2 Samuel 13
13
Amnon ma Tamar
1Bobo na mnoda 1 ooda. Absalom laqi Dawid we, niqan 1 mtswai na mqedil mbtunux riyung. Ngayan na we Tamar. Amnon laqi Dawid we smkuxul riyung heya. 2Betaq mnarux smkuxul Tamar ka Amnon. Ado ida ini osa rseno ka Tamar. Kiya de maha msriqu hari quri heya mesa ka Amnon. 3Niqan 1 dangi ba Amnon, Yonadab laqi Simea mtswai Dawid. Yunadac nii we mnaqah riyung. 4Rmengo Amnon ka heya: “Laqi qbsuran paru! Ma su ini rengo kenan ma betaq su dmudul mkure ali ali?” Rmengo heya ka Amnon: “Kuxul mu ba ka Tamar mtswai Absalom.” 5Rmengo heya ka Yehonadab: “Nnangi mnarux ma taqi qlapo ka isu. Tara meyah qmita sunan ka tama su de, rngagi ka heya: ‘Peeyah kenan hini ka Tamar mtswai mu ma, pphrayun mu ma mbege uqun kenan. So mu tduwa qtaan ma, meekan uqun peeyah baga na.’” 6Kiya de mnnangi mnarux mtaqi qlapo ka Amnon. Meyah qmita heya ka qbsuran paru. Rmengo qbsuran paru ka Amnon: “Peeyah hini ka Tamar swai mu mqedil ma pphrayun mu daha pang meniq berah mu ma, maangal ku uqun peeyah baga na.”
7Kiya de smkagul seediq ka Dawid rrengo na Tamar: “Osa sapah Amnon mtswai su ma, psrmani uqun na.” 8Kiya de mosa sapah Amnon mtswai na ka Tamar. Gisu mtaqi ka Amnon. Maangal nemu mugi, gmteruc nemu mugi smalu pang berah na ka Tamar ma duhun na. 9Bsagun na ka supih ma hrigan na berah na ka pang. Kiya we ini sruwa mekan ka heya. Rmengo ka Amnon: “Latac kenan ma osa nganguc ka ani ima!” Kiya de mlatac heya ma mosa nganguc kana ka seediq. 10Rmengo Tamar ka Amnon: “Adis tqiyan hini ka uqun. Angal mu peeyah baga su uqun mu.” Kiya de desun Tamar tqiyan Amnon ka hnpure. 11Smdaling qqdiyal na heya ka Tamar we Amnon ge, qrapi na ka Tamar ma rngagan na: “Mtswai mu, suupu ta mtaqi!” 12Rmengo ka Tamar: “Qbsuran, iya! Iya ku ba psqai! Ini oda so nii ka ckceka Israel. Iya oda qnnaqah oda nii! 13Niqan pnqsiqa mu de, maha ku inu ka yaku di? Quri so isu we, ngalun su daha seediq mngataq ka isu meeniq ckceka Israel. Saya, tduwa su mesa qbsuran paru. Uxe mphetur mege yaku sunan ka heya uri.” 14Kiya de ida ini qbahang kari na ka Amnon. Ado mgkala heya ka beyax na ma, wada na psqaun ka heya ma msuupu mtaqi heya.
15Bobo na nii, Amnon ge qnrquun na riyung ka Tamar. Hmrinas gnluwan na ka qqnriqu na heya, rmengo heya: “Tutuy ma osa di!” 16Rmengo Amnon ka Tamar: “Iya so kiya! Qnnaqah su lmiwaq yaku we mgkala so ndaan su kenan kiya da!” Kiya de ini qbahang heya ka Amnon. 17Kiya de mlawa tnqliyan na ma rmengo: “Liwaq peeyah yaku hini ka mqedil nii! Mosa nganguc ka heya de, asi lebi ka rhengun.” 18Mlukus lukus rako bbaro usuk ka Tamar ciida. Ado bale ba weewa ini osa rseno ka mlukus lukus so nii. Lmiwaq heya mosa nganguc ka tnqliyan Amnon. Mosa nganguc ka heya de, rmuhu rhengun ka tnqliyan. 19Tamar ge, murus qbulic tunux na ma smgaliq lukus na ka heya. Psaun na tunux na ka baga na ma tddiras lmingis mkkesa.
