2 Samuel 18
18
Ini Baka Absalom
1Smepu dseediq smnegul heya ka Dawid. Pheyu qbsuran mdudul 10'00 heyi ma 1'00 heyi daha. 2Dawid we, psnakun na tgtruwan ka supi: Meniq baga Yoab ka 1 tnugtruwan, meniq baga Abisay mtswai Yoab laqi Ceruyah ka 1 tnugtruwan ma, meniq baga Itay seediq Gat ka 1 tnugtruwan. Rmengo dsupi ka qbsuran paru: “Mptheyaq ku yamu mosa mccebu.” 3Rmengo ka dsupi: “Iya osa mccebu ka isu. Nasi nami qduriq de, uxe mplmngelung kenan ka dpais. Ani wada mhuqil dmeka ka yami we, uxe daha lnglungun uri. Saya we wano ba isu ka maha rmirih mang seediq nami. So kiya de dayo yami eniq alang toma ka isu.” 4Rmengo dheya ka qbsuran paru: “Malu mesa namu de, mpchaya ku moda ka yaku uri.” Kiya de mheyu rhengun alang ka qbsuran paru de, sn1'00 heyi ma sn10'00 heyi daha ka kana supi mosa mccebu. 5Tmgesa Yoab, Abisay ma, Itay ka qbsuran paru: “Ririh yaku, glaani ka Absalom riso kiya.” Tmgesa bale dqbsuran mdudul quri Absalom ka qbsuran paru. Mnbahang kana ka dsupi uri.
6Wada mquri breenux ka supi mosa mccebu supi Israel mccebu lmiqu Eprayim hiya ka supi daha. 7Meeniq hiya, ini baka berah dqbsuran mdudul Dawid ka dseediq Israel. Ali ciida, hbaro ka mnhuqil, 2 mang seediq kana daha. 8Mkgarang kana dxeral hiya ka mccebu. Ali ciida dsupi wada phqilun ckceka qhuni mliqu we, mgkala wada phqilun hlmadac.
9Asi lux smterung tnqliyan Dawid ka Absalom. Absalom we, gisu paapa dapa roba moda toma qhuni raus ka heya. Kiya we qriyan cida raus ka tunux na ma swiwil sduduy baro. Kiya de wada mlatac heya ka dapa roba tnpaan na. 10Qmita so nii ka duma seediq de, rmengo Yoab: “Qtai! Qmnita ku Absalom gaga pqeya qhuni raus baro.” 11Rmengo seediq rmnengo ka Yoab: “Qtai! Wada su qtaan de, ma su ini asi phqili dxeral hiya ka heya? Kiya de sduun misu 10 demux ging ma 1 habik qraqil.” 12Rmengo Yoab ka seediq kiya: “Ani ku dehuk mangal 10'00 ging ka baga mu we, uxe ku pdehuk ka phuqil laqi qbsuran paru uri. Ado mnbahang ku rmnengo sunan, Abisay ma, Itay ka qbsuran paru: ‘Qlahang riyung ka yamu, iya ku phqili ka Absalom riso kiya.’ 13Nasi ku ini kiicu qnhuqil mnoda ku kiya de, ani maanu ida maha mkela ka qbsuran paru. Isu uri we, maha su mheyu theya riyung ka isu uri.” 14Rmengo ka Yoab: “Uka ali mu tggila berah su!” Dmoi 3 smbrangan puto ka baga na Yoab ma, spooda na gisu muudus bobo qhuni raus baro ka Absalom de, asi na btaqi lhebun ka heya. 15Tmlibu Absalom ka 10 supi Yoab dmnoi qyqeya mccebu we, smipaq heya ma betaq phuqil heya.
16Miyuk urung ka Yoab de, mbrinah ka supi ma ini osa smdurak seediq Israel. Ado hmetur supi ka Yoab. 17Dheya ge, ngali daha ka bqerus Absalom ma sqada daha paru ba beling lmiqu hiya. Gtuwan daha egu btunux ka baro na. Qduriq kana ka seediq Israel ma, mbrinah kobu daha nanak ka dheya. 18Muudus ka Absalom han we meeniq ayu Qbsuran Paru pnheyu 1 eruc. Ado rmnengo ka heya: “Uka laqi mu mplutuc ngayan mu.” Kiya de saangal na ngayan na nanak, kesun daha Btunux pnteetu Absalom betaq saya.
