2 Samuel 11
11
Dawid ma Batseba
1Wada ka kingal knkawas, pkelu ba mosa mccebu ka dqbsuran paru ciida, smkagul Yoab ddudul na supi qlhangan na ma dseediq Israel mosa mccebu ka Dawid. Ini daha baka ka seediq Amon ma, tlbuwan daha ka alang Rabah. Kiya we ida meniq Yerusalem ka Dawid.
2Smdaling gbiyan ciida, mtutuy peyah qlapo ka Dawid ma, mkkesa bobo dnamux sapah qbsuran paru. Kiya de qmita 1 mqedil malu bale qtaan gaga trima. 3Smkagul seediq ka Dawid, mosa smiling ima ka mqedil kiya. Meyah rmengo ka duma seediq: “Uxe Batseba kesun laqi Eliam mqedil Uriyah seediq Xet ka heya peni?” 4Smkagul seediq ka Dawid ma saun na mangal ka mqedil kiya. Meyah Dawid hiya ka heya ma, hani mnhedu ka dara nyahan mqedil. Kiya de mtheyaq heya mtaqi ka Dawid. Kiya ma mbrinah mosa sapah. 5Mchedil heyi na ka mqedil kiya de, smkagul seediq mosa rmengo Dawid: “Nii ku mchedil di.”
6Smkagul seediq mosa rmengo Yoab ka Dawid: “Skguli peeyah yaku hini ka Uriyahu seediq Xet.” Kiya de, Yoab we smkagul Uriyah mosa Dawid hiya. 7Dehuk Dawid hiya ka Uriyah. Smiling hmuwa ka Yoab ma, hmuwa ka ndaan daha mccebu. 8Rmengo Uriyah ka Dawid: “Osa sapah su ka isu ma, sai trima papak su!” Mlatac sapah qbsuran paru ka Uriyahu ma, smnegul mege 1 lnabu heya ka qbsuran paru. 9Kiya de Uriyah ma kana tnqliyan pusu tnsapah na we, mtheyaq mtaqi rhengun sapah qbsuran paru hiya, ini osa sapah na. 10Meyah rmengo Dawid ka duma seediq: “Ini osa sapah na ka Uriyah.” Rmengo Uriyahu ka Dawid: “Uxe su pneeyah theya ba elu peni? Ma su ini osa sapah su nanak ho?” 11Rmengo Dawid ka Uriyah: “Gaga meniq kobu toma hiya ka kulu pnsdhegan, Israel ma Yehudah. Yoab pusu tnsapah mu ma dtnqliyan pusu tnsapah mu we, gaga pkobu breenux kana. Maku lux tduwa mbrinah sapah mosa mekan ma mimah, msuupu mtaqi mqedil mu di peni? Mpsdehu ku qbsuran paru ma knuudus qbsuran paru, uxe ku ba mooda oda so nii!” 12Rmengo Uriyahu ka Dawid: “Eniq hini saya ka isu. Kusun de skgulun misu mosa.” Kiya de ida meeniq Yerusalem ali ciida ka Uriyah. So kesun de, 13mlawa Uriyah ka Dawid ma, qdalun na ma pmahun na berah na, wada na pbksanun ka heya di. Gbiyan ciida, mosa nganguc ka Uriyahu ma, mosa taqi qlapo tnqiyan na. Msuupu dtnqliyan pusu tnsapah na ka heya ma, ini osa sapah na.
Mphuqil Uriyahu ka Dawid
14Mgrebu, matis patis bbege na Yoab ka Dawid. Sbege na baga Uriyah desun na. 15So nii ka pnatis na patis truma: “Skguli posa tgberah ba mccebu hiya ka Uriyah. Kiya de qduriq peeyah hiya ka dyamu. So maha phqilun seediq ka heya.” 16Mnosa kmuruy alang ciida ka Yoab we, klaun na niqan seediq mpahung ka dpais na hiya. Kiya de smkagul Uriyah mosa hiya. 17Meyah nganguc mccebu Yoab ka seediq hiya. Duma supi tnqliyan Dawid we wada mhuqil ma, wada phqilun uri ka Uriyah seediq Xet.
18Kiya de, Yoab we smkagul seediq mosa rmengo Dawid ka ndaan daha kana mccebu. 19Dungal we rmengo snkgulan na: “Bobo mhedu su rmengo kana ndaan mccebu de, 20nasi mseang ka qbsuran paru ma, rmengo sunan: ‘Ma namu smdaling bale alang mccebu namu ho? Ini namu klai mpcebu budi peeyah bobo hnarac qnalang alang ka pais namu peni? 21Cuuxal we, ima ka wada phuqil Abimeleq laqi Yerubese? Uxe kiya ka mqedil qmnada 1 btunux glangan peeyah harac qnalang baro ma, buwan na heyi na de mhuqil Tebec hiya ka heya peni? Ma namu smdaling pnharac qnalang alang ho?’ Rengo so nii ka isu: ‘Wada mhuqil uri ka tnqliyan su Uriyah seediq Xet.’”
22Kiya de mosa ka snkgulan. Muyu so kana rnengo Yoab meyah rmengo Dawid. 23Rmengo Dawid ka snkgulan: “Mgkala yami ka pais miyan ma, meyah nganguc pneeyah toma alang mccebu yami. Kiya we wada miyan pbrnahun rhengun alang dungal ka dheya. 24Peeyah bobo pnharac qnalang alang cmebu budi tnqliyan su. Wada buwan mhuqil duma ka dtnqliyan su ma, mhuqil ka Uriyah seediq Xet tnqliyan su uri.” 25Rmengo snkgulan ka Dawid: “Kesa rmengo ka Yoab: ‘Iya qnaqah kuxul quri noda nii. Ado hlmadac ka wada phuqil seediq nii ma seediq kiya.’ Sai smbyaxi isu ka Yoab.”
26Mnbahang wada mhuqil ka Uriyah rseno na ka mqedil Uriyah de, smdamac lmingis quri rseno na. 27Wada hmrinas ka ali mbasi de, splawa Dawid sapah qbsuran ka Batseba. Kiya de mqedil qbsuran paru ka heya ma tmlaqi 1 laqi Dawid ka heya. Kiya de noda Dawid nii we, niqan qnquwan noda meniq doriq Utux Tmninun ka nii.
Currently Selected:
2 Samuel 11: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
