2 Qbsuran Paru 9
9
Hrigan Abura Ngalan Qbsuran Paru Israel ka Yehu
1Elisa mpgeela kari we mlawa tnugsaan dmgeela kari ma, rmengo heya: “Hbiki, angal abura nii ka baga su, osa mquri Ramot Gilad. 2Dehuk su hiya de igin ka Yehu laqi Yehosapat lqlaqi laqi Nimsiy. Aangal peeyah ckceka gexal mtswai daha ka heya ma, osa tgtruma ba sapah. 3Hrigi tunux na ka abura gaga rusuq ma rngagi: ‘Rmengo so nii ka Utux Tmninun: Hhrigun misu abura mqbsuran paru Israel.’ Kiya de rwahi ka rhengun ma iya ali tggila hiya asi qduriq meyah nhari.”
4Kiya de mosa Ramot Gilad ka 1 riso mpgeela kari. 5Dehuk hiya de, qtai! Gisu tleung mpprengo ka dqbsuran supi. Rmengo: “Qbsuran supi, niqan kari mu sunan” Rmengo ka Yehu: “Tgiinu miyan ka rngagun su ho?” Rmengo ka heya: “Qbsuran supi, niqan kari rrengo mu sunan.” 6Kiya de mtutuy ma mremux truma sapah ka Yehu. Hmeruy abura tunux na ka riso ma rmengo: “Rmengo so nii ka Utux Tmninun, Utux Baro nuIsrael: ‘Hrigun misu abura mqbsuran paru Israel. 7Mphuqil su kana tnsapah Axab tnpusu sapah su. Kiya ka cyukan mu ka mnoda baga Ijebel wada psdara phuqil dmpgeela kari tnqliyan mu ma kana dtnqliyan Utux Tmninun. 8Asi ka phqilun kana ka tnsapah Axab. Kana lqlaqi rseno Axab, ani gaga pttnqliyan, mtraguh we, ida asi ka pkngalun peeyah ckceka Israel. 9Pntnaun mu so sapah Yarabeam laqi Nebat ma sapah Basa laqi Axiyah ka sapah Axab. 10Quri so Ijebel we, uqun huling dxeral Yijreel heya ka heya ma, uka ka mseku heya.’” Kiya de rmaguh rhengun ka heya ma asi qduriq.
11Mosa nganguc ka Yehu ma, mbrinah dqbsuran mdayo tnpusu sapah na hiya. Rmengo heya ka 1 seediq: “Mtbale lhebun su ho? Hmuwa meyah sunan ka seediq mkuni nii ho?” Rmengo dheya ka heya: “Klaun namu ka seediq kiya ma, klaun namu mnhemuc rmengo ka heya.” 12Rmengo ka dheya: “Mberiq su! Rngage miyan ho?” Rmengo ka heya: “So nii rnengo na kenan: ‘Rmengo so nii ka Utux Tmninun: Hrigun misu abura mqbsuran paru Israel.’” 13Dheya de nugaaguh smapo lukus daha bobo tnugkadan qahan ma, meniq tgtruma Yehu ka dheya. Kiya de miyuk urung ka dheya ma, rmengo: “Mqbsuran paru ka Yehu da!”
Phqilun ka Yoram Qbsuran Paru Israel
14Kiya de tbrinah Yoram ka Yehu laqi Yehosapat lqlaqi laqi Nimsiy. Ciida ririh Xajael qbsuran paru Aram, mosa qmburang Ramot Gilad hiya ka Yoram ma dseediq Israel. 15Bobo na de, mbrinah Yijreel ka qbsuran paru Yoram, meyah psapuh luqah snebuc seediq Aram mccebu Xajael qbsuran paru Aram ciida. Rmengo ka Yehu: “Nasi bale ba niqan so nii ka lnglungan namu kenan de, iya pqdriqi peeyah alang ma mosa rmengo kari alang Yijreel ka heya.” 16Kiya de paapa rulu mccebu mosa Yijreel ka Yehu. Ado gaga mnarux hiya ka Yoram. Dungal we meyah mita Yoram ka Axajyah qbsuran paru Yehudah.
