2 Qbsuran Paru 4
4
Dmayo Qrinuc Mqedil Mqrinuc ka Elisa
1Meyah lmingis dmurun Elisa ka mqedil tnugsaan dmpgeela kari ma, rmengo: “Tnqliyan su, rseno mu we wada mhuqil da. Heya we, ida miicu ba Utux Tmninun we, ida su klaun bale. Saya, niqan ka meyah mesa knbrexan ka dheya ma, ngalun daha tnqliyan ka 2 laqi mu.” 2Rmengo heya ka Elisa: “Mphuwa ku mesa dmayo sunan ho? Tgsai ku niqan maanu ka sapah su?” Rmengo ka heya: “Sapah tnqliyan mqedil su we wano ba 1 rusuq abura de, uka ani maanu.” 3Rmengo heya ka Elisa: “Osa nganguc ma, osa kmbarux egu psaan gaga ini psai. Keegu hari ka knbrexan su. 4Bobo na de, brinah mosa sapah su ma, lebi ka rhengun. Isu ma laqi su rseno we, angal ka abura ma hrgaani kana psaan, stenge na de posa icil kiya da.” 5Kiya de mqedil mqrinuc we mlatac Elisa. Lebun na ka rhengun ma, rhugan na sapah toma ka heya ma laqi na rseno. Sbege daha heya ka ppsaan, kiya de sheruy na ka abura. 6Stenge kana ka psaan de, rmengo laqi na: “Biqi ku hiya psaan na.” Rmengo heya ka laqi na rseno: “Uka psaan da.” Kiya de msetuq ka abura da. 7Mqedil nii ge, mosa rmengo seediq Utux. Rmengo heya ka seediq Utux: “Sai gmbaruy ka abura ma prrhani kusa su. Msngari na de tduwa pkuudus isu ma 2 laqi su rseno kiya.”
Smterung Elisa ka Mqedil Sunem
8Niqan 1 ali, mooda Sunem ka Elisa, gaga hiya ka 1 mqedil mbleyaq bale ma kmkiyux hmeruc ma peekan hnpure heya. Bobo na de, nasi moda hiya ka Elisa de, ida moda mtqiri hiya ma moda mekan ido. 9Rmengo rseno na ka mqedil: “Qtai! Klaun mu seediq Utux mrtaso ka mnoda ita hini klaali. 10Smlaane ta 1 sapah biciq bobo dnamux ma, pniqe ta tqiyan, ptasan, tluungan ma, pcmagan. Meyah ita hini ka heya de, tduwa meniq ita hini.”
11Niqan 1 ali, mosa hiya ka Elisa, mnkala sapah kiya ma, msange hiya. 12Rmengo Geyxajiy tnqliyan na ka Elisa: “Sai mlawa ka mqedil Sunem nii.” Saun na mlawa ka mqedil ma, mheyu berah Elisa ka mqedil. 13Rmengo tnqliyan na ka Elisa: “Slingi ka mqedil kiya: ‘Qtai! Egu riyung ka tnbyaxan su kenan, maanu ka ddayo mu sunan ho? Manu ka saun mu mesa qbsuran paru ma qbsuran supi quri sunan ho?’” Rmengo ka heya: “Nii ku tgbleyaq meeniq ckceka seediq mu da.” 14Rmengo ka Elisa: “Maanu ba ka ddayo mu heya ho?” Rmengo ka Geyxajiy: “Hiya ge, uka ba ka laqi na ma, rudan ba ka rseno na uri da.” 15Rmengo ka Elisa: “Sai mlawa ka heya!” Kiya de meyah ka mqedil ma, mheyu rhengun. 16Rmengo ka Elisa: “Kawas so saya, mdoi su 1 laqi rseno ka isu.” Rmengo ka heya: “Seediq Utux, tnpusu sapah mu! Iya so kiya mberiq tnqliyan mqedil hiya!” 17Kiya de bale ba nii mchedil ka mqedil nii. Dehuk ka 1 knkawas de, mtuting 1 laqi rseno ka heya ma, ida so kari Elisa rnengo na heya.
18Mdakil ka laqi, niqan 1 ali mosa tama na ma dseediq gaga kmetuy ka heya. 19Rmengo tama na ka heya: “Tunux mu! Tunux mu!” Rmengo tnqliyan na ka tama na: “Doi ka laqi ma adis bubu na hiya.” 20Tnqliyan nii we asi na desi bubu na ka laqi. Tleung papak bubu na ka laqi ma, betaq ceka naali de mhuqil da. 21Wada mgkala baro ka bubu na, psaun na bobo qlapo seediq Utux ka heya. Meluk rhengun ma, meyah nganguc. 22Mosa mlawa rseno na ma, rmengo: “Skguli 1 tnqliyan su, madis 1 dapa roba kenan. Mosa ku qmita seediq Utux ma mpbrinah ku dungal.” 23Rmengo ka rseno na: “Uxe pnrading idas ma ali sngayan ka saya, ma su mosa hiya ho?” Rmengo ka mqedil: “Ini huwa.” 24Kiya de psramal dapa roba ka heya ma, rmengo tnqliyan: “Osa, osa nhari. Iya bale sange, iya ku trai, asi ku ka rmengo sunan.” 25Mquri dgiyaq Karmel ka mqedil ma dehuk seediq Utux hiya.
