2 Qbsuran Paru 17
17
Hosea Qbsuran Paru Israel
1Tg12 knkawas qlhangan na Yehudah ka Axaj qbsuran paru we, mqbsuran paru Israel Samareia hiya ka Hosea laqi Elah ma 9 knkawas qbsranun na paru. 2Ini pndungus Utux Tmninun ka noda na, ini pntena so dqbsuran paru Israel tgberah na. 3Salmaneser qbsuran paru Asur we, meyah mccebu Hosea. Kiya de dmayo ma mege qyqeya heya ka Hosea. 4Tbrinah ka Hosea de, smkagul snkgulan mosa So qbsuran paru Micrayim hiya. Ini oda knkawas klaali mege qyqeya qbsuran paru Asur ka heya. Mkela ka Salmaneser de, qrapun na ka Hosea ma, psaun na sapah kuung. 5Meyah mccebu kana dxeral Israel ka qbsuran paru Asur. Meyah dehuk Samareia ma, tlbuwan na 3 knkawas ka Samareia. 6Tg9 knkawas qnlhangan na ka Hosea ciida, ngalun qbsuran paru Asur ka Samareia. Qrapun na ka dseediq Israel ma, desun na Asur peeniq na alang Xelax ssiyo yayung Xabor dxeral Gojan ma lualang Maday.
7Betaq so nii ka dseediq Israel we ado mnoda thmuku utux icil, wada niqan qnquwan noda daha Utux Tmninun, Utux Baro dmnudul dheya peeyah dxeral Micrayim ma, pnlatac dheya peeyah baga Paroh qbsuran paru Micrayim. 8Smnegul noda dseediq icil lniwaq Utux Tmninun berah seediq Israel ma, muyu gaya snmalu dqbsuran paru Israel. 9Dseediq Israel we, mgleing moda ini ksderux noda ma, tbrinah Utux Tmninun, Utux Baro daha, smmalu spuhan gaga bungu dgiyaq biciq, meniq lualang gaga daha niqan peeyah paga sddaan betaq lualang mkkere. 10Phyegan daha eruc btunux ma, tikung Aserah ka ani inu bungu dgiyaq biciq ma toma qhuni. 11Muyu ida so dseediq icil lniwaq Utux Tmninun peeyah berah daha ma, smapuh skenux meniq spuhan dgiyaq biciq. Dungal we moda naqah ma pstutui seang Utux Tmninun. 12Thmuku tikung ka dheya, kiya de rmengo dheya ka Utux Tmninun: “Iya ooda so nii.” 13Utux Tmninun we, spooda na dmpgeela kari ma dmpgeela qmita mosa pqlahang rmengo Israel ma Yehudah: “Paalix peeyah naqah noda namu. Puyu kana gaya pndakar ma kari pndakar wada mu sbege pusu rudan namu ma, pnoda dmpgeela kari rmengo yamu.” 14Kiya de dheya we, ini qbahang ma, mkere nduyung daha, mntena so pusu rdrudan daha, ini snhii Utux Tmninun, Utux Baro daha. 15Qmada gaya pndakar Utux Tmninun ma, sndhegan Utux Tmninun pusu rdrudan daha ma pntgaya dheya we, ini daha ngali. Dheya we mosa smdurak tikung skbrhuwan ma sbrhuwan ka dheya. Muyu so noda dqlhangan ssiyo na, kiya ka tnugsaan bale, iya ba puyu ndaan daha mesa ka Utux Tmninun. 16Wada qmada kana gaya pndakar Utux Tmninun, Utux Baro daha ka dheya ma, pqsiya pure xiluy smalu 2 tikung wawa dapa. Pheyu Aserah, thmuku snmalu gaga karac ma, qmeepah Baal. 17Psqmaun daha puniq smapuh ka laqi daha, mosa mpsbunul ma mhuni ma, maruy dheya nanak qmeepah qnnaqah noda doriq Utux Tmninun psqama seang Utux Tmninun. 18Kiya de sqama seang na Israel ka Utux Tmninun ma, lwaqun na peeyah berah na ka dheya. Wano pnswayan rudan Yehudah ka rngiyan na.
19Kiya de, Ini puyu gaya pndakar Utux Tmninun, Utux Baro daha ka Yehudah uri ma, muyu gaya pnheyu ndaan Israel. 20Kiya de Utux Tmninun we sqada na kana ka lqlaqi mslutuc Israel, pqrqilun na ka dheya ma, sbege na dseediq mpgeluk dheya betaq wada lwaqun peeyah berah na nanak.
