2 Qbsuran Paru 19
19
Smkagul Seediq Smiling Isaya ka Xijqiyahu Qbsuran Paru
(Isa 37:1-7)
1Mbahang ka Xijqiyahu qbsuran paru de, smgaliq lukus ma, mlukus lukus mbasi mosa mremux sapah thmkuwan Utux Tmninun. 2Plkusi na lukus mbasi ka Elyaqim qbsuran mpqlahang sapah qbsuran paru, Sebna qbsuran mpatis, drudan dmsapuh ma, mosa Isaya mpgeela kari laqi Amos hiya. 3Rmengo heya ka dheya: “Rmengo so nii ka Xijqiyahu: ‘Ali qrqilan, trqilun ma, pqsqaun ka saya. Mntena so laqi rabu uxe beyo mtuting we, uka ka beyax na mptnlaqi. 4Nhuwa wada mbahang kana kari qbsuran supi Asur ka Utux Tmninun, Utux Baro su. Kiya ka kari snkgulan qbsuran paru Asur tnpusu sapah na, meeyah tmsiiyax rmengo Utux Baro muudus ani knuwan. Kiya de maha mseang mnbahang kari nii ka Utux Tmninun, Utux Baro su. Braho su dyagi mdiras dmurun ka dseediq nii mtngari muudus.’” 5Mosa Isaya ka dqbsuran mdayo Xijqiyahu qbsuran paru de, 6rmengo dheya ka Isaya: “Rngagi so nii ka tnpusu sapah namu, rmnengo so nii ka Utux Tmninun: ‘Iya kcugi ka kari bnhangan namu pqluqah rmengo kenan ka tnqliyan qbsuran paru Asur. 7Qtai! Mplgelu ku lhebun na ma, mnbahang bgihur ka dheya de mpbrinah dxeral daha nanak. Ptkurun mu toma hlmadac hiya ka heya.’”
Smiicu Dungal ka Qbsuran Paru Asur
(Isa 37:8-20)
8Qbsuran mdudul supi we, mnbahang wada mlatac peeyah Lakis ka qbsuran paru Asur de, mbrinah alang na ka heya. Pkelu ba gisu mccebu Libnah ka qbsuran paru Asur. 9Mbahang gisu mpprengo Tirhaqah qbsuran paru Kusu: “Qtai! Mplatac nganguc meyah mccebu sunan ka heya.” Kiya de smkagul snkgulan dungal mosa qmita Xijqiyahu ka qbsuran paru Asur, rmengo: 10“Rngage so nii ka Xijqiyahu qbsuran paru Yehudah: ‘Iya qbahang Utux Baro sntmaan namu gaga mberiq rmengo isu: Yerusalem we uxe sbege baga qbsuran paru Asur. 11Qtai! Bnhangan su klaali ka noda dqbsuran paru Asur quri dqlhangan we, ida moda pkuuka we, uxe su mooda so nii ka isu peni? 12Wada daun pnkuuka pusu rdrudan mu we, kiya ka Gojan, Xaran, Recep ma seediq Eden meeniq Telasar. Duutux dqnlahang nii we dmnoi baga dheya peni? 13Gaga inu kana ka qbsuran paru Xamat, Arpad, Separwayim, Hena ma Iwah di?’”
14Maangal patis peeyah baga snkgulan ka Xijqiyahu, mhedu smepu de mosa sapah thmkuwan Utux Tmninun. Rmaguh patis meeniq berah Utux Tmninun. 15Xijqiyahu we dmurun quri Utux Tmninun: “Utux Tmninun, Utux Baro nuIsrael gaga tleung bobo kirubing! Isu, wano isu ka Utux Baro kana qlhangan bobo dxeral. Isu ka smnalu karac ma dxeral. 16Utux Tmninun! Braho su qbahang ba dnurun. Utux Tmninun! Braho su rwahi ka doriq su, bhangi ka kari snngayan na Utux Baro muudus ani knuwan ka snugkulan Sanxerib. 17Utux Tmninun! Bale ba wada pkuuka icicil qlhangan ka dqbsuran paru Asur. 18Utuutux daha we wada daha sqada puniq psqama. Ado dnii we uxe Utux Baro, snmalu baga seediq peeyah qhuni ma btunux. Kiya ka wada daha sqada kana ka nii. 19Utux Tmninun, Utux Baro nami! Saya, braho su doi baga miyan platac peeyah baga qbsuran paru Asur. So maha mkela, wano isu, Utux Tmninun ka Utux Baro kana ka dqlhangan bobo dxeral!”