20Rmengo heya ka Absalom qbsuran na: “Wada msuupu sunan ka Amnon qbsuran su ho? Mtswai mu, iya rengo ani maanu ka saya han. Qbsuran su ka heya. Iya pniqi lhebun ka nii han.” Kiya de Tamar we tsdamac bale meniq sapah Absalom qbsuran na. 21Mbahang kana ndaan so nii ka Dawid qbsuran paru de sqama seang na. 22Absalom we ani malu ani naqah ini ba rengo Amnon. Ado wada pqsiqa Tamar mtswai na ka Amnon ma qmnriqu heya ka Absalom.
Ririh Mtswai na Cmiyuk ka Absalom
23Bobo na 2 knkawas, matak ubal miric rudu Absalom we meniq Baal Xacor smdaling Eprayim hiya ka duma seediq. Splawa Absalom kana ka lqlaqi qbsuran paru. 24Meyah qbsuran paru hiya ka Absalom ma rmengo: “Qtai! Gaga matak ubal miric rudu tnqliyan su ka duma seediq. Braho su osa mtheyaq qbsuran paru ma dqbsuran mdayo sunan msuupu tnqliyan su mosa.” 25Rmengo Absalom ka qbsuran paru: “Uxe ku, Laqi mu. Ani miyan ini osa kana. So uxe maha pchedil sunan.” Ida mlawa qbsuran paru ka Absalom we, ida ini sruwa mosa ka qbsuran paru ma, wano ba smbleyaq heya. 26Rmengo ka Absalom: “Nasi ini osa ka qbsuran paru de, braho su ptheyaq kenan ka Amnon qbsuran mu.” Rmengo heya ka qbsuran paru: “Ma lux asi ka theyaq sunan ka heya ho?” 27Ida mesa riyung ka Absalom, kiya de qbsuran paru we, smkagul Amnon ma kana lqlaqi na ka heya.
28Rmengo tnqliyan na ka Absalom: “Qlahang ka yamu, mqaras riyung miimah ciida ka Amnon we, rmengo ku sai phuqil ka Amnon de, sai phuqil ka heya. Iya kiicu, uxe yaku ka rmnengo kiya peni? Pniqi pahung namu ma kbeyax ka yamu!” 29Kiya de dtnqliyan Absalom we muyu so tnugeesa Absalom wada mooda quri Amnon ka dheya. Mtutuy kana ka lqlaqi qbsuran paru. Paapa roba qduriq kana ka dheya.
30Gaga elu ciida ka dheya ge, niqan ka bnhangan betaq Dawid hiya, rmengo: “Wada phqilun Absalom kana ka laqi qbsuran paru. Uka ani 1 ka mnsngari.” 31Mtutuy ka qbsuran paru de smgaliq lukus ma tgtemaq tgmksaro dxeral. Smgaliq lukus mheyu ssiyo na ka kana dqbsuran mdayo uri. 32Rmengo ka Yonadab laqi Simea mtswai Dawid: “Tnpusu sapah mu, iya kesa wada phqilun kana ka riso lqlaqi qbsuran paru. Wano ba Amnon ka wada mhuqil. Peeyah wada pqsiqa Tamar mtswai Absalom ka Amnon de, ida kmooda oda nii ka Absalom di. 33Saya, pusu tnsapah mu ma qbsuran paru mu, iya pniqi lhebun su ka nii. Iya bale lngelung wada mhuqil kana ka lqlaqi qbsuran paru. Bale ba we, wano Amnon ka wada mhuqil.”
34Wada qduriq ka Absalom. So nii ciida, qmita hbaro seediq gisu hmeruc hredun Xoronayim ka mpqlahang dseediq. 35Rmengo qbsuran paru ka Yonadab: “Qtai! Gisu nii kana ka lqlaqi qbsuran paru di. Mntena so kari rnengo tnqliyan su ma, wada so kiya ka noda nii uri.” 36Mnhedu rmengo de, qtai! Dehuk kana ka lqlaqi qbsuran paru de, tddiras lmingis ka dheya. Qbsuran paru ma kana qbsuran mdayo uri we pmbaro lmingis uri.
37Qduriq mosa Talmay laqi Amihud qbsuran paru Gesur hiya ka Absalom. Dawid we tsdamac laqi na klaali ka heya. 38Qduriq mosa Gesur hiya ka Absalom ma, 3 knkawas ka nniqan na hiya. 39Wada hmrinas ka tnsdmatan kmciyuk Absalom ka Dawid qbsuran paru ma, ado qbsuran paru we, wada malu kuxul na quri mhuqil ka Amnon.
Currently Selected:
2 Samuel 13: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