21Bobo ptgnakun Utux Tmninun peeyah sapah Dawid ka Israel de, pheyu Yarabeam laqi Nebat ka dheya. Yarabeam ge, psridil Israel ini na pqrii Utux Tmninun ma mege paru qnquwan noda dheya. 22Dseediq Israel we muyu kana qnquwan noda Yarabeam ma ida ini alix peeyah hiya. 23Kiya de Utux Tmninun we ida so rnengo na dmpgeela kari tnqliyan na, lwaqun na peeyah berah na ka Israel. Wada qrapun madis Asur peeyah dxeral daha ka Israel ma betaq ali saya.
Theruy Meeniq Samareia ka Seediq Asur
24Qbsuran paru Asur we spririh na dseediq Israel, pniqun na lualang Samareia ka dseediq Babirun, Kut, Awa, Xamat, Separwayim. Dheya ka wada mangal Samareia ma, meniq hiya ka dheya. 25Hani prading meniq hiya ka dheya we, ado ini thmuku Utux Tmninun de, Utux Tmninun we posa rkelic rudu dheya ma wada uqun rkelic rudu ka duma daha. 26Rmengo qbsuran paru Asur ka dheya: “Dseediq icil qqlhangan ka hrigun su peeniq lualang Samareia we, ini kela gaya Utux Baro tndxeral hiya ma pyahun na dheya ka rkelic rudu. Qtai! Rkelic rudu we nii mekan dheya. Ado ini kela gaya Utux Baro tndxeral hiya ka dheya.” 27Posa kari ka qbsuran paru Asur: “Posa hiya ka taxa heyi msapuh qnerac namu maadis. Peeniq hiya ka msapuh ma, ptgsai gaya Utux Baro tndxeral hiya ka dheya.” 28Kiya de taxa heyi msapuh qnerac daha pneeyah Samareia ka mosa meniq Beytel ma, tmgesa seediq quri tthmuku Utux Tmninun.
29Kiya de dseediq icil qqlhangan we, smalu tikung daha nanak meeniq nniqan daha ma, pniqun daha sapah tikung dgiyaq biciq pnheyu seediq Samareia. 30Smalu utux Sukot Benot ka seediq Babirun, smalu utux Nergal ka seediq Kut, smalu utux Asima ka seediq Xamat. 31Smalu utux Nibxaj ma Tartaq ka seediq Awa, seediq Separwayim we, smapuh psqama laqi bbege daha Adrameleq ma Anamelek utux seediq Separwayim. 32Miicu Utux Tmninun ka dheya we, ida maangal nanak msapuh sapah tikung daha dgiyaq biciq hiya ma rmirih dheya qmeepah sapah tikung. 33Miicu Utux Tmninun ka dheya we, thmuku nak utuutux daha nanak ma, muyu gaya qnlhangan nniqan daha berah meeyah theruy. 34Betaq saya, ida muyu gaya daha peeyah cuuxal.
Ini kiicu Utux Tmninun, ini puyu kari pndakar, gaya bneku, gaya, gaya pndakar Utux Tmninun tnugesa na lqlaqi mslutuc Yakobu. Utux Tmninun we Israel kesun na tmngayan ka Yakobu cbeyo. 35Psdehu dheya ma, mdakar rmengo dheya ka Utux Tmninun: “Iya thmuku duutux icil. Iya tgtemaq thmuku ma qmeepah dheya ma, iya bege smapuh dheya. 36Wano ba Utux Tmninun ka dmnoi paru beyax ma, hmnkero baga na dmnudul yamu mlatac peeyah Micrayim. Heya ka kcugi, tgtemaq thmuku ma spuhi mege. 37Ndwai moda klaali ka pnatis na kari pndakar, gaya bneku, gaya ma, gaya pndakar. Iya thmkui ka utux icicil. 38Iya ba chngii ka sndhegan mu yamu. Iya thmkui ka utux iciicil. 39Wano Utux Tmninun, Utux Baro namu ka kcugi. So kiya de mpdoi baga yamu mplatac kana baga pais ka heya.” 40Kiya de ida ini qbahang, ida mooda gaya daha peeyah cuuxal ka dheya.
41So nii, miicu Utux Tmninun dungal ka dqnlhangan nii ma, mosa thmuku tikung daha nanak duri. Ida muyu noda daha ka lqlaqi laqi daha. Muyu so noda pusu rdrudan daha betaq ali saya.
Currently Selected:
2 Qbsuran Paru 17: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
