2 Qbsuran Paru 23
23
Psbgurah Moda ka Yosiyahu
(2 No 34:3-7, 29-33)
1Yosiyahu we psseli kana ddrudan Yehudah ma Yerusalem. 2Ani tgbiciq betaq paru, msuupu mosa sapah thmkuwan Utux Tmninun kana ka qbsuran paru, dseediq Yehudah ma Yerusalem, msapuh, mpgeela kari ma kana seediq. Qbsuran paru we, spegun na ma spqbahang na dheya ka kana kari pnatis patis pnsdhegan snlayan daha truma sapah thmkuwan Utux Tmninun. 3Mheyu ssiyo eruc ka qbsuran paru ma, smdehu berah Utux Tmninun, mpskingal lhebun ma, mpskingal lnglungan na mpuyu Utux Tmninun. Mpthei gaya pndakar, gaya ddaun, kari pndakar na ma, muyu kari pnsdhegan pnatis patis nii. Kana seediq we smruwa ooda muyu pnsdhegan daha.
4Qbsuran paru we posa kari Xilqiyah paru msapuh ma mdayo msapuh ma, dmpqlahang rhengun sapah thmkuwan, hqulun daha nganguc sapah thmkuwan Utux Tmninun kana ka Baal ma Aserah ma, qyqeya ddooyun daha thmuku kana mnmanu karac baro. Saun daha psqama qnpahan Qidron bukuy alang Yerusalem. Qbulic we desun daha betaq Beytel. 5Dmsapuh pnheyu dqbsuran paru Yehudah mpthmuku tikung meniq dspuhan lualang Yehudah ma, spuhan psqama skenux ssiyo Yerusalem we, wada laxan qbsuran paru kana. Dheya we msapuh Baal, hido, idas, pngerah ma, kana pnskraya karac. 6Hrigun na peeyah sapah thmkuwan Utux Tmninun betaq ayu Qidron bukuy Yerusalem ka Aserah. Psqmaun daha ssiyo ayu Qidron ma, pbqlicun na psqama ma qbulic na we srehak na quri pnspuwan kana habung seediq. 7Heya dungal we, phrahun na ka sapah rseno kkbrexun gaga meniq sapah thmkuwan Utux Tmninun. Kiya ka meniq sapah nii smmalu lukus Aserah ka mqedil. 8Madis dmsapuh peeyah Yehudah ka heya ma, mosa psrutiq spuhan dmsapuh peeyah Geba betaq Beerseba. Dungal we hmurah spuhan gaga ssiyo rhengun alang. Spuhan nii we, gaga tgberah rhengun alang ka ga niqan Yehosua pqlahang alang, quri iril rhengun paru rrmuxan alang. 9Kiya de we dmsapuh spuhan we, ini tduwa qmeepah spuhan Utux Tmninun Yerusalem. Wano mekan pang ini psai tgeda ckceka mtswai daha nanak. 10Dungal we mosa smrutiq Topet gaga ayu Hinom. Ini na srwai psqama puniq smapuh Molek ka lqlaqi daha. 11Wada na lixun ka gaga ssiyo rhengun sapah thmkuwan Utux Tmninun, smdaling Natan Melek qbsuran mdudul elu sapah na, dapa dmay ssapuh dqbsuran paru Yehudah bbege daha hido ma, sqmaun daha ka rulu mccebu bbege daha hido. 12Sspuhan snmalu dqbsuran paru Yehudah gaga dnamux Axaj ma, sspuhan snmalu Menaseh psaan na cenga 2 nganguc sapah thmkuwan Utux Tmninun we, wada sqada ma wada hrigun peeyah hiya. Qbulic na we sheruy daha ayu Qidron. 13Wada srtiqan ka dspuhan snmalu Selomoh qbsuran paru Israel gaga nklaan hido Yerusalem, Astoret snmalu daha seediq Cidon gaga tgtruma dgiyaq Curung. Kemos nseediq Moab ma, Milkom snmalu daha seediq Amon. 14Dungal we hrahun na tmuting ka eruc btunux tikung ma, slapi na ka Aserah ma, psteme na buuc mnhuqil seediq ka spuhan hiya.
15Kiya uri we, spuhan gaga dgiyaq biciq Beytel we, kiya ka smnalu Yarabeam qbsuran paru laqi Nebat. Kiya ka mege qnquwan noda seediq Israel. Wada na hrahun ma psqama ka spuhan nii ma kana spuhan dgiyaq biciq. Pbqelic na ptnemu ka btunux ma psqmai na ka Aserah. 16Pooda doriq qmita ssiyo ka Yosiyahu ma, qmita duma habung gaga bobo dgiyaq de, smkagul seediq mosa kmari buuc peeyah habung. Psai daha bobo spuhan ma psqmai daha. So nii snrtiqan daha spuhan we, mntena kari rnengo Utux Tmninun pnoda na seediq Utux, Yarabeam we mnheyu ssiyo spuhan smseeman ciida. Yosiyahu mita icil, qtaan na habung seediq Utux rmnengo kari nii. 17Rmengo ka heya: “Manu ka pnheyu btunux qnita mu nii ho?” Rmengo heya ka seediq alang hiya: “Habung seediq Utux ka nii. Heya we pneeyah Yehudah ma, tena na wada spgeela rmengo ka noda qbsuran paru quri spuhan Beytel.” 18Rmengo ka Yosiyahu: “Laxi hiya ka heya! Iya hrigi ka buuc na.” Kiya de skuun daha ka buuc na ma, buuc mpgeela kari pneeyah Samareia uri. 19Wada laxun Yosiyahu kana ka spuhan dgiyaq biciq smnalu dqbsuran paru Israel mneniq lualang Samareia, kiya ka pstutui seang Utux Tmninun. Mntena so noda na Beytel hiya. 20Dungal we wada na phqilun bobo spuhan hiya ka dmsapuh spuhan hiya ma, psqmaun daha bobo spuhan ka buuc seediq. Kiya de mbrinah Yerusalem ka heya da.
