2 Samuel 24
24
Smepu Kneegu Seediq ka Dawid
(1 No 21:1-27)
1Sqama seang na Israel ka Utux Tmninun. Kiya de pkddudul na ka Dawid rmengo dheya: “Osa, sai smepu kneegu ka seediq Israel ma Yehudah.” 2Rmengo Yoab smnegul heya ka Dawid: “Osa mkkesa kana pnswayan rudan Israel, peeyah Dan betaq Beerseba spegi ka seediq. So mu klaun kneegu na ka seediq.” 3Rmengo qbsuran paru ka Yoab: “Tai so Utux Tmninun, Utux Baro su we mprana msn1'00 kneegu seediq ma, betaq qtaan ba doriq tnpusu sapah mu ma qbsuran paru mu. Hmuwa ma su so nii mkmooda ho?” 4Kiya de uka llganan ka kari pnosa na Yoab ma dqbsuran dmudul supi. Kiya de Yoab ma dqbsuran supi we mlatac berah qbsuran paru mosa smepu seediq Israel ka dheya. 5Mtaril yayung Yarden ka dheya ma, pkobu ckceka ayu Gad, narac ssiyo alang Aroer, sipo quri Yajer. 6Meyah Gilad ma betaq dxeral Qades Hiti. Dungal we meyah Dan Yaan ma mooda mtqiri Cidon. 7Meyah betaq Cor alang qbrangan ma, mooda kana alang seediq Xiwiy ma Kenaan. Dungal we mosa betaq Beerseba dxeral Negeb Yehudah. 8Mkkesa kana dxeral ka dheya. Bobo mk9 idas ma mk20 ali ndaan daha mtqiri de, mbrinah Yerusalem ka dheya. 9Yoab ge, srengo na qbsuran paru ka kneegu seediq ndaan na smepu: Supi mdoi qyqeya mccebu ka quri seediq Israel we 80 mang heyi. Seediq Yehudah we 50 mang heyi.
10Bobo snpegan ka kana seediq de, Dawid we asi ba lihu lnglungan na. Rmengo Utux Tmninun ka Dawid: “Wada paru ba qnquwan mu noda di. Utux Tmninun! Braho su riyung, srwai ku hiya ka qnquwan noda mu. Ado teyal bale ba knngataq ka noda mu.” 11Mtutuy mgrebu ka Dawid, kari Utux Tmninun we dehuk Gad mpgeela kari Dawid, 12“Sai rmengo ka Dawid: ‘So nii kari na ka Utux Tmninun: 3 klegan ka spgkeela mu sunan. Geegi 1 na hiya. Kiya de so mu pdaun misu isu.’” 13Kiya de mosa rmengo Dawid hiya ka Gad ma smiling heya: “Ya su maangal 7 knkawas krayan qlhangan su? Uxe uri we 3 idas mpqduriq su peeyah berah pais su ho? Uxe uri maha 3 ali meniq ckceka qnlhangan su ka punu? Lnglungi bale saya, klaun mu mosa cmiyuk smnkagul kenan.” 14Rmengo Gad ka Dawid: “Msriqi riyung ka nii. Nuuqu ku asi huqil ckceka baga Utux Tmninun ado niqan msngari ka huwe na. Uxe ku ba meeniq baga seediq icil.”
15Kiya de Utux Tmninun we pknrexun na mnarux punu ka Israel. Peeyah mgrebu betaq sneengan na ali, peeyah Dan betaq Beerseba we 7 mang heyi ka wada mhuqil. 16Snkgulan baro ka satang pkuuka alang Yerusalem ciida, Utux Tmninun we brahun na ka lnglungan na ini na srwai peeyah ka pqraqil. Kiya de rmengo snkgulan baro kiya ka seediq ga moda pqraqil: “Baka da! Rdaani baga su da!” Snkgulan Utux Tmninun we gaga meeniq ssiyo sbetan mugi Arawnah seediq Yebus hiya. 17Qtaan Dawid ka snkgulan baro mooda phuqil seediq de, mquri Utux Tmninun rmengo ka heya: “Qtai! Wada ku mangal qnquwan noda ma, mnoda ku qnnaqah noda. Kiya de mnoda manu ka rahul miric nii ho? Tai so baga su we pqrii kenan ma tnsapah tama mu.”
18Ali ciida, meyah Dawid hiya ka Gad ma rmengo heya: “Osa mnkala sbetan Arawnah seediq Yebus hiya ma, slmei spuhan Utux Tmninun.” 19Pthei kari Gad pnosa kari Utux Tmninun ka Dawid ma steetu mosa. 20Qtaan Arawnah gisu steetu ka qbsuran paru ma dqbsuran mdayo de mosa nganguc ka heya ma, mosa tmbqelic berah qbsuran paru. 21Rmengo ka Arawnah: “Tnpusu sapah mu ma qbsuran paru mu we, ma su meyah betaq tnqliyan su hini ho?” Rmengo ka Dawid: “Kmbrigun mu ka sbetan su ma kmslmeun mu spuhan Utux Tmninun ppkuuka mnarux punu kana seediq.” 22Rmengo Dawid ka Arawnah: “Pusu tnsapah mu ma, qbsuran paru mu, seung nanak lnglungan su ngali ma saani smapuh. Tai, nii hini ka dapa ngali ssapuh ma, ngali qhuni psqama ka sbetan ma kudo dapa. 23Qbsuran paru! Kana nii, Arawnah we bege mu qbsuran paru kana.” Rmengo qbsuran paru ka Arawnah: “Tai so qrasun mangal Utux Tmninun, Utux Baro su.” 24Rmengo Arawnah ka qbsuran paru: “Uxe! Asi ka spuyu so knkrayan brigun mu. Uxe ku klmelux mangal qyqeya bnege su ssapuh mu Utux Tmninun, Utux Baro mu.” Kiya de brigun Dawid 50 skere ging ka dxeral sbetan mugi ma dapa. 25Smalu spuhan Utux Tmninun hiya ka Dawid ma, mege snapuh psqama ma snapuh ptbale. Mbahang dnurun quri dxeral hiya ka Utux Tmninun de, wada msange ka mnarux punu Israel di.
Currently Selected:
2 Samuel 24: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
