2 Qbsuran Paru 15
15
Ajaryahu Qbsuran Paru Yehudah
(2 No 26:1-23)
1Tg27 knkawas qlhangan na Israel ka Yarabeam qbsuran paru we, mqbsuran paru Yehudah ka Ajaryah laqi Amajyah. 216 knkawas na mqbsuran paru ka heya ma, 52 knkawas qbsranun na paru Yerusalem hiya. Yekalyahu ka ngayan bubu na ma seediq Yerusalem. 3Mndungus doriq Utux Tmninun ka noda Ajaryahu, muyu kana noda Amajyahu tama na. 4Kiya de we, ini na qdaani ka sapah thmkuwan gaga dgiyaq biciq. Kiya de ida smapuh tnbugan ma psqama skenux hiya ka seediq. 5Pqrqilun Utux Tmninun ka qbsuran paru ma, pqrqilun na mnarux msburo heyi betaq ali mhuqil. Kiya de pniqun pntgaanak icil sapah ka heya. Yotam laqi na ka smnetur sapah qbsuran ma qmlahang seediq qlhangan. 6Duma noda Ajaryahu ma, kana noda na we, uxe gaga spatis ‘Patis ndaan Dqbsuran Paru Yehudah’ hiya peni? 7Msuupu mtaqi pusu rdrudan na ka Ajaryah, skuun daha alang Dawid hiya spuun na pusu rdrudan na. Laqi na Yotam ka lmutuc heya mqbsuran paru.
Jekaryah Qbsuran Paru Israel
8Tg38 knkawas qlhangan na Yehudah ka Ajaryahu qbsuran paru we, mqbsuran paru Israel Samareia hiya ka Jekaryahu laqi Yarabeam ma, 6 idas qbsranun na. 9Ini pndungus Utux Tmninun ka noda na, muyu qnquwan noda Yarabeam laqi Nebat mege qnquwan noda Israel. 10Tbrinah heya ka Salum laqi Yabes. Phqilun na berah seediq ka Jekaryah ma, heya ka lmutuc mqbsuran paru. 11Duma noda Jekaryah we, qtai gaga spatis ‘Patis ndaan Dqbsuran Paru Israel’ hiya kana. 12Kari sntangan Utux Tmninun quri Yehu ka nii: “Mpbetaq mn4 knxalan lqlaqi su ka mpqbsuran paru Israel.” Bale ba wada so nii ka noda.
Salum Qbsuran Paru Israel
13Tg39 knkawas qlhangan na Yehudah ka Ujiyah qbsuran paru we, mqbsuran paru ka Salum laqi Yabes ma, 1 idas qbsranun na Samareia hiya. 14Menaxem laqi Gadi we kndalax Tircah mosa Samareia ma, phqilun na Samareia hiya ka Salum laqi Yabes. Heya ka lmutuc mqbsuran paru. 15Duma noda Salum, noda na tnbrnahan we, qtai! Gaga spatis ‘Patis ndaan Dqbsuran Paru Israel’ hiya kana. 16Kndalax peeyah Tircah ka Menaxem we, mosa phuqil Tipsax ma kana seediq alang ma ssiyo na. Ado ini raguh rhengun alang ka dheya. Heya we wada na phqilun ka dheya ma, btaqan na nbuyas phuqil ka kana mqedil mchedil.
Menaxem Qbsuran Paru Israel
17Tg39 knkawas qlhangan na Yehudah ka Ajaryah qbsuran paru we, mqbsuran paru Israel ka Menaxem laqi Gadi ma, 10 knkawas qnbsranan na Samareia hiya. 18Ini pndungus Utux Tmninun ka noda na, ida ini alix qnquwan noda Yarabeam laqi Nebat mege qnquwan noda Israel. 19Meyah mccebu dxeral nii ka Pul qbsuran paru Asur. Kiya de wada mege 10'00 tarantu ging heya ka Menaxem, so meeyah dmayo heya plekuh qlhangan gisu na qlhangun. 20Kiya de bbege na qbsuran paru Asur ka Menaxem we, pskeexan na pbege pn50 tarantu ging peeyah kana mbleyaq seediq Israel. Kika ini eeniq dxeral hiya ka qbsuran paru Asur ma wada asi osa da. 21Duma noda Menaxem, kana noda na we, uxe gaga spatis ‘Patis ndaan Dqbsuran Paru Israel’ hiya kana peni? 22Msuupu mtaqi pusu rdrudan na ka Menaxem, Peqaxyah laqi na ka lmutuc heya mqbsuran paru.
