2 Samuel 10
10
Ini Baka ka Seediq Amon ma Seediq Aram
(1 No 19:1-19)
1Bobo na, mhuqil ka qbsuran paru seediq Amon. Xanun laqi na ka lmutuc mqbsuran paru. 2Rmengo ka Dawid: “Wada smbleyaq ba kenan ka Naxas tama Xanun we, sblequn mu ka Xanun uri.” Kiya de smkagul seediq mosa smbeyax tsdamac tama na ka Dawid. Dehuk dxeral seediq Amon ka dqbsuran mdayo Dawid de, 3rmengo Xanun qbsuran paru ka dqbsuran mdayo seediq Amon: “Gisu smkagul seediq meyah smbeyax sunan ka Dawid. Qtai ye meyah smparu tama su ka heya ho? Smnkagul seediq meyah isu hini ka Dawid we, uxe gisu meyah kmuuruy ma mpseeliq alang nii peni?” 4Kiya de Xanun ge, qrapun na ka dqbsuran mdayo Dawid. Dkai na kmugus ka ngudus daha, peeyah hwinuk dkean na matak ka lukus daha ma, pbrasun na tqita hnyegan daha de, wada na psaun ka dheya. 5Rmengo Dawid ka duma seediq, kiya de smkagul seediq mosa smterung dheya ka heya. Ado msiqa riyung ka dheya. Rmengo ka qbsuran paru: “Tduwa namu meniq Yerixo. Betaq bbaro ka ngudus de eyah di.”
6Seediq Amon we, qmita gisu tmraqil dheya ka Dawid de, mosa smtuku mlawa mccebu dseediq Aram gaga meniq Bet Rexob ma Aram Cobah we 2 mang heyi. Dungal we 10'00 heyi ka dseediq qbsuran paru Maakah ma, 1 mang 20'00 heyi ka dseediq Tuobo. 7Mbahang ka Dawid de posa kari Yoab ma kana mnpahung ba supi na. 8Meyah ka seediq Amon ma, meyah psramal mccebu. Dseediq Aram meeniq Cobah ma Rexob, dseediq Tuobo ma, dseediq Maakah we psramal mccebu breenux hiya kiya.
9Yoab we qmita gisu psramal mccebu berah ma bukuy ka dheya de, gmao mnpahung ba supi Israel mpsterung mccebu supi Aram. 10Duma na supi hiya de, sbege na baga Abisay mtswai na. Kiya de mosa mccebu seediq Amon ka Abisay. 11Rmengo Abisay ka Yoab: “Nasi mgkala sunan ka seediq Aram de, eyah dmayo kenan ka isu. Nasi mgkala kenan ka seediq Amon de, mosa ku dmayo sunan ka yaku. 12Knbeyax ba ka isu, ririh dseediq ta nanak ma lualang Utux Baro ta ka skpahung ta. Tai so mpuyu nanak knmalu Utux Tmninun moda!” 13Kiya de, mosa mccebu seediq Aram ka Yoab ma dsupi smnegul heya. Qduriq peeyah berah na ka seediq Aram. 14Qmita wada qduriq ka seediq Aram ka seediq Amon de, qduriq peeyah berah Abisay mquri alang daha ka dheya uri. Kiya de smwaye seediq Amon, mbrinah Yerusalem ka Yoab.
15Qmita wada ini baka Israel ka seediq Aram de, meyah psseli ka dheya. 16Skgulan Hadadejer ka seediq ma, ttheruy daha ka dseediq Aram gaga sipo yayung Paru. Meyah Xeylam ka dheya ma, Sobak qbsuran supi Hadadejer ka dmudul dheya. 17Meyah rmengo Dawid ka duma seediq. Kiya de psseli seediq Israel ma mtaril yayung Yarden betaq Xeylam. Psramal smterung mccebu Dawid ka seediq Aram. 18Qduriq peeyah berah seediq Israel ka seediq Aram. Dawid we phuqil 7'00 rulu mccebu ka heyi supi na Aram wada phqilun Dawid ma, 4 mang supi paapa dmay. Dungal we, wada na phqilun ka Sobak qbsuran supi Hadadejer ma, mhuqil hiya ka heya di. 19Dqbsuran paru toma na Hadadejer we, qtaan daha wada ini baka Israel ka dheya de, meyah ptbale rmengo Israel ma mpqbahang dheya. Kiya de miicu ka seediq Aram ma, ini osa dmayo ka seediq Amon.
Currently Selected:
2 Samuel 10: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
