2 Samuel 15
15
Tbrinah ka Absalom
1Bobo na nii, psramal rulu mccebu na nanak ka Absalom ma, smnkagul 50 heyi tmalang meeniq berah na. 2Mtutuy mgrebu klaali ka Absalom ma, mosa mheyu ssiyo elu rhengun alang ka heya. Niqan ka pnkseengan eeyah daha psgao qbsuran paru ka ani ima seediq we, rngagan na: “Seediq su alang ini?” Rmengo ka heya: “Yaku we seediq ku 1 pnswayan rudan Israel.” 3Rmengo heya ka Absalom: “Tai! Prngagun su we, ida bale ba kiya. Ani so kiya we, ini skagul seediq mbahang prngagan su ka qbsuran paru.” 4Dungal we rmengo ka Absalom: “Nasi yaku ka mpsgao dxeral hini! Kana seediq mooda mpprengo we, eyah yaku hini. Daun mu ba ini psaanak psgao.” 5Nasi niqan seediq meyah thmuku Absalom de, hmkero baga na ka heya ma tnguhan na. 6Kana mmaha psgao qbsuran paru hiya ckceka Israel we, kesun na mooda kana ka Absalom. Kiya de metaq mangal lhebun seediq Israel ka Absalom.
7Wada hmrinas 4 knkawas, rmengo qbsuran paru ka Absalom: “Braho su srwai ku hiya posa Xebron ma, maha ku smapuh sndhegan mu dmurun Utux Tmninun. 8Ado mneeniq ku Gesur dxeral Aram hiya ciida we, smndehu ku: ‘Utux Tmninun, nasi su pbrnahun Yerusalem ka yaku de, mpqeepah ku heya ka yaku.’” 9Rmengo heya ka qbsuran paru: “Tbleyaq mosa!” Kiya de mlatac mquri Xebron ka Absalom. 10Gmuruus smkagul seediq mquri kana pnswayan rudan Israel ka Absalom ma posa kari: “Mbahang namu hrenang nyupan urung de, asi rengo: ‘Gaga mqbsuran paru Xebron hiya ka Absalom di!’” 11Meniq Yerusalem ka Absalom we, madis 2'00 heyi seediq mtheyaq mosa. Dheya nii we bale ba niqan lnglungan daha mosa. Kiya de ini bale kela mmooda manu ka dheya. 12Smapuh ciida ka Absalom we, smkagul seediq mosa mlawa Axitopel seediq Giloh pneeyah alang Giloh. Heya we gaga ngalan mdayo rmengo kari Dawid. So kiya de mrrudu riyung ka tbrnahan daha, ado mumal hbaro ka seediq smnegul Absalom.
Qduriq Peeyah Yerusalem ka Dawid
13Mosa Dawid hiya ka mprengo kari ma rmengo: “Gaga mqquri Absalom kana ka lhebun dseediq Israel!” 14Kiya de Dawid we rngagan na kana ka dqbsuran mdayo gaga smnegul heya Yerusalem hiya: “Tutui! Asi ta qduriq nhari! Ini so kiya de, uxe ta mpskela qduriq Absalom di. Asi ka nhari mlatac, so uxe nugaaguh na mpskela ita ma phuqil ita ma, mdoi hlmadac phuqil seediq alang.” 15Rmengo qbsuran paru ka dqbsuran mdayo: “Kana kmddaun su moda we, qtai! Ida mpsnegul kana ka tnqliyan.” 16Kiya de mlatac nganguc ka qbsuran paru. Kana tnsapah na we, ida smnegul heya kana. Kiya de, rngiyan na 10 mqedil na mpqlahang sapah qbsuran paru hiya. 17Mlatac nganguc ka qbsuran paru de, smnegul heya ka seediq. Betaq Bicmoha de, msange ka dheya. 18Mosa ssiyo na heya kana ka dqbsuran mdayo. Dseediq Keretiy, Peleti ma, 6'00 heyi dseediq Gat smnegul qbsuran paru pneeyah Gat we, ida mosa berah qbsuran paru kana.