Peqaxyah Qbsuran Paru Israel
23Tg50 knkawas qnlhangan na Yehudah ka Ajaryah qbsuran paru we, mqbsuran paru Israel Samareia hiya ka Peqaxyah laqi Menaxem ma, 2 knkawas qbsranun na. 24Ini pndungus Utux Tmninun ka noda na ma, ini alix qnquwan noda Yarabeam laqi Nebat mege qnquwan noda Israel. 25Peqax laqi Remalyahu qbsuran supi Peqaxyah we tbrinah heya ma, phuqil heya meniq qbrangan sapah qbsuran paru Samareia. Kiya we meyah dmayo Peqax ka Argob, Aryeh ma msuupu 50 heyi seediq Gilad. Wada phqilun Peqax ka heya ma, Peqax ka lmutuc hiya mqbsuran paru. 26Duma noda Peqaxyah, kana noda na we, qtai! Gaga spatis ‘Patis ndaan Dqbsuran Paru Israel’ hiya kana.
Peqax Qbsuran Paru Israel
27Tg52 knkawas qlhangan na Yehudah ka Ajaryah qbsuran paru we mqbsuran paru Israel Samareia heya ka Peqax laqi Remalyahu ma 20 knkawas qbsranun na. 28Naqah qneepah na Utux Tmninun ka heya ma ini alix muyu rutiq Yarabeam laqi Nebat pqnquwan noda Israel.
29Pkelu Peqax qbsuran paru Israel ciida, meyah mccebu ka Tiglat Pileser qbsuran paru Asur ma ngalun na ka Iyon, Abel Beyt Maakah, Yanuwa, Qedes, Xacor, Gilad, Galil ma kana dxeral Naptaliy. Seediq meeniq heya we wada na desun Asur. 3020 Knkawas qnlhangan na Yehudah ka Yotam laqi Ujiyah we Elah laqi Hosea ka tbrinah mekan Peqax laqi Remalyahu ma wada na phqilun. Elah ka lmutuc Peqax mqbsuran paru. 31Duma noda Peqax, kana qneepah na we gaga spatis ‘Patis ndaan Dqbsuran Paru Israel’ hiya.
Yotam Qbsuran Paru Yotam
(2 No 27:1-9)
32Tg2 knkawas qlhangan na Israel ka Peqax qbsuran paru laqi Remalyahu we, mqbsuran paru Yehudah ka Yotam laqi Ujiyahu. 3325 knkawas na mqbsuran paru ka heya ma, 16 knkawas qbsranun na Yerusalem hiya. Yerusa ka ngayan bubu na ma weewa Cadoq. 34Mndungus Utux Tmninun ka noda Yotam, muyu kana noda Ujiyahu tama na. 35Kiya de ini na laxi ka spuhan dgiyaq biciq, ida mosa mege snapuh ma psqama skenux hiya ka seediq. Yotam we smnalu rhengun Tgbaro sapah thmkuwan Utux Tmninun ka heya. 36Duma noda Yotam, kana qneepah na we, uxe gaga spatis ‘Patis ndaan Dqbsuran Paru Yehudah’ hiya peni? 37Peeyah ciida, Utux Tmninun we prading smkagul Recin qbsuran paru Aram ma Peqax laqi Remalyahu mosa mccebu Yehudah. 38Msuupu mtaqi pusu rdrudan na ka Yotam ma, saan daha smeku habung pusu rdrudan na alang Dawid hiya. Axaj laqi na ka lmutuc Yotam mqbsuran paru.
Currently Selected:
2 Qbsuran Paru 15: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
