2 Samuel 14
14
Lmngelung Ppeeyah Absalom ka Yoab
1Yoab laqi Ceruyah we mkela gisu lmngelung bale Absalom ka qbsuran paru. 2Kiya de Yoab we smkagul seediq mosa Teqoa, mlawa 1 mqedil niqan ba knkela ma rngagan na: “Mnnangi mbasi. Plukus lukus mbasi ma iya pdeping. Hnyegan su we pntena so mqedil bnsiyaq su mbasi quri wada mhuqil. 3Osa qbsuran paru hiya ma keso nii rmengo.” Kiya de Yoab we psaun na quwaq na ka kari rrengo na.
4Mosa berah qbsuran paru ka mqedil pneyah Teqoa de, tgtemaq dxeral thmuku ma rmengo: “Qbsuran paru! Dyagi ku!” 5Rmengo heya ka qbsuran paru “Hmnuwa su?” Rmengo ka heya: “Mqedil ku mqrinuc ba ka yaku ma, wada mhuqil ka rseno mu di. 6Niqan 2 ka laqi mu rseno we, mtgdiyal qnpahan hiya ma uka ka mptaayus dheya. Kiya de wada phuqil taxa heyi ka taxa daha. 7Qtai! Kana tnsapah we, mtutuy meyah kmremux kenan ka dheya ma rmengo: ‘Peeyah ka wada phuqil mtswai kiya, klaun miyan phuqil ka heya ma, dmahur knuudus mtswai na wada na phqilun ka mpririh pusu dnoi na.’ So kiya de, kmphengun daha ka nngari bagah ma, uxe daha rngiun bobo dxeral hini ka ngayan rseno mu.” 8Rmengo mqedil Teqoa ka qbsuran paru: “Osa sapah su! Ririh isu mposa ku kari.” 9Rmengo qbsuran paru dungal ka mqedil Teqoa: “Tnpusu sapah mu, qbsuran paru mu, tai so qnquwan noda nii we maha meeniq kenan ma sapah mu. Uka pnugluban na qbsuran paru ma tnlengan su ka nii.” 10Rmengo ka qbsuran paru: “Nasi niqan ka meyah smriqu rmengo sunan we adis kenan hini. Kiya de uxe mpnpusal prudu sunan.” 11Rmengo ka mqedil: “Tai so smdehu su Utux Tmninun, Utux Baro su, uxe su mpciyuk dseediq pnsdara ma, so uxe mphuqil laqi mu ka dheya.” Cmiyuk ka qbsuran paru: “Mpsdehu ku Utux Tmninun muudus ani knuwan. Laqi su we, ani 1 snuunux uxe mptuting dxeral.” 12Rmengo ka mqedil: “Braho su tnpusu sapah mu ma qbsuran paru mu, prngagi ku hiya 1 kari dungal.” Rmengo ka qbsuran paru: “Rengo!” 13Rmengo ka mqedil: “Qbsuran paru, ma so nii lnglungan su kmphuqil seediq Utux Baro ho? Betaq su ini srwai pbrinah ka seediq qnduriq. So nii ka kari su de, gisu ptuura qnuqu su nanak ka nii di! 14Mphuqil ta kana ka ita. Mntena ta so qsiya wada scuwaq dxeral we uka tbrihan dmahur. Utux Baro ge, uka lnglungan na pphuqil seediq ka heya. Kiya de kmdayo so uxe llwaqun ma so uxe daha laxun ka seediq qnduriq. 15Saya, meyah ku rmengo pusu tnsapah mu ma qbsuran paru mu, ado gisu pkiicu kenan ka seediq. Kiya ka lmngelung ka tnqliyan: ‘Rngane ta qbsuran paru. Ida yaa mciyuk dnurun ta ka heya. 16Gisu kmtheyaq phuqil kenan ma laqi mu peeyah dxeral Utux Baro ka seediq we, ida so mpqbahang ma mdoi baga tnqliyan mlatac peeyah baga daha.’ 17Lmngelung ka tnqliyan: ‘Ida maha smbleyaq kenan ka kari pusu tnsapah mu ma qbsuran paru mu.’ Ado pusu tnsapah mu ma qbsuran paru mu we mtduwa psaanak malu ma naqah kiya, mntena so snkgulan Utux Baro. Tai so mtheyaq sunan ka Utux Tmninun, Utux Baro su.” 18Rmengo mqedil ka qbsuran paru: “Ssiling mu sunan we iya leing ma ciyuk kenan.” Cmiyuk ka mqedil: “Qbsuran paru, rngagi ku hiya.” 19Rmengo ka qbsuran paru: “Uxe pnooda snraki Yoab sunan ka nii ho?” Cmiyuk ka mqedil: “Mpsdehu ku berah tnpusu sapah mu ma qbsuran paru mu. Rnengo tnpusu sapah mu ma qbsuran paru mu we ini ba sridil. Rnengo Yoab tnqliyan qbsuran paru ka nii. Kana kari nii we, pnosa na quwaq mu. 20Mnoda oda nii ka Yoab we, kmpriyux so ooda ka pusu na. Kiya we, knkela su we mntena so knkela snkgulan Utux Baro mkela su kana noda bobo dxeral.”
