2 Qbsuran Paru 22
22
Yosiyahu Qbsuran Paru Yehudah
(2 No 34:1-2)
18 knkawas na mqbsuran paru ka Yosiyahu ma, 31 knkawas qbsranun na Yerusalem hiya. Yetidah ka ngayan bubu na ma, weewa Adayah pneeyah alang Bacqat. 2Mndungus doriq Utux Tmninun ka noda Yosiyahu. Muyu ndaan Dawid qbsuran paru pusu rudan na ma ini kciicil.
Smdiyal Patis Gaya
(2 No 34:8-28)
3Tg18 knkawas ka qlhangan Yosiyahu qbsuran paru, smkagul Sapan mpatis sapah qbsuran paru, laqi Acalyahu lqlaqi laqi Mesulam mosa sapah thmkuwan Utux Tmninun. Rmengo: 4“Osa Xilqiyah paru msapuh hiya. Sai bleyaq smepu ka ging bnege daha sapah thmkuwan Utux Tmninun ma, ging pneeyah seediq nangal dsupi mpqlahang rhengun alang hiya. 5Sai mege baga dqbsuran gaga qmlahang tmgeru smalu sapah thmkuwan Utux Tmninun. Dheya ka mosa mege ssadu dseediq meepah hiya. Kiya ka slmeun daha ka wada naqah sapah thmkuwan. 6Kiya de ssadu daha mpsmalu qyqeya qqhuni, seediq dmpsmalu sapah ma, mpsmalu bbtunux. Dungal we baruy daha qhuni ma btunux stgeeru daha smalu sapah thmkuwan. 7Kiya de we iya sai smepu ka dseediq mnangal ging, ado bale ba moda ka dseediq nii.”
8Rmengo Sapan mpatis ka Xilqiyah msapuh paru: “Smndiyan ku patis gaya meniq sapah thmkuwan Utux Tmninun hiya.” Kiya de sbege na Sahwan ka patis ma, smepu patis ka Sahwan. 9Mosa qbsuran paru hiya ka Sapan ma, mosa rmengo noda nii: “Yaku tnqliyan we, wada mu saan hmeruy ka ging mneeniq sapah thmkuwan ma, wada mu sbege baga dqbsuran mpqlahang dseediq meepah sapah thmkuwan Utux Tmninun da.” 10Dungal we rmengo qbsuran paru ka heya: “Bnege 1 patis kenan ka Xilqiyah msapuh paru.” Kiya de smepu berah qbsuran paru ka Sapan.
11Mbahang kari patis gaya nii ka qbsuran paru de, asi sgaliq lukus. 12Posa kari Xilqiyah msapuh, Axiqam laqi Sahwan, Akbor laqi Mikayah, Sapan mpatis sapah qbsuran paru ma, Asayah mdudul dmdayo qbsuran paru ka qbsuran paru: 13“Osa ka yamu. Pdai so kari qnita namu patis nii, ririh yaku, seediq ma, kana Yehudah we, sai smiling ka Utux Tmninun. Ado pusu rdrudan ta we, ini qbahang kari pnatis nii ma, ini puyu moda kana pnatis na quri ita. Kiya ka mseang quri ita ka Utux Tmninun.”
14Kiya de Xilqiyah msapuh, Axiqam, Akbor, Sapan ma Asayah we, mosa smiling Xuldah mqedil ma mpgeela kari. Heya we mqedil Salum mpqlahang kana lukus. Salum we laqi Tiqwah ma lqlaqi laqi Xarxas. Hruda we gaga meeniq tg2 nniqan Yerusalem. Mosa smiling heya ka dheya. 15Rmengo dheya ka Hruda: “Rmengo so nii ka Utux Tmninun, Utux Baro nuIsrael: ‘Tduwa namu mbrinah cmiyuk smkagul yamu, rngagi: 16Rmnengo so nii ka Utux Tmninun: Qtai! Ida ku mpuyu kana kari wada spegun qbsuran paru Yehudah ma, mpkdira ku dxeral hini ma dseediq gaga dxeral nii. 17Ado qmada kenan ka dheya ma, mege snapuh quri utux icil. Brebur seang mu ka kana noda baga daha. Kiya ka mpquri dxeral nii uxe mpsange ka seang mu.’ 18Kiya de, qbsuran paru Yehudah snkagul yamu meyah smiling Utux Tmninun we, kuso nii ka kari cmiyuk heya: ‘Rmengo so nii ka Utux Tmninun, Utux Baro nuIsrael: Quri so kari bnhangan su we, 19kiya ka kari mu bnhangan su quri dxeral nii ma dseediq gaga dxeral nii. Maha laxun ka dxeral nii ma, mangal kari snyusan ka seediq. Kiya de maha mhenuk ka lhebun su ma, tgseesu su berah Utux Tmninun. Mpsgaliq su lukus, mpdiras su lmingis mquri kenan. Ado mpsruwa ku sunan. Rnengo Utux Tmninun ka nii. 20Kiya de, qtai! Maha su msuupu pusu rdrudan su hiya ma, mptbleyaq su mremux habung. Kana pnkdira mu dxeral nii we, uxe su qtaun doriq.’” Kiya de mosa mbrinah cmiyuk kari nii ka dheya.
Currently Selected:
2 Qbsuran Paru 22: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