Qmita mqedil gisu peeyah theya ka seediq Utux de, rmengo Geyxajiy tnqliyan na ka heya: “Tai! Gisu hini ka mqedil seediq Sunem! 26Osa tmalang nhari smterung heya, rngagi ka heya: ‘Mbleyaq su ho? Mbleyaq ka rseno su ho? Mbleyaq ka laqi su?’” Rmengo ka mqedil: “Mbleyaq.” 27Mnkala dgiyaq ka mqedil de, mosa seediq Utux hiya ma, dmoi papak na. Meyah cmikul heya ka Geyxajiy, rmengo ka Elisa: “Laxi hiya! Ado gaga mqraqil riyung ka lhebun na. Kiya de lmeing kenan oda nii ka Utux Tmninun. Ini ku na rngagi.” 28Rmengo ka mqedil: “Uxe ku ba mnesa laqi ka yaku peni? Uxe ku rmnengo, iya qberiq kenan peni?” 29Rmengo Geyxajiy ka Elisa: “Hbiki hwinuk, desi ka hukuc mu. Nasi su smterung seediq de, iya bale cyuki ka heya. Nasi rmengo sunan ka seediq we, iya bale ciyuk uri. Psai bobo dqeras laqi ka hukuc mu nii.” 30Rmengo ka bubu laqi: “Mpsdehu ku Utux Tmninun mudus ani knuwan, dungal ma mpsdehu ku knuudus su, uxe ku ba mplatac sunan.” Kiya de mtutuy ka Elisa ma msuupu mqedil nii mosa da. 31Tnleale mosa ka Geyxajiy we, psaun na bobo dqeras laqi ka hukuc Elisa. Kiya de uka ka hrenang ma, ini ba klgelu ani biciq. Mpbrinah mosa ka Gihaji de, smterung Elisa ma, rmengo heya: “Ini tutuy ka laqi na.”
32Mremux sapah ka Elisa, qtai! Wada mhuqil ka laqi ma, gaga psaun qlapo na. 33Mremux sapah ka heya ma, leban na ka rhengun. Wano 2 heyi nanak ka meeniq truma ma, dmurun Utux Tmninun ka heya. 34Mosa taapa bobo heyi laqi ka heya, pstrengun na ka quwaq na ma quwaq laqi, doriq na ma doriq laqi, baga na ma baga laqi. Taapa bobo heyi laqi ka heya ma, prading muuxul ka heyi laqi da. 35Bobo na de, meyah truma ka heya ma, mkkesa truma sapah. Dungal we mosa taapa bobo heyi laqi dungal. Mn7 tbsengu ka laqi de qmita ka doriq na da. 36Mlawa Geyxajiy ka Elisa ma rngagan na: “Sai mlawa ka mqedil seediq Sunem!” Meyah ka mqedil de rmengo heya ka Elisa: “Sai dmoi ka laqi su.” 37Mremux sapah truma ka mqedil, tgtemaq berah papak Elisa ma thmuku heya. Bobo na de, mosa dmoi laqi na ma, mosa nganguc da.
Daha Pnskraya Noda
38Mbrinah Gilgal ka Elisa we, gisu daan krayan ka dxeral hiya. Tleung berah na ka tnugsaan dmpgeela kari ma, rmengo tnqliyan na: “Psai bobo puniq ka ribo paru, sai pure begu ka tnugsaan dmpgeela kari.” 39Niqan 1 seediq, mosa migin damac bbuyu ma, smdiyal wahir ciyak utux de, egu ba nangal na. Tteun na ma phrayun begu ckceka ribo. Kiya we ini na klai maanu ka kiya. 40Kiya de sheruy daha ma ppqdiyal daha dheya. Tmunguh mekan ciida ka dheya we, asi plawa: “Seediq Utux! Shuqil seediq ka gaga ribo nii!” Kiya de ini daha uqi da. 41Rmengo ka Elisa: “Osa mangal nemu mugi.” Kiya de psaun na toma ribo de, rmengo: “Sai dmahur, qdali seediq!” Uka shuqil seediq ka ckceka ribo da.
42Niqan 1 seediq pneeyah Baal Salisah. Madis uqun heyi pnlaale, pang snmalu 20 lubuy mugi paru ma, bgurah nkira. Tqriun na lubuy ma bbege na seediq Utux. Rmengo ka seediq Utux: “Qdlani dheya ka nii.” 43Rmengo ka tnqliyan: “Huwa kesun posa berah 1'00 heyi seediq ka nii ho?” Rmengo ka Elisa: “Sai peekan ka seediq wa! Ado rmnengo so nii ka Utux Tmninun: Meekan ka dheya ma, niqan ka msngari na dungal.” 44Kiya de tnqliyan na we, psaun na berah daha ka uqun ma, wada mekan ka dheya ma, niqan msngari dungal. Mntena so rnengo kari Utux Tmninun.
Currently Selected:
2 Qbsuran Paru 4: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