21Rmengo Yoab ka qbsuran paru: “Qtai! Mpsruwa ku ka noda nii. Osa ma, desi hini ka Absalom riso kiya.” 22Tmbqelic thmuku dxeral ka Yoab ma smbleyaq qbsuran paru ma rmengo: “Qbsuran paru, wada su smruwa noda nii de, tnqliyan su we gisu mkela gmhuwe su meniq berah doriq tnpusu tnsapah mu ma qbsuran paru mu.” 23Kiya de mtutuy mosa Gesur ka Yoab ma desun na Yerusalem ka Absalom. 24Rmengo ka qbsuran paru: “Posa sapah na nanak. Iya pyahi pqita dqeras mu.” Kiya de mbrinah sapah na ka Absalom ma, ini qita dqeras qbsuran paru.
Smruwa Absalom ka Dawid
25Kana Israel we uka ka so mntena Absalom qnsdiqan heyi ma tndhuun seediq. Peeyah qapal papak betaq tunux uka ba ramus na ka heya. 26Qnhdean knkingal knkawas we tapan hiya texal ka snuunux na. Ado sgcuqi knchedil ma ntapan ka snuunux na we seengun seengan qbsuran paru de yaa ba 2'00 skere. 273 laqi na rseno ma 1 laqi na mqedil ka Absalom. Tamar ngayan na ka laqi na mqedil ma mbtunux ba weewa.
28Meeniq Yerusalem betaq 2 knkawas ini qita qbsuran paru ka Absalom. 29Smkagul seediq mosa mlawa Yoab ka Absalom. So maha dmurun heya mosa qbsuran paru hiya. Kiya we ini sruwa meyah ka heya. Mn2 mosa mlawa we, ida ini sruwa meyah ka heya. 30Kiya de rmengo tnqliyan na ka Absalom: “Qtai! Msdaling qnpahan mu ka qnpahan Yoab. Gaga niqan mugi paru ka hiya. Kiya de sai lmaung yamu ka kiya.” Kiya de dtnqliyan Absalom we mosa lmaung qnpahan kiya. 31Mtutuy ka Yoab ma mosa sapah Absalom ma rmengo heya: “Hmuwa, ma meyah lmaung qnpahan mu ka tnqliyan su?” 32Cmiyuk Yoab ka Absalom: “Qtai! Smnkagul ku seediq mosa mlawa sunan, so su mosa qbsuran paru hiya, mosa rmengo: ‘Maanu pusu na splawa su kenan peeyah Gesur? Nuuqu malu meniq ku hiya.’ Sai ku pqita qbsuran paru saya. Nasi niqan qnquwan noda mu we, asi ku phqili kesa.” 33Kiya de mosa qbsuran paru hiya ka Yoab. Rngagan na ka qbsuran paru ma, mlawa Absalom ka qbsuran paru. Mosa qbsuran paru hiya ma tmbqelic dxeral dqeras meniq berah qbsuran paru. Tmunguh quwaq Absalom ka qbsuran paru.
Currently Selected:
2 Samuel 14: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
