2 Qbsuran Paru 6
6
Slayan ka Tunux Puru
1Rmengo Elisa ka tnugsaan dmpgeela kari: “Tai! Sgcuqi ba dgehing ka nii nami niqan berah su hini. 2Skgule miyan mquri yayung Yarden mangal pn1 qhuni smlean miyan sapah nniqun nami nanak ho?” Rmengo ka heya: “Osa!” 3Rmengo Elisa ka taxa daha: “Nita ka isu uri ho?” Rmengo ka heya: “Tduwa ku mosa.” 4Kiya de msuupu mosa dheya ka Elisa. Dehuk yayung Yarden ka dheya de prading smeqic qhuni. 5Smeqic rmqeraq qhuni ka taxa daha ciida, wada na ptingun ckceka qsiya ka tunux puru na. Kiya de rmengac mlawa ka heya: “Uxe kiya da! Tnpusu sapah mu! Knbrexan mu ka puru kiya!” 6Rmengo heya ka seediq Utux: “Wada mtuting inu?” Tyuun na ka wada na ptingan. Smeqic cida qhuni ka Elisa ma, sqada na hiya. Kiya de mnkala baro ka tunux puru da. 7Rmengo ka Elisa: “Aangal baro da!” Kiya de hmkero baga na mangal ka seediq nii.
Ini Baka Mccebu ka Supi Aram
8Mccebu Israel ka qbsuran paru Aram, mpprengo qbsuran mdayo ka heya: “Pniqe ta hini ma heya ka qbrangan.” 9Kiya de smkagul seediq quri qbsuran paru Israel ka seediq Utux: “Qlahang riyung, iya oda hiya. Ado gaga hiya ka supi seediq Aram.” 10Kiya de qbsuran paru Israel we skgulan na seediq pqlahang ka dxeral pntqlahang rnengo seediq Utux. So nii we uxe texal ma mn2 nanak.
11Peeyah so nii, mseang riyung ka qbsuran paru Aram ma, mlawa qbsuran mdayo rmengo dheya: “Ckceka ta hini, ima namu ka gaga dmayo qbsuran paru Israel ho? Uxe namu mprengo kenan ho?” 12Rmengo ka taxa qbsuran mdayo: “Uxe, tnpusu sapah mu, qbsuran paru mu! Wano ba Elisa mpgeela kari Israel ka rmnengo kari rnengo su tqiyan su hiya.” 13Rmengo ka qbsuran paru: “Gaga meniq inu ka heya we sai qmita. Mpskagul ku seediq maha qmerac heya.” Meyah rmengo qbsuran paru ka duma seediq: “Qtai! Gaga meeniq Dotan ka heya.” 14Kiya de qbsuran paru de smkagul dapa dmay ma rulu mccebu ma qpuruh supi. Dehuk keeman ka dheya ma asi daha tlbui ka alang.
15Mgrebu so kusun, mtutuy ka tnqliyan seediq Utux Baro ma mlatac nganguc. Tai! Gisu tmlibu alang ka dsupi dapa ma rulu mccebu. Rmengo seediq Utux ka tnqliyan: “Uxe bale da! Tnpusu sapah mu! Mphuwa ta bale di?” 16Rmengo ka seediq Utux: “Iya kiicu! Mgkala dheya knhbaro ka nii theyaq ita.” 17Dmurun Utux Tmninun ka Elisa: “Utux Tmninun! Pqtai ku hiya ka doriq na ma, so mpqita ka heya.” Utux Tmninun we rwahun na ka doriq tnqliyan mbeyax nii de qmita ka heya. Qtai! Nii pqhedu dgiyaq tmlibu Elisa ka dapa dmay puniq ma rulu mccebu puniq. 18Hmeruc meyah Elisa hiya ka seediq Aram. Kiya de dmurun Utux Tmninun ka Elisa: “Braho su sbeti ka qnlhangan nii, so mpkbudu ka doriq daha.” Kiya de Utux Tmninun we muyu so nkari Elisa smebuc dheya ma, mbudu ka doriq daha. 19Rmengo dheya ka Elisa: “Uxe elu ddaun namu ka nii. Uxe alang ssaun namu ka nii. Snegul kenan. Ddulo maku betaq seediq gaga namu gimun hiya.” Kiya de desun na dehuk Samareia ka dheya.
