1 Qbsuran Paru 1
1
Qnhdean Knkawas Dawid
1Rudan knkawas na ka Dawid qbsuran paru. Ani hmilo lukus pbbaro we, ini kmuuxul. 2Rmengo heya ka dqbsuran mdayo heya: “Gime miyan 1 weewa riyung mpheyu berah su, mdayo sunan. Thiqan su mtaqi berah su, ida su maha muuxul.” 3Kiya de mklualang dxeral Israel migin weewa mbtunux riyung ka dheya. Kiya de slayun daha ka Abisag meeniq Sunem ma, desun daha qbsuran paru hiya. 4Mbtunux riyung taan ka weewa nii. Heya ka qmlahang ma dmayo qbsuran paru. Kiya de we, ini na thiqi msuupu taqi ka heya.
Gmeeluk Qbsuran Paru ka Adoniya
5Ciida, psparu riyung ka Adoniyah laqi Xagit, rmengo: “Mpqbsuran ku paru ka yaku”, kiya de psramal nanak tluungan na rulu, supi paapa dmay ma, smkagul 50 seediq tmalang berah na. 6Ini bale kseengi tama na ka heya, rmengo: “Ma su so kiya moda?” Malu bale heyi na ma, mntuting bukuy Absalom ka heya. 7Adoniyah ge, mpprengo daha Yoab laqi Ceruyah ma Ebyatar msapuh de, mbahang ma dmayo Adoniyah ka dheya. 8Kiya de Cadoq msapuh, Benayahu laqi Yehoyada, Natan mpgeela kari, Simiy, Reiy ma dmpahung supi Dawid we ini tuumal Adoniyah kiya. 9Adoniyah we smapuh dapa, miric ma, mtbeno tnbugan ssiyo Eyn Rogel btunux meniq btunux Joxelet hiya we, splawa na ka mtswai na lqlaqi qbsuran paru, kiya ka seediq Yehudah dqbsuran mdayo qbsuran paru. 10Kiya de ini na plaani ka Natan mpgeela kari, Benayahu, dmpahung supi Dawid ma, Selomoh mtswai na.
Phyegan Qbsuran Paru ka Selomoh
11Rmengo Batseba bubu Selomoh ka Natan: “Wada phyegan qbsuran paru ka Adoniyah laqi Xagit we, ini su qbahang ho? Dawid pusu tnsapah ta we ini pklai kiya. 12Saya, Aguh tgsai misu. Kiya ka tduwa pkuudus isu ma Selomoh laqi su. 13Asi osa Dawid qbsuran paru hiya ka isu, rngagi ka heya: ‘Pusu tnsapah mu ma pusu qbsuran paru mu! Uxe su sndehu rmnengo kenan: Asi ka lmutuc yaku ma qbsuran paru ka Selomoh laqi su ma, heya we asi ka tleung tluungan qbsuran paru mu peni? Hmuwa, ma Adoniyah ka wada phyegan qbsuran paru di?’ 14Qtai! Mpprengo namu qbsuran paru ciida, mpsnegul ku mremux ka yaku ma, yaku ka mpkbale kari su.”
15Mosa tqiyan qbsuran paru hiya ka Batseba. Ciida, rudan bale ka heya ma, nii sbleqan qmita Abisag laqi mqedil pneyah Sunem. 16Tmbqelic thmuku qbsuran paru ka Batseba ma, rmengo ka qbsuran paru: “Maanu ka pgsaun su?” 17Rmengo qbsuran paru ka Batseba: “Pusu tnsapah mu! Pnooda su Utux Tmninun, Utux Baro su smndehu kenan: ‘Asi ka lmutuc yaku maha mpqbsuran paru ka Selomoh laqi su ma, heya we asi ka tleung tluungan mu qbsuran paru ka heya.’ 18Saya, qtai! Wada phyegan qbsuran paru ka Adoniyah. Isu, pusu tnsapah mu ma, pusu qbsuran paru mu we, ini su pklai ka isu. 19Smnapuh egu ba dapa, miric ma, mtbeno tnbugan ma, wada na splawa ka lqlaqi qbsuran paru ma Ebyatar msapuh ma, Yoab qbsuran supi. Kiya de tnqliyan su ka Selomoh we ini na plaani kiya. 20Kiya de isu we, pusu tnsapah mu ma, pusu qbsuran paru mu! Pcmeyah sunan kana ka doriq seediq Israel. Gaga tmara sunan mprengo dheya, teta ima ka mptleung tluungan qbsuran paru bobo pusu tnsapah ma pusu qbsuran paru mu. 21Nasi uxe so kiya, wada su mosa msuupu pusu rudan su mtaqi ciida ka pusu tnsapah ma pusu qbsuran paru mu de, yaku ma Selomoh laqi mu we, maha daha ngalun niqan qnquwan mptbrinah ka yami di.”
