ledax,

mnkuung bale ma uka ani ledax peni?

21Riqu mu ka smseman namu,

ini mu qrasi ka pnsliyan namu uri.

22Ani namu mege snapuh psqama ma snapuh pnhgalang kenan,

uxe ku mpqaras mangal.

Uxe ku mqita snapuh ptbale bnege namu mtbeno tnbegan.

23Mplatac kenan ka hrenang namu muuyas,

ado uxe ku mpqbahang hrenang tubu namu.

24Tai so wano ba mntena so qurux mntudu qsiya qluli ka ini psaanak,

mntena so qnlliyan qsiya yayung ini sange ka msderux noda.

25Sapah Israel! 40 knkawas nniqan namu tadus brenux ciida, yaa namu bnege tnbugan ma pnhgalang kenan ka yamu peni? 26Mnhean namu qbsuran paru Sikut ma, tikung Kiyun snmalu namu nanak, kiya ka utux namu pngerah. 27Maanu so kiya, bkeun maku psquri dxeral tgdaya Darmeseq hiya.” Rnengo Utux Tmninun ka nii. Ngayan na we Utux Baro Mdoi Kana Supi.

Currently Selected:

Amos 5: Stgdaya

Highlight

Compare

Copy