17Niqan 1 seediq mpqlahang mheyu qmlahang bobo paga Yijreel hiya. Qtaan na gisu madis rahul supi ka Yehu de rmengo: “Qmnita ku 1 rahul seediq.” Rmengo ka Yoram: “Skguli 1 supi mpaapa dapa dmay ma posa smterung dheya, rngagi: ‘Mtbale lhebun ka pusu na ho?’” 18Kiya de mosa smterung Yehu ka supi mpaapa dapa dmay ma rmengo: “Rmnengo so nii ka qbsuran paru: ‘Mtbale lhebun ka pusu na ho?’” Rmengo ka Yehu: “Mtbale ma uxe mtbale we, manu pnugluban na sunan ho? Eyah smnegul bukuy mu!” Rmengo ka qmlahang na: “Wada dheya ka snkgulan we ida uka meyah nana.” 19Smkagul dungal taxa supi mpaapa dapa dmay ka qbsuran paru. Seediq nii we mosa hiya ma rmengo: “Rmnengo so nii ka qbsuran paru: ‘Mtbale lhebun ka pusu na ho?’” Rmengo ka Yehu: “Mtbale ma uxe mtbale we, manu pnugluban na sunan ho? Eyah smnegul bukuy mu!” 20Rmengo ka qmlahang na: “Wada dheya ka snkgulan we ida uka meyah nana. Gisu mtbeyax ba dmudul rulu mccebu, so hari Yehu lqlaqi laqi Nimsiy ka gaga dmudul.”
21Rmengo ka Yoram: “Psramal rulu!” Kiya de biqan daha rulu mccebu ka heya. Yoram qbsuran paru Israel ma Axajyahu qbsuran paru Yehudah we, paapa rulu daha nanak mosa smterung Yehu. Sterung daha dxeral Nabot seediq Yijreel hiya. 22Mita Yehu ka Yoram de rmengo: “Yehu, mtbale lhebun namu ho?” Rmengo ka Yehu: “So nii knuegu qnnaqah mkmhemuc msuupu noda na Ijebel bubu su, maanu kesun su mtbale lhebun?” 23Yoram ge, asi na pgriqi ka rulu na ma pqduriq ma rmengo Axajyahu: “Axajyahu! Nii su mptbrinah mekan di!” 24Mbeyax ba hmkero budi ka Yehu ma, cmebu cenga daha hiqur baga Yoram, moda cmebu bahak ka budi, asi takur mhuqil rulu baro ka Yoram. 25Rmengo Bidqar qbsuran supi mdayo heya ka Yehu: “Sai qmada qnpahan Nabot seediq Yijreel hiya ka heya. Klai bale, msuupu su kenan taapa dapa dmay smnegul ta Axab tama na ciida, rmnengo kari pgeela Axab ka Utux Tmninun, 26Rmengo ka Utux Tmninun: ‘Qmnita ku dara Nabot ma laqi na siga, kiya de sndehu ku, ccyukun misu dxeral hini.’ So nii ka rnengo Utux Tmninun. Ida so nkari Utux Tmninun, sai qmada dxeral hiya ka heya.”
Phqilun ka Axajyah Qbsuran Paru Yehudah
27Qmita nii ka Axajyah qbsuran paru Yehudah de qduriq mooda elu Bet Hagan. Smdurak bukuy na ka Yehu ma rmengo: “Phuqil bobo rulu smdaling msherus Gur dxeral Yibolien hiya ka seediq nii uri.” Kiya de qduriq mosa Megido ma mhuqil hiya ka heya. 28Qqbsuran mdayo na we saapa daha rulu betaq Yerusalem ka bqerus na ma, saan daha psuupu smeku rdrudan na alang Dawid.
29Tg11 knkawas qlhangan Yoram laqi Axab we, mqbsuran paru Yehudah ka Axajyah.
Phqilun ka Ijebel Mqedil Qbsuran Paru
30Mosa Yijreel hiya ka Yehu ciida, mbahang ka Ijebel de rmicuh doriq, tmiyux snuunux ma, dmeeda peeyah bnlingan. 31Mremux rhengun alang ka Yehu de, rmengo ka Ijebel: “Jimriy, pnhuqil tnpusu sapah! Mtbale ka lhebun su ho?” 32Pstutuy tunux qmita bnlingan ka Yehu ma rmengo: “Ima namu ka mpsnegul kenan ho? Ima namu ho?” Kiya de niqan 2 uxe we 3 heyi ka qbsuran gmbgaxan we dmeeda qmita heya. 33Rmengo ka Yehu: “Ptuting ka mqedil gaga!” Kiya de ptingun daha peeyah baro ka heya. Murus qnabil ma bobo dapa dmay ka dara na. Yehu we qmleqah bobo heyi na. 34Mremux sapah ma bobo mnekan ka Yehu de rmengo: “Sai smeku yamu ka mqedil sniyus nii, ado weewa qbsuran paru ka heya.” 35Mosa smeku mqedil nii ka dheya we, wano buuc tunux, papak ma, qapal baga nanak ka nii slayan. 36Mosa rmengo Yehu ka dheya, rmengo ka Yehu: “Ida so ma bale kari Utux Tmninun. Rnengo na Eliyah seediq Tisbiy tnqliyan na ka heya: ‘Meeniq dxeral Yijreel, uqun huling ka heyi Ijebel. 37Maha mntena so quti meeniq bobo dxeral Yijreel ka bqerus Ijebel. Betaq uka seediq rmengo: Yijreel ka nii.’”
Currently Selected:
2 Qbsuran Paru 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
