2 Samuel 17
17
Smeeliq Sneengan Axitopel ka Xusay
1Rmengo Absalom ka Axitopel: “Pgeegi ku 1 mang ma 20'00 heyi mosa smdurak Dawid keeman saya. 2Mpsdurak ku ma pkiicu dheya, pkelu gaga muuwic uka beyax baga daha ciida. Kiya de mpqduriq kana ka dseediq gaga smnegul heya. Wano ba qbsuran paru ka phqilun mu. 3Pbrnahun mu pqbahang sunan ka kana seediq ma, mntena so seediq smnegul sunan ka qmbahang seediq ga su sdrapun, Uxe mphuwa ka kana seediq.” 4Kari nii we mndungus meeniq ckceka doriq Absalom ma kana rdrudan Israel.
5Rmengo ka Absalom: “Plaani ka Xusay seediq Arki. Bhange ta ka kari na uri.” 6Betaq Absalom hiya ka Xusay. Rmengo heya ka Absalom: “Rmnengo so kari nii ka Axitopel ge, yaa ta mpuyu kari na mooda ho? Nasi su ini sruwa de, rengo ka isu!” 7Rmengo Absalom ka Xusay: “Uxe malu ka kari pneeyah Axitopel nii saya.” 8Rmengo dungal ka Xusay: “Ida su klaun. Tama su ma dseediq na we, mnpahung bale mccebu kana. Nasi mseang ka dheya de, maha mntena gisu glekan mangal wawa sume ka bubu sume mneeniq dxeral brenux. Kiya uri we, tama su we mkela ba mccebu ka heya ma, uxe mpsuupu mtaqi dseediq ka heya. 9Qtai! Yaani gaga mgleing beling lhengo uxe we icil. Nasi ita ka wada knama phqilun de, mprengo ka mnbahang: ‘Wada phqilun ka dseediq smnegul Absalom.’ 10Ani yaa so rkelic rudu ka beyax supi we, ida maha muuwic ka lhebun na. Ado niqan ba ngayan ka tama su ma ida to mnpahung riyung ka dseediq smnegul heya we, ida klaun bale kana Israel. 11Lnglungan mu we, asi su ka pssliun isu hini peeyah Dan betaq Beerseba ka dseediq Israel mntena so bnaquy rcilung kneegu. Isu ka mpdudul dheya mosa mccebu. 12Mosa ta nniqan na, ani ta strengun ani inu we lux ta sterung heya, so mhrehur dxeral ka dremus mtuting dxeral. So kiya de, uxe mptrangi ka heya ma dseediq smnegul heya. 13Netun so qduriq mosa alang inu ka heya we, maadis snuyuk mosa alang kiya ka kana seediq Israel ma, blbilun daha betaq ckceka yayung hiya, ani btunux biciq uxe daha slayun.” 14Rmengo ka Absalom ma kana seediq Israel: “Mgkala Axitopel knmalu ka sneengan Xusay seediq Arki!” Ririh gisu smeeliq sneengan Axitopel ka Utux Tmninun. Ririh gisu pqraqil Absalom ka Utux Tmninun.
Qduriq Mnbahang Kari ka Dawid
15Rmengo Cadoq ma Ebyatar dmsapuh ka Xusay: “So nii ka sneengan bnege na Absalom ka Axitopel ma rdrudan Israel, so nii ka sneengan bnege mu. 16Ptgaaguh smkagul seediq mosa rmengo Dawid: ‘Iya krabi ntrilan tadus brenux hiya. Asi osa mntaril yayung. So uxe maha pqhdeun ka qbsuran paru ma dseediq smnegul heya.’” 17Tmara Eyn Rogel hiya ka Yehonatan ma Aximaac we, nhuwa qtaun daha de, miicu mremux alang. Meyah ka 1 mqedil tnqliyan ma, srengo na dheya ka kari nii. Kiya de saun daha rmengo ka Dawid. 18Kiya de qmita dheya ka 1 riso tnqliyan de, mosa rmengo Absalom ka heya. Kiya de nugaaguh nhari mosa mlatac ka dheya ma, mosa 1 sapah seediq Baxurim. Gaga nganguc sapah nii ka saun bubul qsiya de, mosa toma hiya ka dheya. 19Mqedil tnsapah nii de bungan na ka quwaq hghugan bubul qsiya ma, rusan na mugi ka bobo na. Kiya de ini daha ba klai. 20Meyah sapah mqedil nii ka dtnqliyan Absalom ma rmengo: “Gaga inu ka Aximaac ma Yehonatan?” Rmengo dheya ka mqedil nii: “Wada mntaril yayung ka dheya di.” Mosa migin ka dtnqliyan ma, ini daha slai de wada mpbrinah Yerusalem.
21Bobo wada ka dheya de, mnkala peeyah bubul qsiya ka 2 heyi nii ma mosa rmengo Dawid: “Kmphuqil sunan ka sneengan Axitopel. Kiya de tutuy ma mtaril nhari yayung.” 22Kiya de mtutuy ma mtaril yayung Yarden ka Dawid ma dseediq smnegul dheya. Betaq lmedax we uka ani 1 ka msngari ini ntaril. 23Axitopel ge, mkela ini daha ngali ka sneengan na de, psramal dapa roba ma, mbrinah betaq alang na nanak. Hmiti patis ddurun na tnsapah na de, mosa cghuur mhuqil. Skuwan daha habung tama na.
24Dehuk Maxanayim ka Dawid. Absalom ma dseediq Israel smnegul heya we, mntaril yayung Yarden ka dheya uri. 25Absalom, phyegan na qbsuran supi ka mpririh Yoab. Amasa we laqi Yitra seediq Yismael ma mqedil Yitra we Abigayil weewa Naxas ma mtswai Ceruyah bubu Yoab. 26Pkobu Gilad ka Absalom ma seediq Israel.
27Dehuk Maxanayim ka Dawid. Sobi laqi Naxas seediq Rabah pneyah pnswayan rudan Amon ma Makir laqi Amiel pneeyah Lo Debar ma, Barjilay seediq Gilad pneyah Roglim we, 28gisu madis pala, ribo, pngerah, mugi biciq, mugi paru, nemu mugi, mugi hnreno, beluh, layan mtanah, mugi nuduh ma, 29beyuq walu, buwa nunuh, miric rudu ma pang snmalu nunuh ma, speekan daha Dawid ma dseediq smnegul heya. Ado lmngelung ka dheya: “Ida gaga muure ma mhqeni muuwic riyung ka dseediq mneniq tadus brenux.”
Currently Selected:
2 Samuel 17: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