19Rmengo Itay seediq Gat ka qbsuran paru: “Seediq su icil ka isu ma, qnduriq su pneeyah alang su. Hmuwa betaq su mtheyaq yami mosa duri? Osa brinah bgurah qbsuran paru hiya ka isu! 20Hani su mneyah ciga ka isu. Huwa su kesun msuupu mtheyaq yami qduriq, kiya we uka dnungusan ka ssaun mu. Brinah di, Adis mbrinah ka mtswai su! Tai so mtbale huwe na sunan ka Bukung.” 21Cmiyuk qbsuran paru ka Itay: “Mpsdehu ku Utux Tmninun muudus ani knuwan. Kiya uri we mpsdehu ku berah qbsuran paru, ani muudus ma ani mhuqil, meeniq inu ka qbsuran paru de, ida meeniq hiya ka tnqliyan su uri.” 22Rmengo Itay ka Dawid: “Osa, osa hiya!” Kiya de Itay seediq Gat we madis dseediq smnegul heya ma lqlaqi mosa di. 23Mhedu msseli mosa kana ka dheya de, asi pmbaro lmingis ka kana seediq gaga meeniq hiya. Mntaril yayung Qidron ka qbsuran paru ma, smnegul mquri elu mosa quri tadus brenux ka seediq.
24Qtai! Cadoq ma kana seediq Lewiy mheal kulu pnsdhegan Utux Baro we nii meyah hiya uri. Rduwan daha ka kulu pnsdhegan Utux Baro de, meyah baro ka Ebyatar. Betaq wada mlatac peeyah alang ma mosa psseli ka kana seediq. 25Rmengo Cadoq ka qbsuran paru: “Pbrinah alang ka kulu pnsdhegan Utux Baro. Nasi mege huwe kenan meeniq berah doriq Utux Tmninun de, pbrnahun ku na mptqita kulu pnsdhegan ma nniqan na. 26Nasi rmengo so nii ka heya: ‘Ini ku skuxul sunan’. Gisu ku hini, asi pooda malu qnita na doriq mquri kenan!” 27Rmengo Cadoq msapuh ka qbsuran paru: “Uxe su mnama mkela ka isu peni? Tduwa su tbleyaq mbrinah alang ka isu. 2 laqi su, Aximaac laqi su ma Yehonatan laqi Ebyatar tduwa theyaq sunan mbrinah. 28Qtai! Mptara ku ntrilan tadus brenux hiya ma, betaq su madis kari kenan.” 29Kiya de Cadoq ma Ebyatar we, pbrnahun na Yerusalem dungal ka kulu pnsdhegan Utux Baro. Kiya de meniq hiya ka dheya.
30Dawid we mubung tunux ma ini posa ramil mkkesa steetu ddgiyaq Curung ma, tllingis mkkesa. Dseediq smnegul heya we ida mubung tunux tllingis mosa txtaxa daha uri. 31Rmengo Dawid ka duma seediq: “Gaga smnegul ma ckceka Absalom ttbrinah hiya ka Axitopel uri.” Rmengo ka Dawid: “Utux Tmninun! Braho su so maha mngataq ka sneengan ooda Axitopel!” 32Dehuk bungu dgiyaq thmkuwan Utux Baro ka Dawid. Qtai! Xusay seediq Arki we, smgaliq lukus ma murus dxeral tunux meyah smterung heya. 33Rmengo heya ka Dawid: “Nasi su mtheyaq yami de, maha su smgila menan di. 34Nasi su mbrinah alang ma, sai rmengo ka Absalom: ‘Qbsuran paru! So ku maha tnqliyan su. Yaku we ntnqliyan ku tama su han, peeyah saya de mptnqliyan ku sunan uri.’ So kiya de, tduwa su smeeliq sneengan ooda Axitopel. 35Uxe gaga meniq isu hiya ka Cadoq ma Ebyatar dmsapuh peni? Maanu ka bnhangan su pneeyah sapah qbsuran paru de, sai rmengo Saduk ma Ebyatar dmsapuh. 36Qtai! Aximaac laqi Cadoq ma Yehonatan laqi Ebyatar we, gaga mtheyaq 2 dmsapuh hiya uri. Kana qntaan su we, tduwa su drunun 2 seediq nii, meyah rmengo kenan ka dheya.” 37So kiya de, mremux alang ka Xusay dadal Dawid. Absalom we mremux Yerusalem uri.
Currently Selected:
2 Samuel 15: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