Mooda Smseman Hrnasan ka Yosiyahu
(2 No 35:1-19)
21Posa kari seediq ka qbsuran paru: “Yamu we puyu pnatis patis pnsdhegan nii, moda smseman hrnasan mquri Utux Tmninun, Utux Baro namu.” 22Peeyah ali qmlahang Israel ka dmpsgao betaq dqbsuran paru Israel ma, kana ali qnlhangan dqbsuran paru Yehudah we, ini ba oda smseman hrnasan so nii. 23Wano betaq tg18 knkawas qnlhangan Yosiyahu ka mooda smseman hrnasan quri Utux Tmninun meniq Yerusalem hiya.
Duma Bnrahan Noda Yosiyahu
24Duma noda Yosiyahu ge, qmnita ttaus utux, rrengo utux, tikung gaga sapah ma tikung ma, nnii pqnqihun ba meniq dxeral Yehudah ma Yerusalem we, wada laxan Yosiyahu kana. Nii we ppuyu na kari gaya gaga spatis patis snlayan Xilqiyah msapuh meniq sapah thmkuwan Utux Tmninun hiya. 25Tgberah Yosiyahu, uka ka dqbsuran paru mntena heya, so nii speeyah kana lhebun, kana lnglungan, kana knkela mquri Utux Tmninun ma, muyu kana gaya Moseh. Bobo na we, uka ka qbsuran paru pntena heya uri.
26Kiya de, ida ini sange paru seang Utux Tmninun mquri Yehudah, ado qnnaqah noda Menaseh ka bnrebur seang heya. 27Rmengo ka Utux Tmninun: “Asi mu ka sqada peeyah berah mu ka Yehudah, mntena so qnnada ku Israel. Laxun mu ka Yerusalem gneegan mu cuuxal ma, wada ku rmengo, ngayan mu we ida meeniq sapah thmkuwan hiya.”
Mgeedang ka Yosiyahu
(2 No 35:20-36:1)
28Duma noda Yosiyahu, kana noda na we, uxe gaga spatis ‘Patis ndaan Dqbsuran Paru Yehudah’ hiya peni? 29Ali qnlhangan Yosiyahu ciida, Paroh Neko qbsuran paru Micrayim ge, steetu mosa yayung Euhrates, mmaha qbsuran paru Asur hiya. Kiya we mosa mccebu heya ka Yosiyahu. Qmita Yosiyahu meeniq Megido hiya ka qbsuran paru Micrayim de, phqili na ka Yosiyahu. 30Dqbsuran mdayo Yosiyahu we, saapa daha rulu mccebu peeyah Megido betaq Yerusalem ma, skuun daha habung na nanak hiya. Seediq dxeral nii we gmao Yehoaxaj laqi Yosiyahu ma, hrigan daha abura spririh daha tama na mqbsuran paru.
Yehoaxaj Qbsuran Paru Yehudah
(2 No 36:2-4)
3123 knkawas na mqbsuran paru ka Yehoaxaj ma 3 idas qbsranun na Yerusalem hiya. Xamutal ka ngayan bubu na ma weewa Yirimiya pneyah Libnah. 32Ida so noda pusu rudan nnaqah kana noda na Utux Tmninun ka heya. 33Paroh Neko ge, psaun na sapah kuung Riblah dxeral Xamat hiya ka Yehoaxaj nii mqbsuran paru Yerusalem ma ini na srwai pqlahang. Dungal we pgsaan na 100 sneengan knchdilan ging ma 34 sneengan chndilan king pila dmahur ka peeyah qlhangan nii. 34Elyaqim laqi Yosiyahu we spririh Yosiyahu tama na pthlangun paru Paroh Neko ma Yehoyaqim kesun na marah tmngayan. Kiya de desun Neko qbsuran paru quri Micrayim ka Yehoaxaj ma wada mhuqil hiya da.
Yehoyaqim Qbsuran Paru Yehudah
(2 No 36:5-8)
35Mege pila qlhangan quri Paroh ka Yehoyaqim. Kiya de ppuyu na so pnesa Paroh Neko ka pila bbiqun we pssugun na mesa peeyah seediq qlhangan na ka ging ma king. 3625 knkawas na mqbsuran paru ka Yehoyaqim ma 11 knkawas qbsranun na Yerusalem hiya. Jebudah ka ngayan bubu na ma weewa Pedayah pneyah Rumah. 37Ida so noda pusu rudan nnaqah kana qneepah na Utux Tmninun ka Yehoyaqim.
Currently Selected:
2 Qbsuran Paru 23: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