Mege Kari Qbsuran Paru ka Isaya
(Isa 37:20-38)
20Smkagul seediq mosa qmita Xijqiyahu ka Isaya laqi Amos, rmengo “Rmnengo so nii ka Utux Tmninun, Utux Baro nuIsrael: Ririh noda Sanxerib qbsuran paru Asur dmurun su kenan we, wada mu bhangun da. 21Quri heya we, rmnengo so nii ka Utux Tmninun:
‘Ini psparu ma, mhulis sunan ka weewa Sion.
Gmkuwak tunux quri sunan ka Yerusalem.
22Ima ka snyanun su, ima ka srhqelan su,
pyahun su baro ba ka hrenang, psparu ba doriq su mcebu su ima ho?
Gisu su mccebu Mrtaso nuIsrael.
23Smkagul su snkgulan meeyah su smngayan Bukung:
Dmnudul ku egu ba rulu mccebu mgkala dgiyaq paru,
mnkala miyan betaq bungu dgiyaq Lebanon.
Sqitun mu ka bbaro ba qulic bale,
tgmalu ba tqilung uri.
Mpremux ku nniqun theya riyung,
mpremux ku ckceka bbuyu mmsbleyaq bale.
24Kmnari ku hghugan qsiya, mimah ku qsiya icil qlhangan.
Qtmaqun mu qapal papak mpdengu ku kana yayung Micrayim.
25Uxe su mnbahang,
sneengan mu pnlaale, pnheyu mu cbeyo ma, dhekan mu moda saya ho?
Kiya ka wada su hmurah mkere pnharac lualang, wada su ngalun so nlaxan.
26Seediq meeniq hiya we uka beyax daha,
pkrkerang msiqa riyung ka dheya.
Mntena speriq, mntena sama breenux,
mntena speriq dnamux,
mntena mdengu mugi betaq ini kdakil.
27Tleung su, mosa su nganguc, mremux su,
mseang su paru quri kenan we, klaun mu kana.
28Ado mdiras su mseang kenan ka isu,
dehuk birac mu ka pnsparu su,
mposa ku kodung, mplihu ku muhing su,
psaun mu quwaq su ka ngadux,
Pbrnahun misu elu pnyahan su.’”
29“Pnskraya mu sunan ka nii: Meekan namu hmneru peeyah mntuting drami ka knkawas nii. Knkawas mmeyah nii we, ida namu meekan hneru na hiya dungal. Tg3 knkawas de mtukuy namu ma mpqburung namu. Meepah namu qnpahan lipas ma, meekan namu heyi na. 30Mnsngari qndriqan ka seediq sapah Yehudah we, ida mptgamil ma mpgheyi. 31Meeniq ka mnsngari na peeyah Yerusalem. Qnduriq na peeyah Sion. Utux Tmninun Mdoi Kana Supi we mooda nanak oda nii.
32Maanu so kiya de, rmengo qbsuran paru Asur ka Utux Tmninun: Heya we uxe mpteme alang nii, uxe mpcebu budi dehuk alang nii uri, uxe mdoi qeerung dehuk berah alang ma, uxe mppharac qbrangan mcebu alang uri. 33Peeyah elu inu ka mremux we mooda elu nii dungal mbrinah, uxe mpremux alang nii ka heya. Rnengo Utux Tmninun ka nii. 34Ririh quri kenan ma quri Dawid tnqliyan mu we, ida ku mpqlahang ma mpdoi ku baga alang nii.”
35Keeman ciida, mosa nganguc ka snkgulan Utux Tmninun. Mosa phuqil 18 mang 50'00 heyi meniq kobu Asur. Mtutuy mgrebu bale ka seediq de, qtai! Ma bqerus mnhuqil kana. 36Kiya de asi hurah kobu ka Sanxerib qbsuran paru Asur ma, mbrinah mosa meniq Nineweh. 37Niqan 1 ali, nii thmuku Nisrok utux na sapah tikung hiya ciida, dmoi hlmadac wada phqilun Adrameleq ma Sarecer laqi na ka heya. Bobo de, mosa qduriq dxeral Ararat ka dheya. Esar Xadon laqi na ka lmutuc mqbsuran paru.
Currently Selected:
2 Qbsuran Paru 19: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