22Qtai! Mpprengo daha qbsuran paru ka Batseba ciida, mremux ka Natan mpgeela kari. 23Rmnengo qbsuran paru ka duma seediq: “Qtai! Nii ka Natan mpgeela kari.” Mosa tgtemaq berah qbsuran paru ka Natan, 24rmengo ka Natan: “Pusu tnsapah mu ma pusu qbsuran paru mu, ye bale ba rmnengo su ‘Asi ka Adoniyah ka mplutuc tleung qbsuran paru mu ma, asi ka heya ka mptleung tluungan qbsuran paru’ mnesa su ho? 25Smnapuh egu dapa, miric ma, mtbeno tnbugan ali saya ka Adoniyah ma, splawa na ka lqlaqi qbsuran paru ma dqbsuran supi ma Ebyatar msapuh. Qtai! Gisu mekan ma mimah berah Adoniya ka dheya saya ma mddiras rmengo: ‘Tai so mpkuudus ani betaq knuwan ka Adoniya qbsuran paru!’ 26Quri so yaku we, kiya ka tnqliyan su ma, Cadoq msapuh, Benayahu laqi Yehoyada ma, Selomoh tnqliyan su we ini plawa yami ka heya. 27Yaa bale pneeyah pusu tnsapah mu ma pusu qbsuran paru mu ka nii ho? Betaq su ini rengo dtnqliyan su ka miima ka mptleung tluungan qbsuran paru bobo pusu tnsapah mu ma pusu qbsuran paru mu.”
28Cmiyuk ka Dawid qbsuran paru: “Plawa hini ka Batseba.” Kiya de meyah ma mheyu berah qbsuran paru ka Batseba. 29Smdehu rmengo ka qbsuran paru: “Mpsdehu ku Utux Tmninun muudus ani betaq knuwan, kiya ka dnoi baga knuudus mu pnlatac peeyah kana mnqraqil. 30Smndehu ku Utux Tmninun, Utux Baro nuIsrael mprengo ku isu: Asi ka mplutuc kenan phyegun qbsuran paru mu ka Selomoh laqi su. Asi ka heya ka mplutuc tleung tluungan qbsuran paru mu. Mooda ku so nii ali saya.” 31Kiya de, tgtemaq dxeral thmuku qbsuran paru ka Batseba ma rmengo: “Tai so mpkuudus ani betaq knuwan ka tnpusu tnsapah mu Dawid qbsuran paru mu!”
32Rmengo dungal ka Dawid qbsuran paru: “Plaani yaku hini ka Cadoq msapuh, Natan mpgeela kari ma, Benayahu laqi Yehoyada!” Kiya de meyah berah qbsuran paru kana ka dheya. 33Rmengo dheya ka qbsuran paru: “Adis ka dtnqliyan tnpusu sapah namu ma, ppaani dapa roba mu ka Selomoh laqi mu, adis betaq Gixon. 34Meeniq hiya, Cadoq msapuh ma Natan mpgeela kari ka mpheruy abura heya ma phyegun na mqbsuran paru nuIsrael ka heya. Mpiiyuk namu urung ka yamu ma, mpdiras namu rmengo: ‘Tai so mpkuudus ani betaq knuwan ka Selomoh qbsuran paru!’ 35Snegul heya eyah kenan ka yamu. Heya ka mplutuc kenan mqbsuran paru. Wada mu phyegun ma mpqbsuran paru Israel ma Yehudah ka heya.” 36Cmiyuk qbsuran paru ka Benayahu laqi Yehoyada: “Ameng! Tai so mprengo so nii uri ka Utux Tmninun, Utux Baro tnpusu sapah mu ma pusu qbsuran paru mu. 37Hmuwa mesa tnheyaq na qbsuran paru ka Utux Tmninun we, tai so mptena so nii mptheyaq Selomoh ka heya uri. Tai so maha hmrinas knparu tnluungan qbsuran paru Dawid ka tnluungan na qbsuran paru.”
