2 Qbsuran Paru 13
13
Yehoaxaj Qbsuran Paru Israel
1Tg23 knkawas qnlhangan na Yehudah ka Yoas qbsuran paru laqi Axajyahu we, mqbsuran paru Israel Samareia hiya ka Yehoaxaj laqi Yehu ma, 17 knkawas qbsranun na paru. 2Yehoaxaj we, ini mndungus Utux Tmninun ka noda na, muyu qnquwan noda Yarabeam laqi Nebat mege qnquwan noda Israel ma, ida ini na laxi. 3Kiya de, mseang mquri Israel ka Utux Tmninun ma, kiya ka mnpyanan na mege baga Xajael qbsuran paru Aram ma Ben Hadad laqi na ka dheya. 4Dmurun Utux Tmninun ka Yehoaxaj de, mbahang heya ka Utux Tmninun. Ado qmita gaga trqilun qbsuran paru Aram ka Israel. 5Utux Tmninun we, biqan na 1 mdoi baga dheya mpaalix peeyah tnraqil baga seediq Aram ka Israel. Kiya ka ida msbleyaq meeniq kobu daha nanak ka seediq Israel. 6Kiya de dheya we, ida ini alix qnquwan noda tnsapah Yarabeam, ida mege qnquwan noda Israel. Meepah qnquwan noda gaga meniq tikung Aserah ka Samareia hiya. 7Qbsuran paru Aram we, spntena na so qmleqah bengux dxeral meniq qnpahan mugi, wada na phqilun ka supi Yehoaxaj. Wano 50 supi paapa dapa dmay, 10 rulu mccebu ma, 1 mang heyi supi nanak ka pnsngari na hiya. 8Duma noda Yehoaxaj, kana noda na ma, malu noda na we, uxe gaga spatis ‘Patis ndaan Dqbsuran Paru Israel’ hiya peni? 9Msuupu mtaqi pusu rdrudan na ka Yehoaxaj, skuun daha alang Samareia hiya. Yehoas ka lmutuc heya mqbsuran paru.
Yehoas Qbsuran Paru Israel
10Tg37 knkawas qlhangan na Yehudah ka Yoas qbsuran paru we, mqbsuran paru Israel Samareia hiya ka Yehoas laqi Yehoaxaj ma, 16 knkawas qbsranun na paru. 11Ini pndungus Utux Tmninun ka noda na. Ini alix qnquwan noda Yarabeam laqi Nebat mege qnquwan noda Israel. Ida moda qnquwan noda ka dheya. 12Duma noda Yehoas, kana noda na ma, malu noda na msuupu mccebu Amajyah qbsuran paru Yehudah we, uxe gaga spatis ‘Patis ndaan Dqbsuran Paru Israel’ hiya peni? 13Msuupu mtaqi pusu rdrudan na ka Yehoas, Yarabeam ka lmutuc Yuhwas mqbsuran paru. Yehoas ma dqbsuran paru Israel we, gaga pspuun smeku Samareia hiya.
Mhuqil ka Elisa
14Mnarux mphuqil ka Elisa, meyah mita heya ka Yehoas qbsuran paru Israel. Sqapah dqeras na lmingis ma, rmengo: “Tama mu! Tama mu! Rulu mccebu ma supi paapa dapa dmay Israel!” 15Rmengo heya ka Elisa: “Ita hini ka budi.” Kiya de madis budi ka qbsuran paru. 16Rmengo qbsuran paru Israel ka Elisa: “Hkero ka budi.” Kiya de mhkero budi ka qbsuran paru. Kiya de posa baga na meeniq bobo baga qbsuran paru ka Elisa, 17rmengo: “Rwahi ka bnlingan quri nklaan hido.” Kiya de rmaguh ka heya. Rmengo ka Elisa: “Posa ka budi su!” Kiya de posa budi ka heya. Rmengo ka Elisa: “Budi mbeyax Utux Tmninun ka nii, kiya ka budi mpkbeyax seediq Aram. Ado mccebu su seediq Aram meniq Apeq hiya ma mpbetaq phqilun kana ka dheya.” 18Rmengo dungal ka Elisa: “Ngali duma budi.” Kiya de madis ka heya. Rmengo qbsuran paru Israel ka Elisa: “Cebu dxeral.” Mn3 cmebu dxeral ka qbsuran paru de malix da. 19Mseang qbsuran paru ka seediq Utux: “Na ka su cmebu mn5, mn6. Kiya ka qhdeun su phuqil kana ka seediq Aram. Saya de, maha su wano ba mn3 mpkbeyax su seediq Aram ka isu.”
20Mhuqil ka Elisa da ma, saan daha smeku. Bnrahan kingal knkawas bgurah, gisu meyah kmremux dxeral ka rahul seediq Moab. 21Gisu mosa smeku seediq bqerus ka dseediq ciida, qtai! Gisu qmita nii ka rahul seediq de, asi daha qdani habung Elisa ka seediq mnhuqil ma, qduriq nhari. Sdlingan buuc Elisa ka seediq mnhuqil nii de, asi kuudus ma, mheyu ka papak na.
Mccebu ka Israel ma Aram
22Muudus ka Yehoaxaj ciida, ida meyah pqraqil Israel ka Xajael qbsuran paru Aram. 23Ado mnoda psdehu Abraham, Yijxaq ma, Yakobu ka Utux Tmninun we, kiya ka ida gmhuwe seediq Israel ma, gmaalu, qmlahang dheya, betaq ini na phqili ka dheya. Betaq saya we, ida na ini qdriqi peeyah berah na ka dheya.
24Mhuqil ka Xajael qbsuran paru Aram ma, Ben Hadad laqi na ka lmutuc heya mqbsuran paru. 25Xajael we mccebu Yehoaxaj tama Yehoas ka heya ma, wada na ngalun ka duma lualang. Saya, Yehoas laqi Yehoaxaj we mn3 ini na baka ka Ben Hadad laqi Xajael. Kiya de trrihan na mangal peeyah baga na ka lualang Israel.
Currently Selected:
2 Qbsuran Paru 13: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
