2 Samuel 19
19
Smbeyax Dawid ka Yoab
1Rmengo Yoab ka duma seediq: “Qtai! Gisu mbasi lmingis Absalom ka qbsuran paru.” 2Kana supi we, mnbahang gisu mbasi lmingis laqi na ka qbsuran paru de, ali daha mbeyax mccebu we, wada asi kmpriyux ali tsdmatan. 3Ali ciida, gmurus mremux alang ciida ka dsupi ma, mntena so supi gisu qduriq ma msiqa riyung. 4Mubung dqeras ma pmbaro lmingis ka qbsuran paru: “Laqi mu Absalom! Absalom, laqi mu, laqi mu!” 5Mosa sapah qbsuran paru hiya ka Yoab ma rmengo: “Gisu su pqsiqa dqeras kana dqbsuran mdayo sunan ka ali saya! Dheya we dmnayo dmoi baga knuudus su ma, knuudus lqlaqi su ma mqedil su. 6Ma su lux gmaalu seediq tbrinah sunan ma, qmriqu su seediq gmalu sunan. Ali saya, ini su ba lnglungi ka dqbsuran mdayo ma dtnqliyan su. Klaun mu mita saya di, nasi muudus ka Absalom de, maha su mqaras mhuqil kana ka dyami. 7Kiya de heyu ma osa nganguc. Sai smbeyax ka dqbsuran mdayo sunan. Mpsdehu ku Utux Tmninun, nasi su ini osa nganguc de, keeman saya we, maha uka ani 1 seediq ka mptheyaq sunan. Nii we maha krinah paru bale pqraqil sunan pntnaun pngqrqilan peeyah su laqi betaq saya!” 8Kiya de mtutuy ka qbsuran paru ma, tleung rhengun alang ka heya. Rmengo dsupi ka duma seediq: “Qtai! Gaga tleung rhengun alang ka qbsuran paru.” Kiya de meyah berah qbsuran paru ka kana dsupi.
Mbrinah Yerusalem ka Dawid
Ciida, tena wada qduriq ma mbrinah kobu daha nanak dseediq Israel. 9Mpprengo kana ka pnswayan rudan Israel ma rmengo: “Dmnoi baga ita mnlatac peeyah baga pais ka qbsuran paru. Dungal we dmnoi baga ita mnlatac baga seediq Peliset uri. Saya ririh Absalom betaq mlatac dxeral nii ka heya. 10Wada mhuqil mccebu ka Absalom cnwiqan ta abura. Saya, ma namu lux ini ssquwaq, uxe namu pbrinah qbsuran paru peni?”
11Smkagul seediq mosa rmengo Cadoq ma Ebyatar dmsapuh hiya ka Dawid: “Kesa rmengo ka rdrudan Yehudah: ‘Tena betaq qbsuran paru hiya ka kari dseediq Israel. Ma namu htiyan ba bukuy ka pbrinah sapah qbsuran ka qbsuran paru ho? 12Mtswai maku ba ma 1 ba rudan ta. Ma namu tggila pbrinah maadis qbsuran paru di?’ 13Kesa rmengo namu ka Amasa: ‘Uxe 1 ba rudan ta ka ita peni? Nasi ku ini pheyu sunan pririh Yoab mqbsuran supi ani knuwan de, tai so pkdira kenan ka Utux Baro.’” 14So kiya, betaq pbrinah lhebun dseediq Yehudah ma mntena so kingal ba sapah ka dheya. Kiya de, smkagul seediq mosa rmengo qbsuran paru hiya ka dheya: “Psuupu kana qbsuran mdayo su ma eyah da qbsuran paru.”
15Mbrinah meyah ka qbsuran paru ma betaq yayung Yarden. Meeyah Gilgal smterung qbsuran paru ka seediq Yehudah ma, maadis qbsuran paru pntaril yayung Yarden ka dheya. 16Simiy laqi Gera ka seediq Binyamin pneeyah Baxurim we theyaq seediq Yehudah mtgaaguh hmeruc mosa smterung Dawid ka heya. 17Smnegul Simiy ka seediq Binyamin we 10'00 heyi. Dungal we Ciba tnqliyan Soro ma 15 lqlaqi na ma, 20 tnqliyan smnegul heya uri. Dheya nii we mtaril nhari yayung Yarden mosa berah qbsuran paru. 18Asu mtaril we pntaril qbsuran paru ma tnsapah na. Ida muyu malu qntaan qbsuran paru moda ka dheya.
Smruwa Simiy ka Dawid
Mntaril yayung Yarden ciida ka qbsuran paru we, meyah tmbqelic thmuku berah qbsuran paru ka Simiy laqi Gera. 19Rmengo qbsuran paru: “Ali mnlatac su peeyah Yerusalem ciida ka tnpusu sapa mu ma qbsuran paru mu we, mnoda tbrinah sunan ka tnqliyan su. Braho su iya ku hiya ngali niqan qnquwan noda mu saya ma, iya ku hiya lnglungi ma, iya ba psai lhebun su uri. 20Klaun mu ba niqan qnquwan noda mu. Qtai! Kana tnsapah Yosehu we, ali saya wano ba yaku ka meyah smterung tnpusu sapah mu ma qbsuran paru mu.” 21Rmengo ka Abisay laqi Ceruyah: “Betaq cmiyus mseang hnrigan abura Utux Tmninun ka Simiy de, uxe su naka phqilun ka heya peni?” 22Rmengo ka Dawid: “Lqlaqi Ceruyah, maanu pnugluban mu yamu. Betaq namu so nii tbrinah kenan ho? Tduwa ta pphuqil seediq ani ima ckceka Israel ka ali saya peni? Ini mu klai qbsuran paru dseediq Israel ka yaku saya peni?” 23Kiya de rmengo Simiy ka qbsuran paru: “Uxe su mphuqil ka isu.” Kiya de smdehu quri heya ka qbsuran paru.
