2 Samuel 20
20
Tbrinah ka Seba
1Gisu niqan 1 seediq uka dungus ka hiya, ngayan na we Seba gaga hiya. Heya we laqi Bikri seediq Binyamin. Miyuk urung ma rmengo ka heya:
“Uka lutuc ta Dawid ka ita,
Uka pnugluban ta laqi Yisay ka ita.
Seediq Israel! Brinah kobu namu nanak!”
2Kiya de malix Dawid mosa smnegul Seba laqi Bikri ka seediq Israel. Kiya de dseediq Yehudah peeyah yayung Yarden betaq Yerusalem we, ida smnegul qbsuran paru daha.
3Mosa sapah na qbsuran paru Yerusalem ka Dawid de, rbanan na ka 10 heyi dmqedil pqlahang sapah qbsuran cuuxal, dngaun na ma, ini na thiqi mtaqi. Mntena so mqedil mqrinuc lebun na betaq mhuqil ka dheya.
4Rmengo Amasa ka qbsuran paru: “Sai psseli kana ka seediq Yehudah ma mk3 de adis hini. Eniq hini ka isu uri.” 5Kiya de mosa psseli seediq Yehudah ka Amasa. Kiya we wada msgcuqi riyung ka heya ma, wada hmrinas ka ali prngagan. 6Rmengo Abisay ka Dawid: “Saya we hmrinas Absalom so kcugun bale sseeliq na ita ka Seba laqi Bikri. Adis tnqliyan su sai smdurak ka heya. So uxe maangal alang mbeyax qduriq peeyah berah doriq ta ka heya.” 7Kiya de smnegul Abisay kana ka seediq Yoab, Keretiy ma, Peleti ma kana supi ma peeyah Yerusalem mosa smdurak Seba laqi Bikri. 8Dehuk btunux paru Gibon ka dheya de, meyah smterung dheya ka Amasa. Mlukus lukus mccebu ka Yoab ma, hmabik smiru hlmadac ma, gaga rudu niya na ka hlmadac na. Mkkesa ciida ka Yoab we, mtuting dxeral peeyah rudu na hiya ka hlmadac. 9Rmengo Amasa ka Yoab: “Mtswai mu, malu su ho?” Kiya de, qmerac ngudus Amasa ka narac baga na ma, kmtunguh heya. 10Ini klai Amasa ka hlmadac gaga baga Yoab. Yoab de sbeytaq na nbuyas Amasa ka hlmadac. Chragu dxeral ka iraq na ma mhuqil ka Amasa de ini na npsali metaq di.
Yoab ma Abisay mtswai na we ida lmutuc mosa smdurak Seba laqi Bikri. 11Niqan kingal tnqliyan na Yoab gaga mheyu ssiyo bqerus Amasa rmengo: “Ima ka gmaalu Yoab, ima ka smnegul Dawid we, asi ka smnegul Yoab kiya.” 12Thiqan dara kana ka heyi Amasa ma mksaro ckceka elu. Qtaan na gisu mheyu kana ka seediq de, hrigun na peeyah ckceka elu hiya betaq qnpahan ka bqerus Amasa ma bungun na lukus. Ado qmnita asi heyu hiya ka dseediq mnoda hiya. 13Bobo wada hrigun peeyah elu ka bqerus de, smnegul Yoab mosa smdurak Seba laqi Bikri ka seediq.
14Seba ge, mooda mkkesa kana dxeral pnswayan rudan Israel betaq Abel gaga Beyt Maakah hiya. Kana gneegan we msseli smnegul heya. 15Dseediq smnegul Yoab we dehuk Abel Beyt Maakah hiya de tlbuwan daha ka Seba. Mqquri alang mssipo smmalu qbrangan qnalang alang ka dheya. So maha mtakur ka alang de, ckulun daha ka qnalang alang. 16Mlawa peeyah alang baro hiya ka 1 mqedil niqan knkela: “Qbahang! Qbahang! Rngagi bale ka Yoab: ‘Eyah kenan hini. Niqan kari rrengo mu heya.’” 17Smdaling mosa mqedil hiya ka Yoab de rmengo ka mqedil: “Isu ka Yoab ho?” Rmengo ka heya: “Un! Yaku.” Rmengo heya ka mqedil: “Bhangi ku hiya ka kari mqedil tnqliyan.” Rmengo ka Yoab: “Gisu ku mbahang.” 18Rmengo ka mqedil: “Peeyah cuuxal niqan ka kari so nii, asi ka mosa smiling Abel, kiya de maha mtleebu ka ooda. 19Meniq ku ckceka Israel yaku we mptbale ku ma kmtama ku bale. Isu saya we kmpseeliq su pusu ba alang Israel. Hmuwa su ka isu, ma su qmrequn pusu dnoi Utux Tmninun ho?” 20Rmengo ka Yoab: “Uxe. Uxe ku rmequn ma pkuuka alang! 21Uxe so kiya ka kari. Wano ba seediq pneeyah Eprayim, kiya ka laqi Bikri, Seba ka ngayan na ka gisu tbrinah kmremex Dawid qbsuran paru. Nasi su sbege ka 1 seediq nii de, mosa ku mlatac peeyah alang nii di.” Rmengo Yoab ka mqedil: “Qtai! Tunux na we bege misu peeyah baro alang.” 22Mqedil nii de sgkeela na dmudul rmengo ka kana seediq. Kiya de ngalun daha ka tunux Seba laqi Bikri ma, sqada daha Yoab. Miyuk urung ka Yoab de, mlatac peeyah alang kiya ka kana seediq ma, mbrinah mosa kobu daha nanak. Yoab we mbrinah Yerusalem mosa qbsuran paru hiya ka heya.
23Yoab we qmlahang kana supi Israel. Benayah laqi Yehoyada we qmlahang seediq Keretiy ma Peleti. 24Adoram we mpqlahang dseediq mpskuri. Yehosapat laqi Axilud we qbsuran mpatis ndaan. 25Sewa we mpatis. Cadoq dhaka Ebyatar we msapuh. 26Ira seediq Yair uri we msapuh nDawid uri.
Currently Selected:
2 Samuel 20: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
