2 Qbsuran Paru 18
18
Xijqiyahu Qbsuran Paru Yehudah
(2 No 29:1-2, 30:1)
1Tg3 knkawas qlhangan na Israel ka Hosea qbsuran paru laqi Elah we, mqbsuran paru Yehudah ka Xijqiyahu laqi Axaj. 225 knkawas na mqbsuran paru ka heya ma, 29 knkawas qbsranun na Yerusalem hiya. Abi ka ngayan bubu na ma weewa Jekaryah. 3Mndungus noda na quri doriq Utux Tmninun ka Xijqiyahu, muyu Dawid pusu rudan na ka kana noda na. 4Sqada na ka sapah tikung gaga dgiyaq biciq, gremun na ka eruc btunux, ptkurun na ka tikung Aserah ma, pstmaqun na ka quyu limuk snmalu Moseh. Ado ida thmuku quyu limuk ka seediq Israel ciida. Nexustan kesun daha tmngayan ka quyu limuk. 5Smtama Utux Tmninun, Utux Baro nuIsrael ka Xijqiyahu. Uka ani kingal mntena heya dqbsuran paru Yehudah. 6Ado ida smnegul ba Utux Tmninun ma, muyu ba gaya Utux Tmninun tnugesa na Moseh ka heya ma, ini ba alix klaali. 7Msuupu meniq heya ka Utux Tmninun ma, ani maanu ka sneengan na we dhekan na moda kana. Tbrinah qbsuran paru Asur ka heya ma, ini thei heya. 8Mosa mccebu seediq Peliset betaq Ajah ma, ddxeral siyo na hiya, peeyah paga qlhangan qmita betaq qbrangan alang mccebu ka Xijqiyahu.
9Tg4 knkawas qlhangan na ka Xijqiyahu qbsuran paru ma, tg7 knkawas qlhangan na Israel ka Hosea qbsuran paru laqi Elah ciida, Salmaneser qbsuran paru Asur we, meyah mccebu Samareia. 10Bobo 3 knkawas, ngalun daha ka alang. Tg6 knkawas qlhangan na ka Xijqiyahu de, tg9 knkawas qlhangan na Israel ka Hosea qbsuran paru. Wada ngalun ka Samareia. 11Qbsuran paru Asur we qrapun na ka seediq Israel ma desun na Asur. Saan na ptrehak peeniq alang Xelax ma Gojan ssiyo yayung Xabor ma lualang Maday. 12Nii we ado ini qbahang kari Utux Tmninun, Utux Baro daha, tbrinah pnsdhegan na. Dheya we ini qbahang ma, ini puyu kana tnugesa Moseh tnqliyan Utux Tmninun ka dheya.
Smiicu Smterung Yerusalem ka Asur
(2 No 32:1-19. Isa 36:1-22)
13Tg14 knkawas qlhangan Xijqiyahu qbsuran paru we meyah mccebu kana lualang mbeyax Yehudah ka Sanxerib qbsuran paru Asur ma, wada na ngalun kana ka lualang. 14Smkagul seediq mosa Lakis gaga niqan qbsuran paru Asur hiya ka Xijqiyahu qbsuran paru Yehudah, rmengo: “Wada ku mqnuuqu ka yaku da. Braho su brinah peeyah yaku hini. Kana pnkdira su we, ida mu ngalun kana.” Kiya de qbsuran paru Asur we mesa 3'00 tarantu ging ma, 30 tarantu king ka Xijqiyahu qbsuran paru Yehudah. 15Kiya de Xijqiyahu we, wada na sbege heya kana ka ging meniq sapah thmkuwan Utux Tmninun ma, repun sapah qbsuran paru. 16Ciida, Xijqiyahu qbsuran paru Yehudah we, rheqi na mangal ka king pnqpahan rhengun sapah thmkuwan Utux Tmninun ma, qnpahan na eruc we wada na sbege qbsuran paru Asur kana. 17Qbsuran paru Asur we, smkagul qbsuran supi, qbsuran gmbgaxan, qbsuran mdudul supi peeyah Lakis mquri Yerusalem ma, mosa Xijqiyahu qbsuran paru hiya. Meyah tgbaro ka dheya ma, dehuk Yerusalem hiya. Mheyu ssiyo elu qsiya ma elu quri pneyah langu qsiya daya. 18Mlawa qbsuran paru ka dheya ma, kiya de meyah smterung dheya ka Elyaqim laqi Xilqiyahu qbsuran mpqlahang sapah qbsuran paru, Sebna qbsuran mpatis ma, Yoax laqi Asap qbsuran mpqlahang ndaan.
