2 Samuel 16
16
Dawid ma Ciba
1Hani hmeruc bungu dgiyaq ka Dawid, qtai! Nii tmulus 2 dapa roba gaga psaun qraqil spilan ma, gisu maapa 2'00 pang, 1'00 pang snmalu lipas, 1'00 heyi pnhgalang rbagan ma, 1 lubuy sino ka Ciba tnqliyan Mepiboset. 2Rmengo Ciba ka qbsuran paru: “Maanu dungus na ka qyqeya nii ho?” Rmengo ka Ciba: “Ppaan tnsapah qbsuran paru ka dapa roba, pang ma pang smnalu pnhgalang rbagan we, pqdalun driso kiya. Sino we pmahun dseediq gaga muuwic ckceka tadus brenux.” 3Rmengo ka qbsuran paru: “Gaga inu ka laqi tnpusu sapah su ho?” Cmiyuk qbsuran paru ka Ciba: “Qtai! Gaga meeniq Yerusalem ka heya, ado rmnengo ka heya: ‘Tnsapah Israel we, maha na sbege kenan saya ka qlhangan tama mu.’” 4Rmengo Ciba ka qbsuran paru: “Qtai! Kana nMepiboset we nnisu kana.” Rmengo ka Ciba: “Thmuku ku tnpusu sapah mu ma qbsuran paru mu. Tai so maangal ku huwe meniq berah doriq su.”
Dawid ma Simiy
5Betaq Baxurim ka Dawid. Qtai! Pneeyah hiya ka 1 seediq. Ngayan na we Simiy laqi Gera tnsapah Soro. Smiyus mkkesa ka heya. 6Dungal we cmebu btunux quri Dawid qbsuran paru ma dqbsuran mdayo qbsuran paru. Gaga meniq ssiyo qbsuran paru ka dseediq ma supi na. 7Smiyus rmengo so nii ka Simiy: “Isu so nii smkuxul psdara seediq ma, uka dungus we, osa da! Osa da! 8Wada su psdara kana tnsapah Soro ka isu ma, lmutuc su qbsuran paru heya. Utux Tmninun we, bbege na heyi su ka qnquwan noda nii. Utux Tmninun we, bege na baga Absalom laqi su ka qlhangan nii. Qtai! Snlayan su nanak ka nii, ado smkuxul su psdara seediq ka isu.”
9Rmengo qbsuran paru ka Abisay laqi Ceruyah: “Ma nii cmiyus mseang tnpusu sapah mu ma qbsuran paru mu ka huling mnhuqil nii peni? Posa ku maangal tunux na han!” 10Rmengo ka qbsuran paru: “Laqi Ceruyah. Maanu ka pnugluban mu yaku dhaka yamu? So nii snyusan na mseang we, ado rmnengo ‘Syusi mseang ka Dawid’ mesa ka Utux Tmninun. Nasi so kiya de, ima ka mprengo: ‘Ma su so kiya ho?’” 11Rmengo dungal Abisay ma kana dqbsuran mdayo ka Dawid: “Qtai! Ani laqi mu ba we, gisu migin knuudus mu. Laxi hiya ka seediq Binyamin nii di! Uqu nanak cmiyus mseang hiya! Ado rnengo Utux Tmninun heya ka nii. 12Nhuwa qmita so nii ndaan mu mqraqil ma, so seediq nii ndaan na cmiyus mseang kenan ka Utux Tmninun de, mege huwe kenan ka heya.” 13Kiya de ida mkkesa elu ka Dawid ma dseediq na. Gaga mkkesa sipo mcherus hiya ka Simiy. Smiyus mseang mkkesa ma, cmebu btunux quri heya ma murus dxeral dheya. 14Muuwic riyung ka qbsuran paru ma dseediq na smnegul. Kiya de msange hiya ka dheya.
Meeniq Yerusalem ka Absalom
15Meyah Yerusalem ka Absalom ma seediq Israel. Mtheyaq heya meyah ka Axitopel uri. 16Meyah Absalom hiya ka dangi Dawid Xusay seediq Arki ma rmengo heya: “Tai so mpkuudus ani betaq knuwan ka qbsuran paru! Tai so mpkuudus ani betaq knuwan ka qbsuran paru!” 17Rmengo Xusay ka Absalom: “So ba kiya ka ssbleyaq su dadal su ho? Ma su ini osa smnegul dadal su peni?” 18Cmiyuk Absalom ka Xusay: “Uxe. Ima ka Utux Tmninun ma seediq nii ma, nugeegan dseediq Israel ka snolun mu ma, meeniq ku hiya. 19Dungal we ima ka qqpahun mu peni? Uxe laqi qbsuran paru tglaale peni? Hmuwa ku mesa meepah tama su de, maha so kiya meepah ku sunan uri.”
20Rmengo Axitopel ka Absalom: “Peeyah lnglungan namu, huwa ta kesun mooda ho?” 21Rmengo Absalom ka Axitopel: “Hniti tama su ka dmqedil mpqlahang sapah qbsuran paru we, tduwa su mtheyaq mtaqi dheya. Dseediq Israel we, mnbahang qnrquun ba tama su ka isu de, maha krinah tmtkere ka baga dseediq smnegul sunan.” 22Kiya de spkobu daha bobo dnamux sapah ka Absalom. Kiya de meniq berah doriq Israel msuupu mtaqi mmqedil tama na ka Absalom. 23Lnglungan pneeyah Axitopel we mntena so sniling daha pneeyah Utux Baro ciida. Kana lnglungan bnege na Dawid ma Absalom we mntena kana.
Currently Selected:
2 Samuel 16: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
