2 Qbsuran Paru 8
8
Mbrinah Meyah Nniqan na ka Mqedil Sunem
1Elisa we rmnengo mqedil pnkuudus na heya ka laqi na: “Tutui ma latac peeyah hini ka isu ma kana tnsapah su ma, osa mquri dxeral tduwa su nniqun. Ado pltudun 7 knkawas pdaun krayan Utux Tmninun ka dxeral nii.” 2Kiya de muyu ida so nkari seediq Utux ka mqedil ma, desun na kana ka tnsapah na mosa tnooda meniq dxeral Peliset 7 knkawas. 3Bobo 7 knkawas ka mqedil nii we mpbrinah peeyah dxeral Peliset ma mosa rmengo qbsuran paru, kiya de mesa aangal na dungal sapah na ma qnpahan na. 4Ciida, gisu mpprengo Geyxajiy tnqliyan seediq Utux ka qbsuran paru: “Pqbhangi ku hiya kana ka paru qneepah ndaan Elisa.” 5Mneeru qbsuran paru ka Geyxajiy, wada na huwa kesun pkuudus seediq mnhuqil ka Elisa, qtai! Gisu meyah dmurun mesa qbsuran paru quri sapah ma qnpahan na ka mqedil pnkuudus heya laqi na. Rmengo ka Geyxajiy: “Tnpusu sapah mu, qbsuran paru mu, nii ka mqedil kiya. Nii ka laqi na, kiya ka pnkuudus Elisa.” 6Smiling mqedil nii ka qbsuran paru de, cmiyuk bale ba ndaan ka heya. Kiya de ririh heya smkagul 1 qbsuran mdayo ka qbsuran paru: “Bqani mqedil nii dungal ka kana nheya. Dungal we bqani heya ka kana uqun gnhei qnpahan 7 knkawas ini na niqi.”
Elisa ma Ben Hadad Qbsuran Paru
7Mosa Darmeseq ka Elisa ciida, mnarux ka Ben Hadad qbsuran paru Aram. Meyah rmengo qbsuran paru ka seediq: “Nii meyah hini ka seediq Utux.” 8Rmengo Xajael ka qbsuran paru: “Dsani bbege ma osa qmita seediq Utux. Yaa klmeun ka mnarux mu we pdaani heya smiling Utux Tmninun.” 9Kiya de Xajael ge, spaapa na 40 dapa bukung ka kana mlmalu pneyah dxeral Darmeseq ma mosa qmita Elisa. Dehuk hiya ka Hadail de, mheyu berah na ma rmengo: “Smkagul kenan ka Ben Hadad qbsuran paru Aram laqi su, smiling: ‘Mppkmalu ka mnarux mu ho?’” 10Rmengo Hadail ka Elisa: “Sai rmengo ka heya: ‘Mpkmalu su kesa.’ Kiya de ptuura kenan ka Utux Tmninun we, ida mphuqil ka heya.” 11Kiya de tleus qmita Hadail ka seediq Utux ma, betaq msiqa ka heya. Kiya de lmingis ka seediq Utux. 12Smiling ka Xajael: “Tnpusu sapah mu, ma su lmingis ho?” Rmengo ka Elisa: “Ado klaun misu, mpqraqil su seediq Israel. Mpdoi su puniq psqama qbrangan daha, mpdoi su hlmadac phuqil rsriso, cqcaqun su phuqil ka laqi rabu ma, btaqan su phuqil ka dmqedil mchedil.” 13Rmengo ka Xajael: “Ma ku lux dehuk so smtali nii ka yaku tnqliyan mntena so huling ho?” Rmengo ka Elisa: “Mpqbsuran su paru Aram ka isu, mnesa ptuura kenan ka Utux Tmninun.” 14Kiya de mlatac Elisa ka Xajael, mbrinah mosa tnpusu sapah na hiya. Rmengo heya ka tnpusu sapah: “Maanu mesa kari na sunan ka Elisa ho?” Rmengo ka heya: “Mpkmalu su kesun ku na.” 15So kusun, Xajael we mangal galiq ma rbegan na qsiya. Sbubung na dqeras ma mhuqil ka qbsuran paru. Kiya de Xajael ka gmeluk mangal tluungan qbsuran paru na.
Yehoram Qbsuran Paru Yehudah
(2 No 21:1-20)
16Tg5 knkawas qlhangan na Israel ka Yoram qbsuran paru laqi Axab we, mqbsuran paru Yehudah ka Yehoram laqi Yehosapat. 17Yehoram we 32 knkawas na mqbsuran paru ma, 8 knkawas qnbsranan na Yerusalem. 18Qmeepah oda dqbsuran paru Israel ka heya. Ado mnangal mqedil laqi mqedil Axab ka heya. Ini pndungus doriq Utux Tmninun ka noda na. 19Kiya de Utux Tmninun we ririh Dawid tnqliyan na, ini na qdaani ka Yehudah. Muyu pnstangan na, uxe mpsetuq mege ledax Dawid ma lqlaqi laqi na ka heya.
20Mqbsuran paru ka Yehoram ciida, tbrinah ka Edom ma pheyu qbsuran paru daha nanak qmlahang dheya ma, mlatac qlhangan Yehudah ka dheya. 21Maadis kana supi rulu mccebu ka Yehoram ma mosa Cair. Mtutuy keeman ka heya ma, mosa mccebu seediq Edom ma dqbsuran supi rulu mccebu. Wada qduriq ka supi Yehudah, txtaxa daha we mbrinah kobu daha nanak da. 22So kiya, tbrinah Yehudah ka Edom ma, mlatac beyax Yehudah ka dheya betaq saya. Ciida, tbrinah ka Libnah uri.
23Duma noda Yehoram, kana noda na we, uxe gaga spatis ‘Patis ndaan Dqbsuran Paru Yehudah’ hiya peni? 24Msuupu mtaqi pusu rdrudan na ka Amriy, skuun daha alang Dawid hiya. Axajyahu ka lmutuc Yehoram mqbsuran paru.
Axajyah Qbsuran Paru Yehudah
(2 No 22:1-6)
25Tg12 knkawas qlhangan na Israel ka Yoram qbsuran paru laqi Axab we Axajyahu laqi Yehoram qbsuran paru ka mqbsuran paru Yehudah. 2622 knkawas na ciida, mqbsuran paru ka Axajyahu ma 1 knkawas mqbsuran na Yerusalem hiya. Atalyah ka ngayan bubu na ma weewa lqlaqi laqi Amriy qbsuran paru Israel. 27Axajyah we moda elu tnsapah Axab, mntena tnsapah Axab, qmeepah qnnaqah oda ini pndungus Utux Tmninun ka noda na. Ado ama tnsapah Axab ka heya.
28Msuupu Yoram laqi Axab mquri Ramot Gilad, mosa mccebu Xajael qbsuran paru Aram. Pluqah Yoram ka seediq Aram. 29Mbrinah Yijreel ka Yoram qbsuran paru ma, mosa pkmalu luqah nangal na mnosa mccebu Xajael qbsuran paru Aram meniq Ramah hiya. Ado mnarux ka Yoram laqi Axab, mosa Yijiril qmita heya ka Axajyahu qbsuran paru Yehudah laqi Yehoram.
Currently Selected:
2 Qbsuran Paru 8: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
