2 Qbsuran Paru 12
12
Yoas Qbsuran Paru Yehudah
(2 No 24:1-26)
1Tg7 knkawas qnlhangan na Israel ka Yehu we, Yoas ka mqbsuran paru Yehudah ma, 40 knkawas qbsranun na Yerusalem hiya. Cibyah ka ngayan bubu na ma seediq Beerseba ka heya. 2Yoas ge, tgsaan Yehoyada msapuh ciida han we mndungus Utux Tmninun ka noda na. 3Kiya de ida daha ini laxi ka spuhan dgiyaq biciq, ida mosa mege snapuh psqmaun ka seediq.
4Rmengo quri dmsapuh ka Yoas: “Kana pila pnrtaso pnsaanak sapah thmkuwan Utux Tmninun we, ani pila pnsaasu bbiqun pneeyah txtaxa heyi, txtaxa knuudus, uxe uri we pneeyah lnglungan daha nanak bbege daha sapah Utux Tmninun we, 5tduwa mangal peeyah dseediq klaun na ka msapuh, kiya ka sdoi na ssmalu kana nnaqah sapah thmkuwan.” 6Kiya de dehuk ka tg23 knkawas qnlhangan Yoas de, ida ini smlei dmsapuh ka mnugerung sapah thmkuwan. 7Kiya de mlawa Yehoyada msapuh paru ma duma msapuh ka Yoas qbsuran paru ma, rmengo dheya: “Ma namu ini smlei ka mnugerung sapah thmkuwan? Peeyah saya de iya aangal pila peeyah dseediq nklaan namu. Ado mugerung nii we, asi ka brnahun namu kana ka ging.” 8Dmsapuh we, ini aangal pila peeyah seediq ma, ini oda smalu mnugerung sapah thmkuwan uri ka dheya.
9Maangal 1 kulu ka Yehoyada msapuh paru ma, gblingan na beling ka gemuk na ma, psaun na ssiyo spuhan ma tgnarac tmayan sapah thmkuwan Utux Tmninun hiya. Dmsapuh mpqlahang rhengun we psaun daha kulu hiya ka kana pila bnege daha sapah thmkuwan Utux Tmninun. 10Qtaan daha gisu egu ka pila truma kulu de, mosa mlawa mpatis qbsuran paru ma, paru msapuh. Spegun daha ma psaun daha lubuy ka pila nangal daha peeyah sapah thmkuwan Utux Tmninun. 11Pila snepu daha nii we sbege daha baga mpqlahang sapah thmkuwan Utux Tmninun. Kiya ka pila bbege daha mpqeepah mkela smalu qhuni, tmgeeru smalu sapah thmkuwan Utux Tmninun, 12mqeepah mkela rmumu celaq ma, kmeruc btunux. Dungal we bbaruy daha qyqeya qhuni ma, btunux keruc ddooyun daha smmalu mnugerung sapah thmkuwan Utux Tmninun ma, kana dooyun daha ssmalu hiya 13Pila bnege daha sapah thmkuwan Utux Tmninun nii we, ini daha smlei pngerah sara ging, dahur begu, rusuq ma iyuk so dnii ka qyqeya snmalu king ma ging. 14Pila nii we sbege daha dmpqeepah, wano ddooyun ssmalu sapah thmkuwan Utux Tmninun nanak. 15Ado mnduwa smeung bale meepah ka dmpqlahang seediq mpqeepah nii de, ani daha ini qtai ka patis pila bniqan. 16Pila pneeyah sapuh prtaso qnquwan ma snapuh psruwa qnquwan noda we, ini daha psai sapah thmkuwan Utux Tmninun kiya. Wada daha sbege msapuh kana.
17Ciida, meyah mccebu Gat ma wada mangal alang kiya ka Xajael qbsuran paru Aram. Kiya de niqan lnglungan na kmccebu Yerusalem uri ka heya. 18Yoas qbsuran paru Yehudah we, wada na sbege Xajael qbsuran paru Aram kana ka qyqeya pnrtaso pneeyah Yehosapat, Yehoram, Axajyahu dqbsuran rdrudan na ma, qyqeya pnrtaso na nanak ma, kana king gaga meniq sapah thmkuwan Utux Tmninun ma sapah qbsuran paru. Kiya de ini eyah mccebu Yerusalem ka Xajael.
19Duma noda Yoas, kana noda na we, uxe gaga spatis ‘Patis ndaan Dqbsuran Paru Yehudah’ hiya peni? 20Mtbrinah Yoas kana ka dqbsuran mdayo ma, phqilun daha sapah qbsuran Btmiru elu mquri Sila hiya ka heya. 21Pnhuqil heya we Yehojabad laqi Simat ma Yehojabad laqi Somer. Pspuun rmeus pusu rdrudan na alang Dawid hiya ka heya ma, Amajyah laqi na ka lmutuc heya mqbsuran paru.
Currently Selected:
2 Qbsuran Paru 12: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
