2 Samuel 12
12
Kari Natan ma Pnryuxan Lnglungan Dawid
1Utux Tmninun we smkagul Natan mosa Dawid hiya. Dehuk Dawid hiya ka Natan de rmengo heya: “Niqan 2 seediq gaga meniq 1 alang. 1 we mbleyaq ma, 1 we qrinuc. 2Seediq mbleyaq nii we egu ba ka dapa ma miric na. 3Seediq qrinuc we wano 1 ba wawa bubu miric bnaruy na de, uka ani maanu di. Wawa miric nii we, mtheyaq mdakil lqlaqi na ma, mekan uqun pnuqan daha ma, mimah nmahan daha. Kiya uri we mtaqi berah daha mntena so lqlaqi daha. 4Niqan 1 seediq meyah sapah seediq mbleyaq nii. Kiya de kmraguh mangal 1 peeyah rahul na dapa ma miric shpure na dadal na mneyah hiya. Krinah mangal wawa bubu miric nseediq qrinuc nii ma, speekan na dadal mneyah hiya.” 5Mseang seediq kiya ka Dawid ma, rmengo Natan: “Mpsdehu ku Utux Tmninun muudus ani knuwan. Seediq qmnepah nii we, asi ka phqilun! 6Heya we asi ka msn4 pririh wawa bubu miric. Ado noda na nii we, uka ba gnaalu na.”
7Rmengo Dawid ka Natan: “Isu ka seediq nii! Utux Tmninun, Utux Baro nuIsrael we, so nii ka kari na: ‘Hnrigan su mu abura mqbsuran paru Israel ma, dmnoi ku baga su peeyah baga Soro. 8Wada mu sbege sunan ka qlhangan tnpusu sapah su ma, dmqedil tnpusu sapah su we wada mu sbege berah su kana. Dungal we wada mu sbege sunan ka Israel ma Yehudah. Nasi su mesa ini tuuku, ida maha ku so nii, mprana ku mege sunan. 9Hmuwa ma su smbiciq tnugeesa Utux Tmninun, betaq su moda qnnaqah qmeepah ooda ckceka doriq na ho? Dmnoi su hlmadac pnhuqil su Uriyah seediq Xet ma, wada su ngalun ka mqedil na uri. Spooda su hlmadac seediq Amon phuqil heya. 10Saya, uxe mplatac tnsapah su ani betaq knuwan ka hlmadac. Ado smbiciq su qmita kenan. Wada su ngalun mqedil ka mqedil Uriyah seediq Xet’ 11So nii ka kari Utux Tmninun: ‘Qtai! Mpprebur ku mqraqil mpcebu sunan peeyah sapah su. Meeniq berah su, dmqedil su we bege mu dseediq ssiyo su. Ani diyan bale we mptheyaq mtaqi dmqedil su ka heya. 12Gmruus su moda noda kiya we, yaku de meeniq ku berah seediq Israel ma, mooda ku diyan ka oda so nii.’” 13Rmengo Natan ka Dawid: “Wada ku niqan qnquwan noda Utux Tmninun di!” Rmengo ka Natan: “Utux Tmninun we, wada na srwaun ka qnnaqah noda su. Uxe su mphuqil ka isu. 14Kiya de noda su nii we, gisu su smbiciq bale qmita Utux Tmninun. So kiya de mphuqil ka laqi pntingan su.” 15Kiya de mbrinah sapah na ka Natan.
Mhuqil ka Laqi Dawid
Utux Tmninun we, cmebu laqi Dawid pntingan mqedil Uriyah. Kiya de paru ba knrexan na. 16Dmurun Utux Baro quri laqi nii ka Dawid. Mqraqil ini ekan uqun ka Dawid. Mosa toma ma asi ksaro mtaqi krabi dxeral. 17Ddrudan mdayo heya we, meyah ssiyo na ma, kmtutuy heya peeyah dxeral. Kiya we ini sruwa ka heya ma, ini sruwa mekan hnpure uri. 18Betaq 7 ali, mhuqil ka laqi. Dqbsuran mdayo we miicu rmengo Dawid wada mhuqil ka laqi. Ado rmnengo ka heya: “Qtai! Gisu muudus ka laqi nana we, ida ini qbahang kari ta. Huwa ta kesun rmengo heya ka quri so wada mhuqil ka laqi. Kiya de, maha moda naqah oda ka heya denu?” 19Dawid ge, taan na gaga mhweho mpprengo ka dqbsuran mdayo de, asi kela wada mhuqil ka laqi di. Kiya de smiling dtnqliyan ka heya: “Wada mhuqil ka laqi di?” Rmengo ka dheya: “Wada mhuqil di.” 20Dawid we, asi tutuy peeyah dxeral ka heya ma, trima, rmicuh abura ma, rmiyux lukus. Mremux sapah Utux Tmninun mosa thmuku. Bobo na de, mbrinah nniqan na, rmengo seediq psramal uqun ma mekan ka heya. 21Rmengo heya ka dtnqliyan na: “Maanu ka noda su so nii? Muudus ciida ka laqi han we, betaq su ini ekan ma lmingis. Mhuqil ka laqi de, krinah su mtutuy ma mekan ido.” 22Rmengo ka Dawid: “Muudus ka laqi han we, ini ku ekan ma lmingis ku. Ado lmngelung ku, nhuwa gmaalu kenan ka Utux Tmninun de, pkdusun na ka laqi. 23Saya, wada mhuqil ka laqi de hmuwa ku ka ini ekan? Ya ku pkmekun pkuudus heya dungal? Asi ku ka mosa ssaun na ma, uka na yyahan yaku hini ka heya.”
Pntingan Selomoh
24Smbeyax Batseba mqedil na ka Dawid. Kiya de mtheyaq mtaqi heya ma, tmlaqi laqi rseno ka heya. Kiya de Selomoh kesun na tmngayan. Utux Tmninun we kuxul na ka heya. 25Kiya de spooda na Natan mpgeela kari mege Yedideyah 1 ngayan. Ririh so Utux Tmninun ka nii.
Mccebu Rabah ka Dawid
(1 No 20:1-3)
26Mosa mccebu Rabah seediq Amon ka Yoab ma ngngalun na ka alang nqbsuran paru. 27Smkagul seediq mosa Dawid hiya ka Yoab ma rmengo: “Mnccebu ku Rabah ma, cnebu ku alang dqsiya. 28Saya, plaani kana ka duma supi. So meyah tmlibu pkobu ma mangal alang nii. So uxe ngalun mu de, maha daha ngalun ngayan mu ka alang nii ka seediq di.” 29Kiya de Dawid ge, pssliyan na kana ka supi ma mosa mccebu mangal Rabah. Kiya de ngalun daha ka alang kiya. 30Dungal we ngalun daha ka bunuh peeyah Milkom qbsuran paru. King bobo hiya we 1 tarantu ma niqan ka btunux liqa? Kiya de psaun daha tunux Dawid ka bunuh nii. Dungal we gmeeluk egu riyung dnoi peeyah truma alang kiya ka Dawid. 31Tlusun na peeyah alang truma ka seediq hiya ma, tnqliyan na pqeepah dmoi keruc, ahuc, urung, puru ma, smkagul dheya mosa puuduh dxeral. Dawid we pnqeepah na dseediq lualang Amon we so kiya uri. Kiya de mbrinah Yerusalem ka Dawid ma kana supi na.
Currently Selected:
2 Samuel 12: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
