2 Qbsuran Paru 5
5
Wada Klmeun ka Knarux Naaman
1Naaman Qbsuran supi Aram we spruun ba dmoi qbsuran paru na. Ado Utux Tmninun we spooda na heya wada mnbeyax mccebu ka supi Aram. Hiya ge, ani kesun niqan bale pahung supi we, gaga niqan mnarux msburo heyi ka heya. 2Mnosa mccebu ciida ka seediq Aram we, qmnerac 1 weewa pneeyah Israel ka dheya. Heya we mqeepah dmayo mqedil Naaman. 3Rmengo tnpusu mqedil sapah ka heya: “Tnpusu sapah nii ge, naka ba mosa qmita mpgeela kari gaga meniq Samareia. Heya we ida na klmeun ka mnarux na.” 4Kiya de, mosa rmengo tnpusu sapah na ka Naaman: So nii rnengo na ka weewa pneeyah Israel. 5Rmengo ka Aram qbsuran paru: “Tduwa su mosa, psaun mu patis ka qbsuran paru Israel uri.” Kiya de Naaman we madis 10 tarantu ging, 60'00 skere king ma 10 malu ba lukus kndalax hiya mosa. 6Nadis na ka patis bbege qbsuran paru Israel we so nii kari na: “Mangal su patis nii saya, qtai! Smnkagul ku Naaman tnqliyan mu mosa isu hiya we, kmlei ku hiya ka mnarux sburo heyi na.” 7Smnepu patis nii ka qbsuran paru Israel de smgaliq lukus na ma rmengo: “Malux Utux ku Baro ka yaku, mkela ku pkuudus seediq wada mhuqil ho? Smnkagul seediq ka seediq nii we, dmurun kenan pkmalu seediq mnarux msburo heyi. Yamu we klai bale, qtai! Seediq nii we, gisu migin tmheri yaku ka seediq nii.”
8Elisa we, mbahang wada psgaliq lukus ka qbsuran paru Israel de, smkagul seediq mosa qbsuran paru hiya ma, rmengo: “Hmuwa, ma su smgaliq lukus ho? Peeyah yaku hini ka seediq kiya, kiya de maha na klaun, niqan mpgeela kari ka Israel.” 9Kiya de Naaman ge, desi na ka rulu ma dapa dmay ma, dehuk sapah Elisa, mheyu berah rhengun sapah. 10Smkagul snkgulan ka Elisa ma, rmengo Naaman: “Osa, mn7 trima yayung Yarden. Kiya de mpkmalu ka heyi su ma, mpsbgurah su da.” 11Mseang ma wada asi latac ka Naaman. Rmengo ka heya: “Qtai! Lnglungan mu we, ida ba meyah nganguc ma meyah yaku hini ka heya. Mpheyu dmurun ngayan Utux Tmninun, Utux Baro na ma, gmkuwak bobo narux mu ka baga na de, mpkmalu ka mnarux msburo heyi nii. 12Yayung Amanah ma Yayung Parpar gaga Darmeseq we, uxe mgkala knmalu ani inu yayung Israel peni? Naqah ka trima ku hiya pkmalu mnarux mu peni?” Kiya de mseang riyung ma mlatac mosa ka heya da. 13Meyah smdaling heya ka tnqliyan na ma, rmengo heya: “Tama mu! Nasi mdakar mosa su qmeepah paru noda ka mpgeela kari we, uxe su mooda peni? Nii ge, wano ku ba mesa oosa trima ma, kiya ka maangal su knbgurah peni?” 14Kiya de Naaman we mosa trima mn7 yayung Yarden ma muyu kari seediq Utux ka heya. Kiya de asi kmalu ka heyi na ma, mntena so laqi ka heyi na. Kiya de wada asi kbgurah ka heya da.
15Naaman we madis kana seediq smnegul heya ma, mbrinah seediq Utux hiya. Mheyu berah na ma, rmengo: “Qtai! Klaun mu, wano ba Israel, uka Utux Baro ka kana ddxeral. Saya, braho su ngali ku hiya ka lnabu tnqliyan.” 16Rmengo ka Elisa: “Mpsdehu ku Utux Tmninun muudus ani knuwan, uxe ku mangal.” Ida rmengo ngali mesa ka Naaman we, ida ini sruwa ka heya. 17Rmengo ka Naaman: “Nasi su ini sruwa, srwai ku hiya, bege tnqliyan ka dxeral klaun mapa 2 dapa roba. Tnqliyan we uxe ku msapuh mege snapuh psqmaun ma snapuh utux icil. Wano ba Utux Tmninun ka thmkuwan mu mege. 18Wano 1 ka oda we, tai su so srwaun ka tnqliyan: Mremux sapah thmkuwan Rimon mosa thmuku ka tnpusu sapah mu we, ida dmoi ba baga mu ka heya. So kiya de, asi ku ka thmuku meniq Ringmung hiya. Tai so Utux Tmninun we mpsruwa tnqliyan su, mmoda ku thmuku meniq Ringmung hiya.” 19Rmengo heya ka Elisa: “Nduwa mmsbleyaq mosa hiya!”
Kiya de mlatac heya ka Naaman. Ini ktheya ka knksaan daha. 20Rmengo ka Geyxajiy tnqliyan Elisa: “Qtai! Tnpusu sapah mu we, ini sruwa mangal lnabu nadis peeyah baga Naaman seediq Aram. Mpsdehu ku Utux Tmninun muudus ani knuwan, ida mu sklaun ka heya ma, pgsaun mu peeyah heya ka qyqeya.” 21Kiya de mosa smdurak Naaman ka Geyxajiy. Naaman we, qmita niqan seediq gisu smdurak de, smterung heya meyah truma peeyah rulu, rmengo: “Mbleyaq namu kana ho?” 22Rmengo ka Gihaji: “Mbleyaq kana! Smnkagul kenan ka tnpusu sapah mu, rmengo: ‘Qtai! Niqan 2 heyi mbbeyax, dheya we tnugsaan dmpgeela kari pneeyah dgiyaq Eprayim dehuk hini. Braho su biqi 1 tarantu ging ma 2 lukus tqwilaq ka dheya.’” 23Rmengo ka Naaman: “Un! Ngali ka 2 tarantu.” Ida rmengo ka heya ma, wada na tqriun 2 lubuy ka 2 tarantu ging ma pspuun na 2 lukus tglwilaq sbege na tnqliyan na. Kiya de mgeela mheal mkkesa berah Gihaji ka dheya. 24Betaq bobo dgiyaq, mangal peeyah baga daha ka Gihaji ge, psaun na truma sapah na ma, skguli na posa ka dseediq nii da. 25Mremux sapah ka Geyxajiy de, mheyu berah tnpusu sapah na. Rmengo heya ka Elisa: “Geyxajiy, pneeyah su inu?” Rmengo ka heya: “Ini ku osa ani inu ka tnqliyan.” 26Rmengo heya ka Elisa: “Mtuting peeyah rulu na smterung isu ciida ka seediq kiya we, ini osa hiya ka lhebun mu peni? Nii we ya ngngalun ta king, lukus, dxeral curung, dxeral lipas, dapa ma, tnqliyan ka nii ho? 27Manu so kiya de, maha smnegul isu ma lqlaqi mslutuc su betaq ani knuwan ka mnarux buro Naaman.” Mlatac peeyah berah Elisa ka Gihaji de, asi eyah ka mnarux msburo heyi, mntena so huda knbhege ka heyi.
Currently Selected:
2 Qbsuran Paru 5: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