20Dehuk Samareia ka dheya de dmurun ka Elisa: “Utux Tmninun! Braho su rwahi hiya ka doriq daha, so maha qmita ka dheya.” Utux Tmninun we rwahun na ka doriq daha ma qmita ka dheya da. Qtai! Gisu ta meniq alang Samareia. 21Qmita dheya ka qbsuran paru Israel de rmengo Elisa: “Tama mu! Ya bale ba ani mu saun phuqil ka dheya?” 22Rmengo ka heya: “Iya phqili! Dseediq nii we uxe su ddoi hlmadac ma budi phuqil kiya? Qdali pang ma pmahi qsiya meniq berah daha ka dheya ma, posa brinah tnpusu sapah daha hiya ka dheya.” 23Kiya de qbsuran paru we psramal egu ba uqun. Mnekan ma mnimah ka dheya de, pbrnahun na tnpusu sapah daha hiya ka dheya. Bobo na nii, ini bale eyah mccebu dxeral Israel ka supi Aram.
Tlbuwan ka Samareia
24Bobo nii, psseli kana supi ka Ben Hadad qbsuran paru Aram ma meyah tmlibu Samareia. 25Qtai! Tlbuwan ciida, daan paru bale krayan ka Samareia. Kiya de 1 tunux dapa roba we betaq 80 skere knkere, 1 tnugspatan quti byugu we dehuk 5 skere. 26Niqan 1 ali, mkkesa bobo pnharac qnalang alang ka qbsuran paru Israel, mlawa heya ka 1 mqedil: “Tnpusu sapah mu, qbsuran paru mu! Braho su dyagi ku!” 27Rmengo ka qbsuran paru: “Ini dayo sunan ka Utux Tmninun we mphuwa ku mesa dmayo sunan ka yaku ho? Mpeyah ku gaga sbetan ho? Mpeyah ku sino gaga pnsnagan ho?” 28Rmengo mqedil nii ka qbsuran paru: “Maanu ka oda su ho?” Cmiyuk ka mqedil nii: “Rmengo kenan ka mqedil nii: ‘Peeyah ka laqi su, uqo ta ali saya ka laqi su ma, uqo ta kusun ka laqi mu.’ 29Kiya de phrayun miyan ka laqi mu ma wada miyan uqun. Kiya de so kusun de, rmengo ku heya: ‘Peeyah ka laqi su ma uqo ta da.’ Kiya de liingun na ka laqi na da.” 30Mbahang kari mqedil nii ka qbsuran paru de, smgaliq lukus. Ciida, mkkesa bobo pnharac qnalang alang ka qbsuran paru ma qtaan seediq. Qtai! Gisu mlukus lukus mbasi ka qbsuran paru. 31Rmengo ka qbsuran paru: “Nasi mu ida pniqun heyi na ka tunux Elisa laqi Sapat ali saya de, tai so pkdira riyung kenan ka Utux Baro!”
32Ciida, tleung sapah na ka Elisa ma, msuupu tleung heya ka drudan uri. Plaale smkagul seediq ka qbsuran paru. Ini qtai ka snkgulan na we, rmengo rdrudan ka Elisa: “Qtai bino, laqi mphuqil seediq nii we gisu smkagul seediq meyah smalak tunux mu. Qlhangi bale, meyah ka heya de, asi lebi ka rhengun ma, lebi nganguc ka heya. Uxe gisu bukuy na heya ka hrenang papak qbsuran na paru peni?” 33Gisu mpprengo dheya ciida, qtai! Meyah hiya ka snkgulan, rmengo: “Qtai! Pnqrqilan nii we, pneeyah Utux Tmninun kiya, so kiya de maanu ka ttara mu Utux Tmninun nana ho?”
Currently Selected:
2 Qbsuran Paru 6: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