Smbleyaq Mepiboset ka Dawid
24Mosa smterung qbsuran paru ka Mepiboset lqlaqi laqi Soro uri. Peeyah ali wada mlatac ma betaq ali mbleyaq mbrinah Yerusalem ka qbsuran paru we, ini trima papak, ini kugus ngudus ma, ini bahu lukus na. 25Meeyah smterung qbsuran paru ciida ka heya we, rmengo heya ka qbsuran paru: “Mepiboset, ma su ini theyaq kenan mosa ho?” 26Rmengo ka heya: “Tnpusu sapah mu ma qbsuran paru mu! Qbriqun ku na tnqliyan mu. Ali ciida, tnqilan su we pnsramal ku mosa paapa dapa roba ma kmptheyaq ku qbsuran paru mmaha. Ado mpika ka papak mu. 27Kiya de heya we wada pqnaqah rmengo tnqliyan su meeniq berah tnpusu sapah mu ma qbsuran paru mu ka heya. Kiya de, tnpusu sapah mu ma qbsuran paru mu we, mntena su snkgulan Utux Baro ka isu. Pdai nanak malu mesa su de, kchaya nak moda dhenu! 28Ado seediq ku mphuqil meniq berah tnpusu sapah mu ma qbsuran paru mu ka kana tnsapah mu. Qbsuran paru mu we betaq su mptheyaq peekan ckceka uqun qbsuran paru hiya ka yaku. So kiya de, maanu dungus mu maha ku mesa qbsuran paru dungal peni?” 29Rmengo heya ka qbsuran paru: “Iya treeru rmengo quri sunan nanak di? Mprengo ku sunan. Maha dkaun isu ma Ciba ka dxeral.” 30Rmengo qbsuran paru ka Mepiboset: “Betaq tbleyaq mbrinah ka tnpusu sapah mu ma qbsuran paru mu de, ani su sbege Ciba kana ka dxeral we, ini huwa uri.”
Smbleyaq Barjilay ka Dawid
31Hmeruc peeyah Roglim ka Barjilay seediq Gilad we, meyah dmayo qmlahang qbsuran paru ptaril yayung Yarden ka heya. Kiya de mtheyaq qbsuran paru mtaril yayung Yarden ka heya. 32Barjilay we 80 knkawas ka knrudan na di. Mneniq Maxanayim ciida we, mnadis uqun peekan qbsuran paru ka heya. Ado mbleyaq riyung ka heya. 33Rmengo Barjilay ka qbsuran paru: “Theyaq kenan mtaril ka isu. Dngaun misu ssiyo mu meniq Yerusalem hiya ka isu.” 34Cmiyuk qbsuran paru ka Barjilay: “Maha knhenu ka knuudus mu dungal, ye ini huwa mtheyaq ku qbsuran paru mosa Yerusalem peni? 3580 ka knkawas mu ma, ya ku maha mkela psaanak malu qtaan ma naqah qtaan dungal? Ya mu maha klaun gisu ku mekan malu uqun ka tnqliyan su dungal peni? Ya ku maha mbahang hrenang pnuuyas riso ma weewa dungal? Maanu ka soosa mu smgila qbsuran paru mu ka tnqliyan su ho? 36Biciq ba noda ka tnqliyan dmayo qbsuran mntaril yayung Yarden nii. Ani su ini ciyuk mbege su kenan ka so nii ho? 37Srwai ku posa sapah mu. Kmhuqil ku alang mu ma meeniq ku habung tama mu ma bubu mu hiya. Qtai! Gaga hini ka Kimham ngali tnqliyan su, Sai ptheyaq sunan mtaril ka heya. Malu qntaan su de, kesi mooda ka heya uri.” 38Rmengo ka qbsuran paru: “Tduwa mu desun theyaq mtaril ka Kimham. Mpuyu ku so malu qntaan su qmita heya. Kmdaun su we, ida mu daun.” 39Kiya de mtaril yayung Yarden ka kana seediq. Mntaril ka qbsuran paru uri. Tnguhan qbsuran paru ka Barjilay ma sbleqan na dmurun. Kiya de wada alang na nanak ka Barjilay. 40Mtaril ka qbsuran paru ma betaq Gilgal ma mtheyaq heya mntaril ka Kimham uri. Dseediq Yehudah ma dmeka seediq Israel we meyah smkawe mtaril qbsuran paru kana.
Msnqbsuran Paru ka Yehudah ma Israel
41Qtai! Meyah Dawid qbsuran paru hiya ka dseediq Israel ma, rmengo ka qbsuran paru: “Mtswai miyan ka dseediq Yehudah we, hmuwa wada gmruus hmaduc mtaril yayung Yarden qbsuran paru ma tnsapah qbsuran paru ma, kana dseediq smnegul sunan ka dheya?” 42Cmiyuk seediq Israel ka seediq Yehudah: “Ado Ddyami nanak ka qbsuran paru. Ma namu lux skseang ka nii di? Gaga miyan mekan uqun qbsuran paru ka yami peni? Bale ba we maanu ka bnege miyan na qbsuran paru ka yami peni?” 43Cmiyuk rmengo seediq Yehudah ka seediq Israel: “Niqan miyan msn10 pnugkmlean quri qbsuran paru ka dyami. Kiya ka ga meeniq heyi Dawid we, mgkala yamu niqan beyax miyan ka yami. Ma namu so nii smbiciq qmita yami ho? Uxe yami ka plaale ba rmengo pbrinah peeyah qbsuran paru peni?” Kiya de, kari seediq Yehudah we mgkala beyax daha kari seediq Israel.
Currently Selected:
2 Samuel 19: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