19Kiya de rmengo dheya ka qbsuran mdudul supi: “Sai rmengo ka Xijqiyahu, so nii ka kari rnengo qbsuran paru Asur: ‘Smtama su maanu? Betaq su so nii psparu riyung ho? 20Rmnengo su, niqan ba ka knkela su oda ma beyax su mccebu. Qtaan mu we kari uka rrihan kiya. Ima bale ka gaga su stmaan, betaq su so nii tbrinah kenan ho? 21Saya, qtai! Sntmaan su Micrayim we hukuc trhibung gnreman kiya. Nasi smtama hukuc nii ka seediq ge, mpbetaq ma mlihu baga na. Paroh qbsuran paru Micrayim we kesun na hiya kana ka smtama heya. 22Nasi namu rmengo kenan: Sntama miyan Utux Tmninun, Utux Baro miyan de, uxe wada hrahun Xijqiyahu ka sapah thmkuwan dgiyaq biciq ma spuhan ma, dungal we betaq rmengo seediq Yehudah ma Yerusalem: Asi namu ka thmuku Utux Tmninun spuhan gaga Yerusalem hini peni? 23Saya, mpuurung su qbsuran paru Asur tnpusu sapah mu, mbege ku 20'00 dapa dmay, teta so bale su ba smkagul 20'00 heyi mpaapa dapa dmay nii. 24Nasi uxe so kiya de, huwa su kesun pqduriq ka tgbiciq ba qbsuran supi ckceka qbsuran mdayo tnpusu sapah miyan ho? Ya su mpstama rulu mccebu ma supi mpaapa dapa dmay Micrayim ho? 25Saya, meeyah ku cmebu ma smeeliq dxeral nii, nii we uxe pneeyah Utux Tmninun peni? Rmnengo kenan ka Utux Tmninun: Osa kmremux dxeral nii, sai smeeliq ka kiya!’”
26Rmengo qbsuran supi ka Elyaqim laqi Xilqiyahu, Sebna ma, Yoax: “Braho su, pskari kari Aram rmengo tnqliyan, ado ini nami kela mbahang. Iya doi kari Yehudah rmengo yami, so uxe betaq birac dseediq gaga bobo paga alang.” 27Rmengo dheya ka qbsuran supi: “Smkagul menan ka tnpusu sapah mu we, ye maha wano isu ma tnpusu sapah su ka srengo mu kari nii? Uxe ku gisu rmengo gaga bobo paga alang, mpsuupu yamu mekan quti namu nanak ma, mimah rebu namu nanak peni?”
28Kiya de mheyu ka qbsuran supi Asur ma, dmoi kari Yehudah mdiras paru rmengo: “Qbhangi ka kari qbsuran paru Asur. 29So nii ka rnengo qbsuran paru: ‘Gaga mberiq yamu ka Xijqiyahu. Ado uxe mpdoi baga yamu peeyah baga mu ka heya. 30Iya qbhangi ka kari Xijqiyahu, rmengo yamu pstama Utux Tmninun. Rmnengo ka heya: Utux Tmninun we mpdoi baga yamu. Alang nii we uxe bbege baga qbsuran paru Asur.’ 31Iya qbahang kari Xijqiyahu! Ado rmnengo so nii ka qbsuran paru Asur: ‘Mptbale namu kenan ka yamu, mpaalix namu ma, txtaxa namu we mpeekan namu lipas namu nanak ma heyi qhuni nunuh ma, mimah namu qsiya bbulan namu nanak. 32Tara kenan mdudul ku yamu mosa kingal nniqan, hiya we mntena dxeral hini. Kiya ka dxeral niqan qnpahan ngalan ba uqun ma bgurah sino, dxeral niqan qnpahan pyahan pang ma qnpahan lipas ma, niqan qhuni curung ma beyuq walu. So namu maha mpkuudus ma, uxe namu mphuqil. Iya qbhangi ka kari Xijqiyahu. Ado gaga psridil rmengo yamu: Mpdoi baga ita ka Utux Tmninun. 33Duutux icil qlhangan we, ima ka mtduwa dmoi baga qlhangan daha nanak mlatac peeyah baga qbsuran paru Asur ho? 34Gaga inu ka duutux Xamat ma Arpad ho? Gaga inu ka duuutux Separwayim, Hena ma Iwah ho? Dnoi baga mnlatac peeyah baga mu ka Samareia ho? 35Duutux dqlhangan nii we, ima ka dnoi baga qlhangan daha nanak mlatac peeyah baga mu ho? Yaa bale mpdoi baga Yerusalem peeyah baga mu ka Utux Tmninun peni?’”
36Kiya de ini squwaq kana ka seediq, uka ba cniyuk daha, ado rmnengo dheya ka qbsuran paru Xijqiyahu: “Iya cyuki rmengo heya.” 37Ciida, asi sgaliq lukus meeyah Xijqiyahu hiya ka Elyaqim laqi Xilqiyah mpqlahang sapah qbsuran paru, Sebna mpatis ma, Yoax laqi Asap mpatis ndaan. Srengo daha heya ka kari qbsuran mdudul supi Asur.
Currently Selected:
2 Qbsuran Paru 18: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
