2 Qbsuran Paru 14
14
Amajyahu Qbsuran Paru Yehudah
(2 No 25:1-24)
1Tg2 knkawas qlhangan na Israel ka Yehoas qbsuran paru laqi Yoaxaj we, mqbsuran paru Yehudah ka Amajyahu laqi Yoas. 225 knkawas na mqbsuran paru ka heya ma, 29 knkawas qnlhangan na Yerusalem hiya. Yehoadan ka ngayan bubu na ma seediq Yerusalem ka heya. 3Mndungus Utux Tmninun ka noda Amajyahu. Kiya de ini pgkala so Dawid rdrudan na. Heya we muyu kana noda tama na Yoas ka heya. 4Kiya de, ida ini na qdaani ka spuhan dgiyaq biciq ma, ida mosa mege snapuh ma psqama skenux dgiyaq biciq hiya ka seediq. 5Mgdehu meniq baga na ciida ka qnlhangan de, wada phqilun kana dqbsuran paru pnhuqil tama na. 6Kiya de we, ini na phqili ka laqi qbsuran paru. Mntena so kari Utux Tmninun gaga spatis patis gaya Moseh hiya: “Ririh laqi, ini tduwa phuqil tama. Ririh tama, ini tduwa phuqil laqi uri. Txtaxa we phqilun qnquwan noda daha nanak.”
7Wada phuqil 1 mang seediq Edom meeniq ayu Timu hiya ka Amajyahu. Dungal we ngalun na ka alang Sela ma, Yoqteel kesun na tmngayan betaq saya.
8Ciida, Amajyah we smkagul snkgulan mosa lqlaqi laqi Yehu hiya. Kiya ka Yehoas laqi Yehoaxaj qbsuran paru Israel: “Aguh, pseung ta beyax ta!” 9Yehoas qbsuran paru Israel we smkagul seediq mosa qmita Amajyahu qbsuran paru Yehudah ma, rmengo: “Pako Lebanon we smkagul seediq mosa qmita qulic bale Lebanon ma, rmengo: ‘Pstrengi laqi mu ka laqi mqedil su.’ Kiya de niqan ka kingal camac mnoda Lebanon ma, wada na daan qmleqah ka pako da. 10Nasi su ini baka ka Edom ma psparu ka lhebun su. Nii ka spruun su de, nuuqu malu meniq sapah kiya! Ma su lux rmading pqraqil ma, msuupu su Yehudah mhuqil ho?”
11Kiya de ini qbahang ka Amajyahu. Kiya de meyah tgbaro ka Yehoas qbsuran paru Israel ma, meyah psseung Axajyah meniq Bet Semes Yehudah hiya. 12Ini baka mccebu berah Israel ka Yehudah de, qduriq ka dheya ma, mbrinah kobu daha nanak ka dheya. 13Yehoas qbsuran paru Israel we, qrapun na Bet Semes hiya ka Amajyahu qbsuran paru Yehudah laqi Yoas lqlaqi laqi Axajyahu. Mosa betaq Yerusalem ma hrahun na ka qnabil Yerusalem peeyah rhengun Eprayim betaq rhengun Urung, kana we 400 sese. 14Dungal we wada na desun ka kana king ma ging ma qyqeya mneeniq sapah thmkuwan Utux Tmninun ma repun sapah qbsuran paru. Dungal we wada na desun ka seediq ma mbrinah Samareia ka dheya.
15Duma noda Yehoas ma, malu noda na ma, kana noda na mccebu Amajyahu qbsuran paru Yehudah we, uxe gaga spatis ‘Patis ndaan Dqbsuran Paru Israel’ hiya peni? 16Msuupu mtaqi pusu rdrudan na ka Yehoas, skuun daha alang Samareia hiya spuun na dqbsuran paru Israel. Yarabeam laqi na ka lmutuc heya mqbsuran paru.
Mhuqil ka Amajyahu Qbsuran Paru Yehudah
(2 No 25:25-28)
17Bobo mhuqil ka Yehoas qbsuran paru Israel laqi Yehoaxaj de, muudus mgkala 15 knkawas kndesan na ka Amajyahu qbsuran paru Yehudah laqi Yoas. 18Duma noda Amajyahu we, uxe gaga spatis ‘Patis ndaan Dqbsuran Paru Yehudah’ hiya peni? 19Tbrinah Amajyahu ka duma seediq Yerusalem, kiya de qduriq mquri Rakis ka heya. Smkagul seediq betaq Lakis de, phqilun daha hiya ka heya. 20Spaapa daha dapa dmay ka bqerus na ma, skuun daha Yerusalem hiya ka bqerus na ma, pspuun daha pusu rdrudan na alang Dawid hiya.
21Kana seediq Yehudah we pheyu Ajaryah lmutuc tama na Amajyahu mqbsuran paru. Ciida we 16 knkawas na. 22Bobo wada msuupu mtaqi rdrudan na ka qbsuran paru Amajyahu de, Ajaryahu we wada na brnahun mege Yehudah ka Eylat ma brahun na smmalu uri.
Tg2 Yarabeam Qbsuran Paru Israel
23Tg15 knkawas qlhangan na Yehudah ka Amajyahu qbsuran paru laqi Yoas we, mqbsuran paru Israel Samareia hiya ka tg2 Yarabeam laqi Yehoas ma, 41 knkawas ka qbsranan na. 24Ini pndungus Utux Tmninun ka heya. Ini alix muyu qnquwan noda Yarabeam laqi Nebat mege qnquwan noda Israel. 25Pbrnahun na mangal ka dxeral gaga ayus Israel peeyah Xamat betaq rcilung Araba. Mntena rnengo Utux Tmninun, Utux Baro nuIsrael spooda na Yonah laqi Amitay tnqliyan na mpgeela kari pneyah Gat Xeper. 26Ado qtaan Utux Tmninun scqiyan tmraqil ka Israel. Uka ka mtnqliyan, uka ka mtraguh ma, uka ka seediq meeyah dmayo Israel. 27Utux Tmninun we, ini rengo mosa smerus ngayan Israel peeyah kana bobo dxeral. Kiya we kmkpooda Yarabeam laqi Yehoas mdoi baga dheya.
28Duma noda Yarabeam we, kana noda na ma, malu noda na quri wada hmuwa mccebu ma, wada hmuwa pbrinah sbege na Israel ka nangal na dxeral wada ngalun Darmeseq ma, Xamat nangal Yehudah we gaga spatis ‘Patis ndaan Dqbsuran Paru Israel’ hiya peni? 29Msuupu mtaqi rdrudan na dqbsuran paru Israel ka Yarabeam ma, Jekaryah laqi na ka lmutuc heya mqbsuran paru.
Currently Selected:
2 Qbsuran Paru 14: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