Mbahang Hnqilan Absalom ka Dawid
19Rmengo ka Aximaac laqi Cadoq: “Sai mu tmalang rmengo ka qbsuran paru. Wada dmayo cmiyuk qbsuran paru ka Utux Tmninun ma, mlatac baga pais di.” 20Rmengo heya ka Yoab: “Saya we, iya osa pgkela kari ka isu han, saani pgkela bobo na. Ado mnhuqil saya ka laqi qbsuran paru ma, iya ba sai mneeru han.” 21Rmengo seediq Kusu ka Yoab: “Sai rmengo qbsuran paru ka qnita su.” Bobo mhedu thmuku quri Yoab ka seediq Kusu de, tmalang mosa di. 22Aximaac laqi Cadoq ge, rmengo Yoab dungal: “Ani hmuwa we srwai ku hiya tmalang smnegul seediq Kusu!” Rmengo ka Yoab: “Laqi mu, mosa su rmengo kari nii we, uxe su maangal snadu. Maanu ka soosa su hiya?” 23Rmengo ka heya: “Ani hmuwa we ida ku asi ka mosa.” Rmengo heya ka Yoab: “So kiya de osa wa!” Kiya de Aximaac we peeyah elu breenux tmalang mquri berah ka heya ma, wada na hrnasan ka seediq Kusu kiya.
24Gaga tleung cenga rhengun nganguc ma rhengun toma ka Dawid. Seediq mpdeda qmlahang ge, mosa mnkala pnharac qnalang alang mheyu bobo dnamux paga rhengun dmeeda qmita. Qmita, gisu tmalang nii ka 1 ba seediq. 25Paru hrenang na rmengo qbsuran paru ka heya. Rmengo ka qbsuran paru: “Nasi taxa ba heyi ka meyah we, ida ba maadis kari kiya.” Dmudul smdaling ka tnlaman na seediq kiya. 26Seediq mpdeeda qmlahang ge, qmita gisu meyah tmalang ka 1 seediq dungal, kiya de mlawa seediq mpqlahang rhengun: “Tai! Gisu tmalang hini dungal ka 1 seediq.” Rmengo ka qbsuran paru: “Seediq nii ge, maadis kari uri.” 27Rmengo ka seediq mpqlahang: “Qtaan mu ka plaale ba gaga tmalang we, so hari talang Aximaac laqi Cadoq.” Rmengo ka qbsuran paru: “Malu seediq ka heya ma ida gisu maadis malu kari kiya.”
28Mlawa qbsuran paru ka Aximaac: “Mtbleyaq di!” Kiya de tgtemaq dxeral dqeras na thmuku qbsuran paru ka heya. Rmengo: “Utux Tmninun, Utux Baro su we pusu ba tndhuun. Wada na sbege ka seediq pnheyu baga mnccebu tnpusu sapah mu ma qbsuran paru mu.” 29Smiling ka qbsuran paru: “Mbeyax ka Absalom riso ho?” Cmiyuk ka Aximaac: “Yoab we smnkagul tnqliyan qbsuran paru, kiya ka tnqliyan su ciida we, gisu mrrudu riyung ka dheya ma, ini mu klai gaga hmuwa ka dheya.” 30Rmengo ka qbsuran paru: “Osa icil, heyu hini.” Kiya de mbrinah bukuy ka heya ma, mheyu hiya.
31Qtai! Dehuk ka seediq Kusu ma rmengo: “Niqan kari rrengo mu tnpusu sapah mu ma qbsuran paru mu! Ali saya, Utux Tmninun we cmiyuk dmayo sunan ka heya. Betaq mlatac kana baga dseediq cmebu sunan.” 32Smiling seediq Kusu ka qbsuran paru: “Gaga mbeyax ka Absalom riso ho?” Rmengo ka seediq Kusu: “Tai so pais tnpusu sapah mu ma qbsuran paru mu ma, kana dseediq meyah phuqil sunan we, maha mntena riso kiya kana.” 33Pkrkerang ka qbsuran paru. Kiya de mosa tnugedux lmingis sapah baro alang hiya ka heya. Mkkesa ma rmengo: “Laqi mu Absalom! Laqi mu, laqi mu Absalom! Nuuqu yaku ka rmirih mhuqil sunan. Absalom! Laqi mu! Laqi mu!”
Currently Selected:
2 Samuel 18: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