38Kiya de mosa kana ka Cadoq msapuh, Natan mpgeela kari, Benayahu laqi Yehoyada, seediq Keretiy ma Peleti. Ppaun daha dapa roba Dawid qbsuran paru ka Selomoh ma, desun daha betaq Gixon. 39Mangal urung gaga psaan abura peeyah kobu ka Cadoq msapuh ma, sheruy na Selomoh. Kiya de miyuk iyuk urung ka dheya ma, mddiras mlawa ka seediq: “Tai so mpkuudus ani betaq knuwan ka Selomoh qbsuran paru!” 40Smnegul heya steetu baro kana ka seediq we miyuk iyuk ma, tddiras mqaras betaq so mhhebil hrenang daha ka dxeral.
41Mbahang hrenang nii ka Adoniyah ma kana seediq pnlawa na hani mnhedu mekan. Mbahang hrenang urung ka Yoab de, rmengo: “Hmuwa ma niqan hrenang so nii ka ckceka alang ho?” 42Hani rmnengo kari so nii, qtai! Gisu nii ka Yonatan laqi Ebyatar msapuh. Rmengo ka Adoniyah: “Remux hini! Seediq su malu noda ka isu, ida su maha madis malu kari ka isu.” 43Cmiyuk Adoniyah ka Yonatan: “Dawid pusu tnsapah ta we, wada pheyu Selomoh mqbsuran paru di! 44Qbsuran paru we pspuun na Selomoh smkagul ka Cadoq msapuh, Natan mpgeela kari, Benayahu laqi Yehoyada, seediq Keretiy ma Peleti. Dheya we spaapa daha dapa roba nqbsuran paru ka Selomoh. 45Hrigan abura mqbsuran paru Cadoq msapuh ma Natan mpgeela kari meniq Gixon heya ka Selomoh. Peeyah hiya gisu mqaras mnkala baro ma, mlgelu kana ka alang. Kiya ka hrenang bnhangan namu. 46Wada tleung tluungan qbsuran paru qnhlangan ka Selomoh da. 47Meyah smbeyax pusu tnsapah ta Dawid qbsuran paru ka dqbsuran mdayo qbsuran paru uri ma, rmengo: ‘Tai so Utux Baro we, prana pgkala knledax ngayan su ka ngayan Selomoh, prana knparu tluungan qbsuran paru su ka tnluungan na mqbsuran paru.’ Kiya de tmbqelic thmuku qlapo na hiya ka qbsuran paru ma, 48rmengo so nii ka qbsuran paru: ‘Utux Tmninun, Utux Baro nuIsrael we asi ka tndhuun. Ado ali saya mege 1 seediq tleung tluungan qbsuran paru mu ka heya ma, wada mu taan bale doriq mu uri da!’”
49Kiya de pkrkerang kana ka dadal Adoniyah ma, wada asi tutui ma mquri osa daha nanak. 50Miicu Selomoh ka Adoniyah, kiya de mtutuy ma, mosa qmerac urung spuhan. 51Niqan ka seediq mosa rmengo Selomoh: “Qtai! Miicu Selomoh qbsuran paru ka Adoniyah. Qtai! Gisu qmerac urung spuhan ka heya ma rmengo: ‘Tai so smdehu kenan ka Selomoh qbsuran paru, asi ka ini doi hlmadac phuqil kenan.’” 52Rmengo ka Selomoh: “Nasi seediq malu ka heya we, uxe mptuting ani 1 snuunux na. Nasi moda qnnaqah ka oda na we, ida phqilun.” 53Kiya de smkagul seediq ka Selomoh ma, sladu na peeyah spuhan ka Adoniya. Kiya de meyah thmuku Selomoh qbsuran paru ka heya. Rmengo heya ka Selomoh: “Osa sapah su di!”
Currently Selected:
1 Qbsuran Paru 1: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
